Ko e Tau Tohiaga Tapu Heleni Kerisiano kua totoku tumau a Panapa mo e aposetolo ko Paulo. Kua fekafekau e tau tagata taane nei ko e tau leveki faifano he ahiahi e tau fakapotopotoaga fakamua atu. Ko e ha? Ne manamanatu mooli a lautolu ke he tuaga fakaagaaga he ha lautolu a tau matakainaga. Ne pehē a Paulo kua manako a ia ke ‘liu atu ke ahi e tau matakainaga’ ke kitia ko e fēfē a lautolu. Kua makai a ia he totou teau e kilomita ke fano mo e fakamalolō a lautolu. (Gahua 15:36) Ko e manako a ia he tau leveki faifano ha mautolu he vahā nei.

O mai a lautolu ke fakamafana ia mautolu. Igatia e leveki takaiaga mo e ahiahi atu ke he 20 po ke loga e fakapotopotoaga, he fakaaoga taha e faahi tapu mo e tau fakapotopotoaga takitaha, lagaua he tau. Maeke a mautolu ke aoga lahi mai he tau mena iloa he tau matakainaga taane nei mo e tau hoana ha lautolu, kaeke kua mau. Kua eketaha a lautolu ke iloa e tau fanau mo lautolu ne momotua, ti makai a lautolu ke fakalataha mo mautolu he gahua he fonua mo e tau fakaako Tohi Tapu ha mautolu. Ko e tau leveki nei kua ahiahi atu mo e tau motua, ti fakamalolō a mautolu, kua foaki e lautolu e tau lauga atihake he tau feleveiaaga mo e tau toloaga.​—Gahua 15:35.

Fakakite e lautolu e fiafia ke he tau tagata oti. Kua fiafia mooli e tau leveki takaiaga ke he tuaga fakaagaaga he tau fakapotopotoaga. Ne feleveia a lautolu mo e tau motua mo e tau fekafekau lagomatai ke liu kitekite ke he holo ki mua mo e ke foaki ki a lautolu e fakatonuaga aoga he taute e tau matagahua ha lautolu. Kua lagomatai e lautolu e tau paionia ke kautū he fekafekauaga ha lautolu, ti moua e lautolu e fiafia he iloa a lautolu kua foou mai mo e logona hagaao ke he holo ki mua fakaagaaga ha lautolu. Igatia e tau matakainaga taane nei mo e foaki noa a lautolu ko e ‘ekegahua ma mautolu.’ (2 Korinito 8:23) Kua lata ia mautolu ke fifitaki e tua mo e fakamooli ha lautolu ke he Atua.​—Heperu 13:7.

• Ko e heigoa e kakano kua ahiahi he tau leveki takaiaga e tau fakapotopotoaga?

• Aoga fēfē a koe mai he tau ahiahi ha lautolu?

Ka tupu e matematekelea pauaki, ne mafiti e Tau Fakamoli a Iehova ke fakatoka e lagomatai ke fakatotoka aki e tau matakainaga ha lautolu ne lauia. Fakakite he tau laliaga pihia e moolioli he fakaalofa ha mautolu ma e falu. (Ioane 13:34, 35; 1 Ioane 3:17, 18) Lagomatai e mautolu he puhala fe?

Foaki e mautolu e tau tupe. He tō e hoge ki Iutaia, ne fakafano he tau Kerisiano fakamua i Anetioka e lagomataiaga fakatupe ke he tau matakainaga fakaagaaga ha lautolu. (Gahua 11:27-30) Pihia foki, ka iloa e mautolu kua fehagai e tau matakainaga ha mautolu he taha faahi he lalolagi mo e tuaga uka, fakafano e mautolu e tau tupe puhala he fakapotopotoaga ha mautolu ke foaki e tau koloa fakatino ki a lautolu kua manako lahi ke he lagomatai.​—2 Korinito 8:13-15.

Foaki e mautolu e tau lagomatai uho lahi. Ko e tau motua kua kitia e matematekelea lahi ne kumi e tagata he tau fakapotopotoaga takitaha ke fakakia kua leveki mo e haohao mitaki e tau tagata oti. Ko e komiti foaki lagomatai ne liga takitaki e foaki he tau mena kai, vai inu meā, tau mena tui, mena ke nonofo, mo e lagomatai fakaekekafo. Tokologa e Fakamoli ne manako tagata ne fai lotomatala pauaki ke o atu he totogi ne lautolu mo e fai vala he gahua foaki lagomatai po ke fakafoou e tau kaina mo e tau Fale he Kautu ne malona. Ko e kaufakalataha kua moua e mautolu he fakatokatokaaga mo e iloaaga ne moua e mautolu he gahua auloa kua taute a mautolu ke mautauteute mafiti he tau magaaho kua manako lagomatai. Pete he foaki e mautolu e lima ke he “faoa ne tua,” lagomatai foki e mautolu e falu ka maeke ia mautolu, pete ne tau lotu ha lautolu.​—Kalatia 6:10.

Foaki e mautolu e lalagoaga fakaagaaga mo e logonaaga. Ko e tau tagata ne lauia he matematekelea kua lata pauaki ke fakamafana. He tau mogo pihia, kua moua e mautolu e malolō mai ia Iehova, “ko e Atua foki hana e tau fakamafanaaga oti.” (2 Korinito 1:3, 4) Kua fiafia a mautolu he tala age e tau maveheaga he Tohi Tapu ki a lautolu ne fakaatukehe, he foaki e fakamafana ka nakai leva ti tamai he Kautu he Atua e fakaotiaga ke he tau malaia oti ne fakatupu e mamahi mo e matematekelea.​—Fakakiteaga 21:4.

• Ko e ha e Tau Fakamoli kua maeke ke tali mafiti he tau mogo matematekelea pauaki?

• Ko e heigoa e fakamafanaaga fakaagaaga ka tala age e mautolu ki a lautolu ne hao?