Maeke Fēfē Ia Au ke Kalo Kehe he Manamanatuaga Kelea?

• Fēfē e onoonoaga haau ki a koe ni?

• Fai aoga kia?

• Ko e heigoa haau ka taute

• Totou atu foki

• Talahauaga he tau kapitiga haau

Fēfē e onoonoaga haau ki a koe ni?

• Aga fiafia tumau

  “Lali a au ke fiafia mo e nakai mafiti ke ita. Mo e lali ke mamali mo e nakai fai tupetupe he tau aho oti.”​—Valerie.

• Aga nakai fiafia

  “Ka fai mena mitaki ka tupu, mafiti au ke manamanatu kua nakai mooli.”​—Rebecca.

• Manamanatu hako

  “Ko e aga fiafia tumau ka fakaita au he nakai holo mitaki e mena ne taute e au, mo e ka aga nakai fiafia to momoko tumau au. He manamanatu hako au ne lagomatai ke kitia e tau mena mooli.”​—Anna.

Fai aoga kia?

Talahau he Tohi Tapu “ko e loto fiafia, ko e galue nakai noa haia.” (Tau Fakatai 15:15) Ko e tau tagata ne kalo kehe he tau manamanatuaga kelea he tau magaaho oti, mo e lali ke kumi e tau aga mitaki he falu tagata ne lahi e fiafia. Mukamuka a lautolu ke moua loga e kapitiga foki. Ko hai ne manako ke lafi mo e tau tagata ne nakai fiafia?

Pete ni ko e tagata aga fiafia a koe, ka e fai mena uka agaia ka fehagai mo e moui haau. Ma e fakatai:

• Logona tumau e koe e tau nusi ke he felakutaki, fakamatakutaku po ke mahani kelea.

• Liga to fehagai a koe mo e tau lekua he magafaoa haau.

• Fai lolelole foki a koe ne fehagai ki ai ha ko e nakai mitaki katoatoa.

• Kua fakamomoko he kapitiga a koe ke he puhala vagahau po ke mena ne taute e ia.

Nakai lata ke pā e tau mata ke he tau mena ne tutupu po ke manamanatu tumau ki ai, ka e lali ke onoono ke he puhala hako. Ko e onoono hako nei ka lagomatai a koe ke ua manamanatu kelea mo e talia e tau mena tutupu he moui haau ka e nakai ke fakalolelole aki a koe.

Ko e heigoa haau ka taute

• Onoono ke he tau kūkū haau he puhala hako.

  Talahau he Tohi Tapu: “Nakai ni ha ha i ai ha tagata tututonu ke he lalolagi, kua eke e mahani mitaki, mo e nakai hala a ia.” (Fakamatalaaga 7:20) Ha kua fai kūkū a koe mo e taute e tau mena hepe, ka e nakai fakakite he naia ko e tagata nakai fai aoga a koe.

  Mailoga e mena mooli: Gahua ke he tau kūkū haau, ka e manatu ko e tagata nakai mitaki katoatoa a koe. “Lali au ke nakai onoono ke he tau kūkū haaku,” ne talahau he tama fuata ko Caleb. “Ka e lali au ke ako mai he tau mena ia ke maeke ke holo ki mua.”

• Kalo kehe he fakatatai.

  Talahau e Tohi Tapu: “Aua neke eke a tautolu mo tau tagata hula noa, aua neke fepalekoaki a tautolu, aua neke mahekeheke a tautolu ko e taha kia taha.” (Kalatia 5:26) He onoono a koe ke he tau ata he initanete mo e tau fakafiafia ne nakai uiina a koe ki ai, ti fakaita aki a koe. Ko e tau kapitiga tata haau kua tuga e tau fī he mogonei.

  Mailoga e mena mooli: Iloa e koe to nakai uiina a koe ke he tau fakafiafia oti. Ko e tau fakatino he initanete kua nakai fakakite e falu vala he moui he tagata. “Ko e initanete ne fakakite e tau mena fakafiafia ke he tau momoui he tau tagata,” ne talahau he fuata ko Alexis. “Nakai fakakite e lautolu e tau mena ne taute he tau aho oti.”

• Taute e mafola mo lautolu he magafaoa haau.

  Talahau he Tohi Tapu: “Kaeke kua maeke ia mutolu, kia nonofo fakamitaki mo e tau tagata oti kana.” (Roma 12:18) Nakai maeke a koe ke hiki e tau mena ne taute he falu ka e maeke a koe ke hiki e mena ne taute e koe. Ko e fifiliaga haau ke taute e mafola.

  Mailoga e mena mooli: Lali ke nakai fakaholo ki mua e kelea he tau lekua he magafaoa ka e taute e mafola mo e magafaoa tuga ke he tau kapitiga haau. “Nakai fai tagata ne mitaki katoatoa, mo e falu magaaho to fakamamahi he tau kupu mo e tau mena ne taute he falu,” ne talahau e fuata ko Melinda. “Ko e fifiliaga ha tautolu ke taute e mafola po ke nakai.”

• Ako ke fakaaue.

  Talahau e Tohi Tapu: “Kia mahani foki a mutolu ke fakaaue.” (Kolose 3:15) Ka mahani fakaaue a koe to hagaaki a koe ke he tau mena mitaki he moui haau ka e nakai ke he tau mena ne nakai fiafia a koe ki ai.

  Mailoga e mena mooli: Mailoga e tau lekua haau ka e ua tiaki e tau mena mitaki he moui haau. “Ne tohi hifo e au he lau pepa, taha e mena mitaki he tau aho oti,” he talahau he tama fuata ko Rebecca. “Iloa e au, pete he fai lekua ka e fai mena mitaki ke manamanatu au ki ai.”

• Fifili e tau kapitiga haau.

  Pehē e Tohi Tapu: “Ko e feoaki mo lautolu kua mahani kelea kua kelea ai e tau mahani mitaki.” (1 Korinito 15:33) Ko e tau tagata ne lafi mo koe ne nakai fanogonogo mo e hemu ka pikitia a koe he tau mahani kelea ha lautolu.

  Mailoga e mena mooli: He magaaho ka lauia e tau kapitiga mo e tau lekua uka, to logona e lautolu e momoko mo e tupetupe. Taute e mena ke lagomatai a lautolu, ka e ua tupetupe lahi a koe ke he tau lekua ha lautolu. “Nakai lata a tautolu ke lafi tumau mo e tau tagata manamanatu kelea,” ne talahau he fifine fuata ko Michelle.

Totou atu foki

Pehē e Tohi Tapu kua nonofo a tautolu he “tau aho uka.” (2 Timoteo 3:1) Mukamuka nakai ia koe ke tumau e aga mitaki ka e loga e tau lekua he lalolagi? Totou “Ko e Ha kua Lahi Mahaki e Matematekelea?”