Fakamatala Nakai Noa
1 He falu magaaho, ne liga logona hifo e tautolu kua gahua tumau mo e fakamatafeiga e fonua ka e nakai lahi e taliaaga. Ka e, ha ha i ai e tau kakano omoomoi ma tautolu ke fakatumau e fakamatala.—Mata. 28:19, 20.
2 Ke Fakamatala: Ne talahau tuai e Iesu to eke e fakamatala he Kautu mo vala aoga lahi he fakamailoga ‘he fakaotiaga he lalolagi’ mo e to taute ai “ke eke mo talahau ke he tau atu motu oti.” (Mata. 24:3, 14) Ka kitia he tau tagata a tautolu hane taute e gahua fakamatala he tala mitaki he Kautu, kua foaki tuai e fakamatala malolō lahi. He toka e tautolu e matakavi, liga to totou tulā po ke totou aho e tutala he falu tagata hagaao ke he ahiahi atu ha tautolu, pete ne nakai fanogonogo a lautolu ke he fekau. He loto fakaaue ke he tau kakano ma e fekafekauaga ha tautolu ka lagomatai a tautolu ke fakamanavalahi. Kua fakafiafia e tautolu a Iehova he fakamooli e perofetaaga he Tohi Tapu ke fakamatala mo e tukuogo atu e fekau hataki.—2 Tesa. 1:6-9.
3 Lata e Fakamanavalahi: Ha kua loga lahi e tau futiakiaga mo e lahi mahaki e fōfō he tau magaaho he tau tagata, kua lata ia tautolu ke moua e fakamanavalahi ka lali a tautolu ke feaki e fiafia ha lautolu. Taha e fifine ne aahi atu ki ai he tau faahitapu takitaha ke taha e tau ato fifili a ia ke uiina e Tau Fakamoli ki loto he fale haana ke fakatutala ke he Tohi Tapu. Ne loto lahi a ia ke he mena ne logona e ia ti talia ai ke fakaako e Tohi Tapu, ti kamata ke fano he tau feleveiaaga, nakai leva ti fakakite e manako ke papatiso.
4 Kua hiki mafiti e tau tutūaga he lalolagi, ti pihia foki e tau tagata. Tokologa ne fakaheu e ahiahi atu ha tautolu he tau mogo kua mole ne liga fiafia mogonei ke he amaamanakiaga fakahahau ne tala age e tautolu. Ka tokotaha ni e tagata ne talia fiafia e fekau he Kautu, kua aoga mooli e fakamanavalahi ha tautolu.
5 Tokologa lahi mahaki e tagata he lalolagi katoa hane “tauoi mo e mānu ha ko e tau mena vihiatia kua eke.” (Eseki. 9:4) Kua fakakite mooli he tau fua he Kautu ko lautolu kua moua ke tututonu hane talia e fekau he Kautu. (Isaia 2:2, 3) Ko e mena ia, kia fakatumau a tautolu ke fakamatala nakai noa he fakamanavalahi fakaalofa ke ‘talahau e tala mitaki.’—Isaia 52:7; Gahua 5:42.