Fai Atua Nakai?
Ko e tali he Tohi Tapu
E. Talahau mai he Tohi Tapu fai fakakiteaga mooli na fai Atua. Fakamafana ki a tautolu ke atihake e tua ke he Atua, ka e nakai talia noa ni e tau tala ne talahau he tau lotu, ke fakaaoga e manamanatuaga iloilo mo e “loto manamanatu.” (Roma 12:1; 1 Ioane 5:20) Manamanatu ke he tau talahauaga ne fakavē ke he Tohi Tapu:
Ko e maopoopo he tau mena momoui he lagi mo e lalolagi kua fakakite na fai Tufuga. Pehē e Tohi Tapu: “Ha kua takitaha e fale mo e tufugatia ai e taha, ka ko ia ne tufugatia ai e tau mena oti kana, ko e Atua haia.” (Heperu 3:4) Tokologa e tagata pulotu ne pehē kua malolō lahi e talahauaga ia, pete ni kua mukamuka ke maama.a
Ko e tau tagata a tautolu, mo e manako ke iloa e kakano he moui, pete ni kua fai levekiaga ma e tau manako fakatino ha tautolu. Kua lata a tautolu ke iloa mo e tapuaki ke he Atua. Fakaako he Tohi Tapu na maeke a tautolu ke kapitiga tata mo Ia. (Iakopo 2:23; Fakakiteaga 4:11) Ko e manako nei kua fakamooli na fai Atua, ka e fakakite foki ko ia ko e Tufuga fakaalofa ka fakamakona e manako ia.—Mataio 4:4.
Ko e tau perofetaaga ne talahau he Tohi Tapu ne tohia ke he loga e tau senetenari, kua fakamooli he magaaho tonu. Ko e hakotika he tau perofetaaga ia kua moua mai he Atua ne mua atu e iloilo ke he tau tagata.—2 Peteru 1:21.
Ko lautolu ne tohia e Tohi Tapu kua puke ke he tau iloilo fakasaiene ne nakai maama he falu tagata he magahala ia. Ma e fakatai, he vahā tuai tokologa e tagata ne talitonu na toka e lalolagi i luga he manu tuga e elefane, puaka vao, po ke povi. Ka e pehē e Tohi Tapu, taute he Atua e lalolagi mo e “nakai ha i ai ha mena ke tautau a ia [lalolagi] ki ai.” (Iopu 26:7) Talahau foki he Tohi Tapu na veliveli e “mena ne takai aki e lalolagi.” (Isaia 40:22) Tokologa e tagata ne iloa ko e fakamaamaaga ha lautolu ne tohia e Tohi Tapu na moua mai he Atua.
Kua tali he Tohi Tapu e tau hūhū uka, ka nakai moua e tau tali ke he tau hūhū uka to fakahēhē e tagata ke talitonu nakai fai Atua. Ma e fakatai: Ka eke kua fakaalofa mo e malolō ue atu e Atua, ko e ha ne matematekelea e lalolagi? Ko e ha kua talahau ko e lotu ko e mena kelea ka e nakai ko e mena mitaki?—Tito 1:16.
a Ma e fakatai, ko e taha saienetisi ne kumikumi he tau fetū ko Allan Sandage, ne pehē a ia: “Manatu au ko e maopoopo pihia ne kua nakai amanaki ti tupu. Kua fai fakatokatokaaga pauaki. Nakai iloa mitaki e au e Atua, ka e fai tufuga ati maeke ke kitia e tupumaiaga.”