Tokofiha e Tau Fakamoli a Iehova kua iloa e koe? Falu ia mautolu kua liga ko e tau katofia, tau tagata gahua auloa, po ke tau kapitiga aoga haau. Po ke liga kua fakatutala a mautolu mo koe ke he Tohi Tapu. Ko hai mooli a mautolu, ti ko e ha kua talahau e mautolu e tau taofiaga ha mautolu?

Ko e tau tagata agaia ni a mautolu. O mai a mautolu he tau feakiaga mo e tau tuaga kehekehe. Falu ia mautolu ne ō he taha lotu kehe he magaaho fakamua, ka e falu ne nakai talitonu ke he Atua. Ato eke mo Tau Fakamoli, kua fai magaaho a mautolu oti ke kumikumi fakamitaki ke he tau fakaakoaga he Tohi Tapu. (Gahua 17:11) Kua talia e mautolu e mena ne fakaako e mautolu, ti taute e mautolu e fifiliaga fakatagata ke tapuaki ki a Iehova ko e Atua.

Aoga a mautolu mai he fakaako e Tohi Tapu. Tuga ni e tau tagata oti, kua fehagai a mautolu mo e tau lekua mo e tau kūkū ni ha mautolu. Ka ke fakagahua e tau matapatu fakaakoaga he Tohi Tapu he tau momoui ha mautolu he tau aho takitaha, kua logona e mautolu kua holo ki mua e tuaga he tau momoui ha mautolu. (Salamo 128:1, 2) Ko e taha kakano haia ati talahau e mautolu ke he falu e tau mena mitaki kua fakaako e mautolu mai he Tohi Tapu.

Momoui a mautolu ke he tau mahani Atua. Ko e tau mahani nei, tuga ne fakaako he Tohi Tapu kua fakaholo ki mua e tau momoui mo e fakalilifu ma e falu, fakalataha mo e mahani fakamooli mo e mahani totonu. Kua lafi e lautolu ke he tupu ki mua e mauokafua mo e fua mitaki he tau tagata he kaufakalatahaaga, ti fakamalolō e lautolu e kaufakalataha mo e tau mahani mitaki he magafaoa. He talitonu kua “nakai fakamailoga tagata e Atua,” kua ha ha ai a mautolu mo e tau matakainaga fakaagaaga ke he lalolagi katoa, ne atāina he tau kaupāaga fakamotu mo e fakapolitika. Pete ko e tau tagata agaia a mautolu, kua eke a mautolu mo tau tagata kua kehe lahi.​—Gahua 4:13; 10:34, 35.

• Ke he puhala fe ne tatai e Tau Fakamoli a Iehova mo e falu tagata?

• Ko e heigoa e tau mahani kua iloa he Tau Fakamoli he fakaako mai he Tohi Tapu?

Tokologa ne manatu ko e Tau Fakamoli a Iehova ko e higoa he lotu foou. Ka e, molea e 2,700 tau kua mole, ko e tau fekafekau he Atua mooli tokotaha ne fakamaama ko e haana “tau fakamoli.” (Isaia 43:10-12) Ato hoko e 1931, ne iloa a mautolu ko e Tau Tagata Fakaako Tohi Tapu. Ko e ha ne hiki a mautolu ke he higoa Tau Fakamoli a Iehova?

Fakakite ai ha mautolu a Atua. Hagaao ke he tau fakamauaga tuai, ko e higoa he Atua ko Iehova kua lagaloga e totoku i loto he Tohi Tapu. He tau fakaliliuaga loga ke he higoa nei kua hukui aki e tau mataulu, tuga e Iki po ke Atua. Ka ko e Atua mooli ne fakakite a ia ki a Mose ke he higoa mooli haana ko Iehova, he pehē: “Ko e haku higoa haia tukulagi.” (Esoto 3:15) He puhala nei, ne fakakehe e ia a ia mai he tau atua fakavai oti. Kua matalahi a mautolu ke hahamo e higoa tapu he Atua.

Fakamaama ai e matagahua ha mautolu. He laini loa he tau tagata i tuai, kamata mo e tagata tututonu ko Apelu ne fakamatala hagaao ke he tua ha lautolu ki a Iehova. He tau senetenari, ko Noa, Aperahamo, Sara, Mose, Tavita, mo e falu kua fakalataha ke he ‘fakapotopotoaga tokologa’ lahi nei. (Heperu 11:4–12:1) Tuga ni e tagata kua liga fakamooli he fale fakafili ke lata mo e tagata nakai agahala, kua eketaha a mautolu ke fakailoa e kupu mooli hagaao ke he Atua ha mautolu.

Mumuitua a mautolu ki a Iesu. Kua ui he Tohi Tapu a ia “ko e talahau kua fakamoli mo e moli.” (Fakakiteaga 3:14) Pehē a Iesu kua ‘fakakite atu e ia e higoa he Atua’ mo e fakatumau ke ‘talahau e kupu moli’ hagaao ke he Atua. (Ioane 17:26; 18:37) Kua lata mogoia he tau tutaki mooli he Keriso ke uta e higoa a Iehova mo e fakailoa ai. Ko e mena anei kua eketaha e Tau Fakamoli a Iehova ke taute.

• Ko e ha kua hiki he Tau Tagata Fakaako Tohi Tapu e higoa Tau Fakamoli a Iehova?

• Fiha e leva kua fai fakamoli a Iehova he lalolagi?

• Ko hai e Fakamoli kua mua ue atu ha Iehova?

Ne talahau tuai he Tohi Tapu he mole e mate ha Keriso, to tutupu mai e tau faiaoga pikopiko he vahāloto he tau Kerisiano fakamua atu mo e fakakeukeu e kupu mooli he Tohi Tapu. (Gahua 20:29, 30) Ti ko e mena tonu ia ni ne tupu. Ne fio e lautolu e tau fakaakoaga ha Iehova mo e tau manatu fakalotu pouliuli, ti tupu lahi e tau puhala fakatupua faka-Kerisiano. (2 Timoteo 4:3, 4) Maeke fēfē a mautolu mogonei ke iloa tonu kua moua e mautolu e maamaaga hako ke he mena ne fakaako mooli he Tohi Tapu?

Hoko mai e magaaho ma Iehova ke fakakite e kupu mooli. Ne talahau tuai e ia ‘ke he vaha ke fakahiku ai; to tupu lahi ai foki e mahani iloilo.’ (Tanielu 12:4) He 1870, ko e matakau tote ha lautolu ne kumikumi ke he kupu mooli ne mailoga kua loga e tau fakaakoaga he tau lotu ne nakai mai he Tohi Tapu. Ko e mena ia, kua kamata a lautolu ke kumikumi e maamaaga he tau fakaakoaga fakamua he Tohi Tapu, ti fakamonuina e Iehova a lautolu aki e iloilo fakaagaaga.

Kumikumi fakamakutu he tau tagata taane fakamooli e Tohi Tapu. Ko e Tau Tagata Fakaako he Tohi Tapu ne fakamakutu, ko lautolu haia ne fakamua ia mautolu ne kumi e puhala fakaako kua aoga agaia ki a mautolu mogonei. Ne fakatutala a lautolu ke he tau matakupu takitaha he Tohi Tapu. Ka felauaki a lautolu mo e tau vala he Tohi Tapu ne uka ke maama, kua kumi e lautolu falu kupu tohi foki ke fakamaama aki. He hoko a lautolu ke he fakahikuaga kua lagotatai mo e vala ne toe he tau Tohiaga Tapu, ne tohi hifo e lautolu. He fakaatā e Tohi Tapu ke fakamaama ai, kua liu moua e lautolu e kupu mooli hagaao ke he higoa he Atua mo e Kautu, haana finagalo ma e tau tagata mo e lalolagi, ko e tuaga he tau tagata mamate, mo e amaamanakiaga he liu tu mai. Ko e kumikumi ha lautolu kua fakatoka noa mai a lautolu he loga e tau taofiaga mo e tau gahua fakavai.​—Ioane 8:31, 32.

He 1879 ko e Tau Tagata Fakaako he Tohi Tapu ne mailoga ko e magaaho kua hoko mai ke fakailoa fakalaulahi atu e kupu mooli. Ti ko e tau ia, ne kamata a lautolu ke taute e mekasini ne taute fakailoa agaia mogonei, The Watchtower Announcing Jehovah’s Kingdom. Kua fakailoa atu e mautolu mogonei e tau kupu mooli he Tohi Tapu ke he tau tagata he 240 e motu mo e molea e 750 e vagahau. Nakaila tupu lahi pihia e iloilo mooli ia!

• Mole e mate he Keriso, ko e heigoa ne tupu ke he kupu mooli he Tohi Tapu?

• Ko e heigoa ne fakamalolō ki a tautolu ke liu moua e kupu mooli mai he Kupu he Atua?

He tau hogofulu tau, ne fakaaoga, lolomi, mo e tufatufa he Tau Fakamoli a Iehova e tau fufuta kehekehe he Tohi Tapu. Ka e kitia e mautolu kua lata ke taute e liliuaga foou kua mitaki ke lagomatai e tau tagata ke fakaako e “maama [tonu] ke he kupu moli,” ko e finagalo he Atua ma e tau tagata oti. (1 Timoteo 2:3, 4) Ti ko e 1950, ne kamata a mautolu ke fakatoka mai e tau vala he ha mautolu a Tohi Tapu vagahau foou, ko e New World Translation. Ne fakaliliu fakamooli mo e hakotika e Tohi Tapu nei ke molea e 130 e vagahau.

Lata ke moua e Tohi Tapu kua mukamuka ke maama. Hiki e tau vagahau he tau magaaho, ti loga e fakaliliuaga kua ha ha i ai e tau talahauaga halahū po ke tuai ne uka ke maama. Ko e tau tohiaga tuai ne hakotika lahi mo e tata lahi ke he tau tohi fakamua ne moua, ti ha ha i ai e maamaaga mitaki he Tohi Tapu Heperu, Aramaika, mo e Heleni.

Lata ke moua e fakaliliuaga ne fakavē ke he kupu he Atua. He nakai tonuhia ai ke hikihiki e tau tohiaga omoomoi he Atua, ko e tau tagata fakaliliu he Tohi Tapu kua lata ke fakamooli ke he tohiaga fakamua. Ka e he laulahi he tau liliuaga, ko e higoa tapu ko Iehova ne nakai fakaaoga i loto he tau Tohiaga Tapu.

Lata ke moua e Tohi Tapu ne fakaheke e Punaaga. (2 Samuela 23:2) He New World Translation, ko e higoa Iehova ne fakamau ai kavi ke he laga 7,000 he tau tohiaga he Tohi Tapu tuai tuga he fakatātā he fakataiaga i lalo. (Salamo 83:18) Ko e fua he tau tau he kumikumi fakamakutu, kua fiafia ai ke he Tohi Tapu nei ke totou ha kua maama maaliali ai e manamanatuaga he Atua. He fai po ke nakai fai New World Translation a koe he vagahau haau, kua fakamalolō e mautolu a koe ke moua e fakaholoaga mitaki he totou e Kupu a Iehova he tau aho takitaha.​—Iosua 1:8; Salamo 1:2, 3.

• Ko e ha kua fifili a mautolu kua lata ke moua e fakaliliuaga foou he Tohi Tapu?

• Ko e heigoa e aga he tau aho takitaha kua mitaki ma e ha tagata kua manako ke fakaako e finagalo he Atua?