Fakatumau ke Holo ki Mua ko e Fekafekau
1. Ko e heigoa e tau fakafifitakiaga he senetenari fakamua ne fakakite kua lata ia tautolu ke holo ki mua ko e tau fekafekau?
1 Kua lata e tau Kerisiano ke holo ki mua ke eke mo tau fekafekau. Kakano haia ne fakatumau a Iesu ke fakamahani e tau tutaki haana ke holo ki mua he gahua fakamatala. (Luka 9:1-5; 10:1-11) Kakano foki haia ati uta e Akula mo Pisila a Apolo ke hoa mo laua mo e “fakamatala fakatonu atu e puhala he Atua kia ia.” (Gahua 18:24-26) Kakano taha ia ati fakamalolō e Paulo e tagata fakamatala iloilo ko Timoteo ke hagaaki ke he fakaakoaga ke fakaako a ia ke maeke ke holo ki mua ti “kitia ai he tau tagata oti” haana a mafiti. (1 Timo. 4:13-15) Pete ne leva e fekafekau ha tautolu ke he Iki ko e tau tagata fakailoa he tala mitaki, kua lata ia tautolu ke fakamata tumau e tau puhala fakamatala ha tautolu.
2. Maeke fēfē a tautolu ke fakaako mai he falu?
2 Fakaako Mai he Falu: Taha puhala ke fakaholo ki mua e tau iloilo ha tautolu he fakaako mai he falu. (Fakatai 27:17) Mena ia, matakite ka taute he tau tagata fakailoa ha lautolu a fakataitaiaga. Ole ma e tau manatu pauaki mai he tau tagata fakamatala lauia mitaki, ti fanogonogo fakamitaki ke he mena ha lautolu ne talahau. (Fakatai 1:5) Fakauaua kia a koe ke he puhala ke taute e liu aahi atu, kamata e fakaako Tohi Tapu, po ke fakalataha ke he falu puhala he gahua he fonua? Kia fakailoilo, ti ole ke he leveki matakau haau po ke tagata fakailoa iloilo ma e fakamahaniaga. Manatu foki, maeke he agaaga tapu ha Iehova ke fakamalagaki e tau lotomatala ha tautolu, ti ole tumau ai he liogi.—Luka 11:13.
3. Fēfē e tali ha tautolu ka moua e tautolu e manatu lagomatai, pete he nakai ole ki ai?
3 Ua ita ka moua e koe e manatu ke holo ki mua, pete kaeke kua nakai ole ki ai. (Fakama. 7:9) Tuga a Apolo, talia e lagomatai he fakatokolalo mo e loto fakaaue. Ko e taute pihia kua fakakite e pulotu.—Fakatai 12:15.
4. Ko e heigoa e kakano malolō lahi ne foaki e Iesu ma e holo ki mua he tagata fakamatala?
4 Ko e Holo ki Mua kua Fakaheke e Atua: He puhala fakatai, ne fakamalolō e Iesu e tau tutaki haana ke holo ki mua ke eke mo tau fekafekau. Ne fakatatai e ia a ia ke he vine mo e haana tau tutaki fakauku ke he tau la. Pehē a ia kua taute he Matua e tau la oti kua fai fua ke “au atu ai he fua.” (Ioane 15:2) Tuga ni e pule he uluvine ne manako ke he tau la he uluvine haana ke fua, manako a Iehova ki a tautolu ke tupu e lotomatala ha tautolu ke moua mai e ‘tau fua he tau laugutu ha tautolu.’ (Hepe. 13:15) Ko e heigoa e fua mitaki ka holo ki mua a tautolu ko e tagata fakamatala? Tala mai e Iesu e tali: “Kua fakaheke ai ke he haku a Matua ke he mena nai, ka fua loga mai a mutolu.”—Ioane 15:8.