Tokologa e tagata ne nakai liliu fakalataha ke he tau lauga fakalotu ha kua nakai moua e lautolu ha takitakiaga po ke mafanatia fakaagaaga. Ko e ha mogoia ne lata ia koe ke fano ke he tau feleveiaaga Kerisiano ne fakatoka he Tau Fakamoli a Iehova? Ko e heigoa ka moua e koe i ai?

Ko e fiafia he fakalataha mo e tau tagata fakaalofa mo e leveki. He senetenari fakamua, ko e tau Kerisiano ne fakatoka ke he tau fakapotopotoaga, ti taute e lautolu e tau feleveiaaga ke tapuaki ke he Atua, ke fakaako e tau Tohiaga Tapu, mo e ke fefakamafanaaki. (Heperu 10:24, 25) He fakapotopoto ke he takatakaiaga fakaalofa, ne logona e lautolu kua ha ha i ai a lautolu mo e tau kapitiga mooli​—ko e tau matakainaga fakaagaaga ha lautolu. (2 Tesalonia 1:3; 3 Ioane 14) Mumuitua e mautolu e puhala taha ia mo e moua e fiafia pihia.

Ko e aoga he fakaako ke fakagahua e tau matapatu fakaakoaga he Tohi Tapu. Tuga ni he tau vahā Tohi Tapu, kua fakapotopoto auloa e tau tagata taane, tau fifine, mo e tau fanau. Fakaaoga he tau faiaoga kua latatonu e Tohi Tapu ke lagomatai a mautolu ke maama e puhala ke fakaaoga ai e tau matapatu fakaakoaga ke he tau momoui ha mautolu he tau aho takitaha. (Teutaronome 31:12; Nehemia 8:8) Maeke ke fai vala oti a mautolu ke he tau fakatutalaaga auloa mo e lologo, he fakaatā a mautolu ke fakakite e amaamanakiaga Kerisiano ha mautolu.​—Heperu 10:23.

Ko e monuina ke he tua haau ha ko e fakamalolō he Atua. Ko e aposetolo ko Paulo ne tala age ke he tau fakapotopotoaga he vahā haana: “Kua manako lahi au ke feleveia mo mutolu, . . . kia fefakamafanaaki a tautolu ke he tua ha tautolu, ko mutolu katoa mo au.” (Roma 1:11, 12) He tau feleveiaaga, ko e matutaki tumau ha mautolu mo e tau matakainaga fakaagaaga kua fakamalolō e tua ha mautolu mo e fifiliaga ke momoui faka-Kerisiano.

He ha he talia e uiina nei ke o atu ke he feleveiaaga kahau ha mautolu mo e kitia mata e tau mena nei? To fakafeleveia mafanatia atu ki a koe. Nakai totogi e tau feleveiaaga​—ti nakai tuku tupe foki.

• Fakavē ke he heigoa e tau feleveiaaga fakapotopotoaga ha mautolu?

• Maeke fēfē a mautolu ke aoga he o atu ke he tau feleveiaaga Kerisiano?

Kaeke ke ō hui a mautolu he vaouhi po ke totoko e matagi malolō lahi, kua fakalataha tumau a mautolu ke he tau feleveiaaga Kerisiano. Pete ne tau paleko he moui mo e mategūgū he oti e gahua he aho, ko e ha e Tau Fakamoli a Iehova ne eketaha pihia ke feoaki mo e tau matakainaga fakaagaaga?

Mitaki ai ma e tau momoui ha mautolu. ‘Manatu e taha ke he taha,’ he tohi e Paulo, he vagahau hagaao ki a lautolu kua feoaki mo mautolu he fakapotopotoaga. (Heperu 10:24) Ko e talahauaga nei kua kakano ke “manamanatu fakahokulo,” pehē mena ia, ke iloa mitaki e taha mo e taha. Ti ko e tau kupu he aposetolo kua fakamalolō a mautolu ke manamanatu ke he falu. Ke iloa falu magafaoa Kerisiano, kua moua e mautolu e falu ia lautolu ne kautū ke he tau paleko ne tuga ha mautolu ti ko e mena ia kua maeke ia lautolu ke lagomatai a mautolu ke kautū foki.

Atihake ai ke tumau e tau tuaga kapitiga. He tau feleveiaaga ha mautolu, kua fakapotopoto a mautolu, nakai ke femahaniaki noa ni, ka ko e matakau he tau kapitiga tata. He falu magaaho, kua fakalataha auloa a mautolu ke he fakafiafiaaga atihake. Ko e heigoa e lauiaaga aoga kua moua he feoakiaga pihia? Kua fakaako a mautolu ke loto fakaaue lahi ke he taha mo e taha, ti fakamalolō he mena ia e tau pipiaga ha mautolu he fakaalofa. Ti, ka fehagai e tau kapitiga ha mautolu mo e tau lekua, kua mautali a mautolu ke lagomatai a lautolu ha kua malolō e fakafehagaiaga he tuaga kapitiga. (Tau Fakatai 17:17) He feoaki mo e tau tagata oti he fakapotopotoaga ha mautolu, kua fakakite e mautolu kua ‘feleoleoaki ke he taha mo e taha.’​—1 Korinito 12:25, 26.

Kua fakamalolō e mautolu a koe ke fifili ma haau e tau kapitiga kua taute e finagalo he Atua. To moua e koe e tau kapitiga pihia ke he Tau Fakamoli a Iehova. Fakamolemole ua fakaatā ha mena ke taofi a koe mai he feoaki mo mautolu.

• Ko e ha kua aoga lahi ma mautolu ke feoaki auloa ke he tau feleveiaaga?

• Magaaho fe ka manako a koe ke iloa e fakapotopotoaga ha mautolu?

Ko e tau feleveiaaga Kerisiano fakamua ne fakamatapatu ke he tau lologo, tau liogi, mo e totou mo e fakatutala ke he tau Tohiaga Tapu​—kua atāina katoa mai he tau faiagahau. (1 Korinito 14:26) Maeke foki a koe ke amanaki pihia ke he tau feleveiaaga ha mautolu.

Kua fakavē ke he Tohi Tapu mo e aoga e tau fakaakoaga. He matahiku faahi tapu, igatia e fakapotopotoaga mo e feleveia ke logona e lauga Tohi Tapu ne 30 e minuti ke he puhala kua matutaki e tau Tohiaga Tapu ke he tau momoui ha mautolu mo e tau magaaho kua nonofo ai a mautolu. Kua fakamalolō ki a mautolu oti ke mumuitua ke he tau Tohi Tapu ni ha mautolu. He mole e lauga, ha ha i ai e Fakaakoaga “Kolo Toko” ne taha e tulā, ti fakaatā ke he tau tagata takitaha he fakapotopotoaga ke fai vala he fakatutalaaga he vala tala mai he fufuta ma e fakaakoaga he Ko e Kolo Toko. Lagomatai he fakatutalaaga nei a mautolu ke fakagahua e takitakiaga he Tohi Tapu ke he tau momoui ha mautolu. Ko e vala tala taha ia ne fakaako he tau fakapotopotoaga takitaha ha mautolu ne molea e 110,000 he lalolagi katoa.

Lagomatai ki a mautolu ke holo ki mua e tau puhala fakaako ha mautolu. Kua fakapotopoto auloa a mautolu he afiafi he faahi tapu ma e fakaholoaga ne tolu e vala ne mataulu Moui Kerisiano mo e Fekafekauaga ne fakavē ke he vala ne foaki he Tohi Fakaaoga he Feleveiaaga he Moui mo e Fekafekauaga he mahina. Ko e vala fakamua he feleveiaaga nei, Tau Tanakiaga he Kupu he Atua, ne lagomatai a tautolu ke iloa e vala tala he Tohi Tapu ne kua fitā he totou he fakapotopotoaga. Matutaki atu, ko e Fakaaoga e Koe ke he Gahua he Fonua kua putoia e tau fakatātāaga he fakatutala e Tohi Tapu mo e falu. Kua mataala e tagata fakatonutonu ke lagomatai a mautolu ke fakaholo ki mua e totouaga mo e tau puhala vagahau ha mautolu. (1 Timoteo 4:13) Ko e vala fakahiku, Moui ko e Tau Kerisiano, ne fakatutala ke he fakagahuaaga aoga he tau matapatu fakaakoaga he Tohi Tapu he tau aho takitaha. Putoia ke he mena nei e fakatutalaaga hūhū mo e tali ne fakahokulo e maamaaga ha mautolu ke he Tohi Tapu.

Ka fakalataha a koe ke he tau feleveiaaga ha mautolu, to nava mooli a koe ha ko e tuaga he fakaakoaga he Tohi Tapu kua moua e koe.​—Isaia 54:13.

• Ko e heigoa haau kua amanaki ke logona he tau feleveiaaga he Tau Fakamoli a Iehova?

• Ko e tau feleveiaaga fe he faahi tapu ha mautolu kua manako a koe ke hau he mogo i mua?

Kua mailoga nakai e koe he tau fakatino he porosua nei e puhala tauteute mitaki he Tau Fakamoli a Iehova he ō ke he ha lautolu a tau feleveiaaga he fakapotopotoaga? Ko e ha kua mataala a mautolu ke he tau tapulu mo e tau tauteuteaga ha mautolu?

Ke fakakite e fakalilifu ke he ha mautolu a Atua. Mooli kua nakai onoono a Iehova ke he tau foliga ha mautolu. (1 Samuela 16:7) Pete ia, ka fakapotopoto a mautolu ke tapuaki ki a ia, ko e manako mai he tau loto ha mautolu ke fakakite e fakalilifu ki a ia mo e tau matakainaga tapuaki ha mautolu. Ka tutū a tautolu ki mua he iki fakafili he hopoaga, kua liga mataala a mautolu ke he tauteuteaga ha mautolu he fakalilifu ke he tuaga haana. Pihia foki, ko e puhala ka kitia a mautolu he tau feleveiaaga kua fakakite e fakalilifuaga ha mautolu ma e ‘Fakafili he lalolagi oti’ ko Iehova ko e Atua, mo e matakavi ne tapuaki a mautolu ki a ia.​—Kenese 18:25.

Ke fakaata e tau mahani kua momoui ki ai a mautolu. Kua fakamalolō he Tohi Tapu e tau Kerisiano ke tauteute “mo e maimaina mo e mahani fakalatalata.” (1 Timoteo 2:9, 10) He tauteute “mo e mahani fakalatalata” kua kakano ke kalo kehe mai he tau mena tui ne liga hagaaki ki a tautolu he fia kitia, fakataki, po ke fakaaliali. He moua foki e “mahani fakalatalata” kua lagomatai a mautolu ke fifili e tau mena tui kua gali ne nakai fulufagu po ke molea lahi. Ko e tau matapatu fakaakoaga nei kua fakaatā agaia ke he loga lahi he tau fifiliaga fakatagata. He nakai talahau ha mena, ko e tauteuteaga lilifu mo e mitaki ha mautolu kua ‘fakalilifu ai e tau kupu he ha mautolu a Fakamoui’ mo e ‘fakaheke ke he Atua.’ (Tito 2:10; 1 Peteru 2:12) He tauteute ke lata mo e tau feleveiaaga, kua fakaohooho e mautolu e puhala kua onoono e falu ke he tapuakiaga ha Iehova.

Ua fakaatā e puhala tauteute haau ke taofi a koe he fina atu ke he Fale he Kautu. Kua nakai lata e tau mena tui ha mautolu ke tauuka po ke fuluola ke gali, meā, mo e lilifu.

• Aoga fēfē e puhala tauteute ha mautolu ka tapuaki ke he Atua?

• Ko e heigoa e tau matapatu fakaakoaga kua takitaki e tau fifiliaga ha mautolu he tau tapulu mo e tauteuteaga?

Ka fakaako Tohi Tapu a koe mo e taha he Tau Fakamoli a Iehova, liga to lali a koe ke kitekite tuai e vala tala he tau fakaakoaga takitaha. Ke moua e aoga lahi mahaki, kua mitaki ke taute pihia foki ato fano ke he feleveiaaga he fakapotopotoaga. Ko e tau fua mitaki lahi mahaki kua moua ka fakatū e mautolu e fakaholoaga mitaki.

Fifili e magaaho mo e matakavi ke fakaako ai. Magaaho fe ka manamanatu mitaki lahi a koe? Ko e mogo pogipogi kī kia to kamata e gahua haau he aho po ke mogo afiafi pouli ka momohe e fanau? Pete foki ka nakai leva e fakaako haau, fifili ko e lahi fēfē e magaaho ka fakaaoga e koe, ti ua fakaatā ha mena ke fakalavelave aki. Kumi e matakavi ogoogonoa, ti tamate oti e tau mena fakatauhele ko e letiō, televisoni, mo e selafoni. He liogi ato fakaako a koe ka lagomatai ke tuku kehe e tau tupetupe he aho ke maeke a koe ke hagaaki ke he Kupu he Atua.​—Filipi 4:6, 7.

Fakamaimailoga e tohi, mo e mautauteute ke fai vala. Kamata he maeke ke maama katoa e matakupu. Manamanatu ke he mataulu he vala tala po ke veveheaga, manamanatu ke he matutakiaga he tau vala mataulu takitaha mo e matakupu ia, ti kumikumi ke he tau fakatino mo e tau hūhū fakatutala ne fakamaama e tau matapatu manatu. Totou e tau paratafa takitaha, ti kumi e tau tali ke he hūhū ne tohi. Kumi mo e totou e tau kupu Tohi Tapu i ai, mo e manamanatu ke he puhala kua lalago e vala tala. (Gahua 17:11) Ka maeke a koe ke tali e hūhū, vate po ke fakamailoga e tau matapatu kupu po ke tau talahauaga he paratafa ka liu manatu e koe e tali. Ke he feleveiaaga, maeke a koe ke tuku hake e lima haau ka manako a koe mo e tali fakakū ke he tau kupu ni haau.

He kumikumi e tau matapatu tala kehekehe kua fakatutala he tau faahi tapu takitaha he tau feleveiaaga, to lafi atu e koe e tau manatu foou haau ke he “fale koloa” he iloilo he Tohi Tapu.​—Mataio 13:51, 52.

• Ko e heigoa e fakaholoaga ka fakatū e koe ke mautauteute ma e tau feleveiaaga?

• Maeke fēfē a koe ke mautauteute ke tali he feleveiaaga?

Tali mai he vahā i tuai, manako a Iehova ke he tau magafaoa takitaha ke fai magaaho auloa, fakamalolō e tuaga fakaagaaga ha lautolu mo e atihake e magafaoa ha lautolu. (Teutaronome 6:6, 7) Ko e mena haia ne fakatoka kehe he Tau Fakamoli a Iehova e magaaho he tau faahi tapu takitaha ma e magafaoa ke tapuaki auloa​—fakatutala e tau mena fakaagaaga he takatakaiaga totoka mitaki kua hikihiki ke lata mo e tau manako ha lautolu. Pete ka nofo tokotaha a koe, ko e magaaho pihia ka fakaaoga fakamitaki mo e Atua he taute e fakaako Tohi Tapu ne fifili e koe.

Ko e magaaho ia ke fakatata lahi ki a Iehova. “Kia fakatata atu . . . ke he Atua, ti fakatata mai ai a ia kia mutolu.” (Iakopo 4:8) Maeke ke iloa mitaki e mautolu a Iehova ka fakaako e mautolu e tau vala takitaha ke he aga mo e tau gahua haana puhala he tau lau he Kupu tohia haana. Ko e puhala mukamuka ke kamata haau a tapuakiaga magafaoa ko e fakaaoga falu magaaho ke totou auloa fakaleolahi e Tohi Tapu, liga he muitua e fakaholoaga he faahi tapu ma e Feleveiaaga he Moui mo e Fekafekauaga. Ko e vala he totouaga ka kotofa ke he tau tagata takitaha he magafaoa, ti maeke ke fakatutala auloa ke he mena ne fakaako mai he tau Tohiaga Tapu.

Ko e magaaho haia ke fakatata lahi ke he tau tagata he magafaoa. Ko e tau taane mo e tau hoana, ti pihia mo e tau matua mo e tau fanau, kua fefakamalolōaki e tau pipiaga ha lautolu ka fakaako fakamagafaoa e Tohi Tapu. Kua lata ke eke mo magaaho fiafia mo e mafola ti ko e vala uho he faahi tapu. Fakavē ke he tau tau moui he ha laua a tau tama, maeke he tau matua ke fifili e tau mataulu tala aoga ke fakatutala, liga fakaaoga e tau vala he Ko e Kolo Toko mo e Awake! po ke mai he ha mautolu a faahi kupega hila, jw.org. Maeke a koe ke tutala hagaao ke he lekua ne fehagai mo e tau tama ha mua he aoga mo e puhala ke fakafehagai ai. He ha he kitekite e polokalama ne fakapuloa he JW Broadcasting (tv.jw.org) ti fakatutala auloa ai he mogo fakamui? Liga fiafia a koe he fakamahani e tau lologo ka uhu he tau feleveiaaga ti kai māmā ka oti e tapuakiaga magafaoa.

Ko e magaaho uho anei ne fakaaoga he tau faahi tapu takitaha he tapuaki auloa ki a Iehova ka lagomatai e tau tagata oti he magafaoa ke moua e fiafia lahi he Kupu he Atua, mo e to fakamonuina fakalahi e ia e tau laliaga haau.​—Salamo 1:1-3.

• Ko e ha kua tuku kehe e mautolu e magaaho ma e tapuakiaga magafaoa?

• Maeke fēfē e tau matua ke taute e magaaho nei ke fiafia ma e tau tagata oti he magafaoa?

Ko e ha e tau fofoga he tau tagata nei kua fiafia lahi? Kua ō a lautolu ke he taha he tau toloaga ha mautolu. Tuga e tau fekafekau he Atua i tuai, ne fakaako ki a lautolu ke fakapotopoto lagatolu he tau, kua amanaki lahi a mautolu ke feleveia auloa he tau matakau lalahi. (Teutaronome 16:16) He tau tau takitaha, tolu e fakaholoaga ha mautolu: ua e toloaga takaiaga ne takitaha e aho, mo e fonoaga he faahimotu ne tolu e aho. Aoga fēfē a mautolu mai he tau fakalatahaaga nei?

Fakamalolō ai e tau matakainaga Kerisiano ha mautolu. Tuga ni he fiafia e tau Isaraela he fakaheke a Iehova “ki mua he fakapotopotoaga,” po ke toloaga kua fiafia foki a mautolu he tapuaki auloa ki a ia he tau magaaho pauaki. (Salamo 26:12; 111:1) Kua fakatū he tau fakalatahaaga nei e magaaho ke feleveia mo e fakalataha mo e Tau Fakamoli mai he falu fakapotopotoaga po ke he falu motu. He tupou laā, kua fiafia e mautolu e kai auloa he matakavi ne fono ai, he lafi ke he takatakaiaga kapitiga he tau magaaho fakaagaaga nei. (Gahua 2:42) I ai kua kitia fakamua e mautolu e fakaalofa ne pipi e “tau matakainaga” ha mautolu he lalolagi.​—1 Peteru 2:17.

Lagomatai ai a mautolu ke holo ki mua fakaagaaga. Ne aoga foki e tau Isaraela he “logona [po ke, maama] ai e lautolu e tau kupu” he tau Tohiaga Tapu ne fakamaama ki a lautolu. (Nehemia 8:8, 12) Loto fakaaue foki a mautolu ke he fakatonuaga he Tohi Tapu kua moua e mautolu he tau toloaga. Igatia e fakaholoaga mo e fakavē ke he matakupu faka-Tohi Tapu. Puhala he tau lauga atihake, tau fufuta lauga, mo e liu fakatātā, kua fakaako e mautolu e puhala ke taute e finagalo he Atua he tau momoui ha mautolu. Mafanatia a mautolu ka logona e mautolu e tau mena tutupu ha lautolu kua kautū he paleko he moui ko e tau Kerisiano he tau vahā uka nei. He tau fonoaga he faahimotu, ko e tau mena tui taute tala kua taute e tala he Tohi Tapu ke moolioli mo e fakaako a mautolu ke he tau fakaakoaga aoga. He tau toloaga takitaha, ko e papatisoaga kua taute ma lautolu kua manako ke fakamailoga e fakatapuaga ha lautolu ke he Atua.

• Ko e ha e tau toloaga ko e tau magaaho fiafia?

• Aoga fēfē a koe he fina atu ke he toloaga?

Nakai leva ato mate a Iesu, ne fakailoa e ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Ka e to fakamooli fēfē e gahua fakamatala nei he lalolagi katoa? He muitua ke he fifitakiaga ha Iesu ne fakatoka he mogo ne nofo a ia he lalolagi.​—Luka 8:1.

Lali a mautolu ke matutaki ke he tau tagata he tau kaina ha lautolu. Ne fakamahani e Iesu e tau tutaki haana ke fakamatala e tala mitaki mai he taha fale ke he taha fale. (Mataio 10:11-13; Gahua 5:42; 20:20) Ko lautolu he senetenari fakamua ne kotofa ki ai e tau matakavi pauaki ke fakamatala. (Mataio 10:5, 6; 2 Korinito 10:13) Pihia foki he vahā nei, ko e gahua fakamatala ha mautolu kua fakatokatoka fakamitaki, ti igatia e fakapotopotoaga mo e matakavi ne kotofa ki ai ke taute. Kua fakamalolō he mena nei a mautolu ke taute e poakiaga ha Iesu ke “fakamatala atu ke he tau tagata, mo e talahau fakatonu atu.”​—Gahua 10:42.

Eketaha a mautolu ke hokotia ke he tau tagata he ha matakavi. Ne fakatoka foki e Iesu e fifitakiaga he fakamatala ke he tau tagata he tau toloaga, tuga ke he mataafaga po ke vaikeli he maaga. (Mareko 4:1; Ioane 4:5-15) Maeke foki a mautolu ke tutala mo e tau tagata hagaao ke he Tohi Tapu ke he ha mena kua maeke ia mautolu​—he tau puhalatū, he tau matakavi gahua, he tau paaka, po ke he telefoni. Kua fakamatala foki a mautolu ke he ha mautolu a tau katofia, tau kapitiga gahua, tau kapitiga he poko aoga, mo e tau magafaoa ka moua e mautolu e magaaho kua latatonu. Ko e tau laliaga auloa nei kua maeke he tau miliona tagata he lalolagi katoa ke logona e tala mitaki he fakamouiaga.​—Salamo 96:2.

Manatu nakai e koe ha tagata kua manako a koe ke tala age ki ai e tala mitaki he Kautu he Atua ti ko e heigoa e kakano he mena ia ma e vahā anoiha ha lautolu? Ua toka e fekau nei he amaamanakiaga ki a koe ni. Tala age fakamafiti ai ki a lautolu ka maeke ia koe!

• Ko e heigoa e “tala mitaki” kua lata ke fakailoa?

• Fifitaki fēfē e Tau Fakamoli a Iehova ke he puhala fakamatala ha Iesu?

Ko e kupu “paionia” ne fa hagaao ki a lautolu kua foafoa e tau matakavi foou mo e hafagi e puhala ma e falu ke mumui. Ko e paionia foki a Iesu, ne fakafano mai ke he lalolagi ke taute e fekafekauaga foaki moui mo e ke hafagi e puhala ke he fakamouiaga. (Mataio 20:28) He vahā nei, ko e tau tutaki haana kua fifitaki a ia he foaki e magaaho lahi ke ‘taute tutaki.’ (Mataio 28:19, 20) Falu ne maeke ke taute e mena ne fakahigoa e mautolu ko e gahua paionia.

Ko e paionia ko e tagata fakamatala tumau. Ko e tau tagata fakailoa oti he tala mitaki e Tau Fakamoli a Iehova. Pete ia, falu ne fakatokatoka e tau momoui ha lautolu ke fekafekau ko e tau paionia tumau, ne fakaaoga 70 e tulā he tau mahina takitaha he gahua fakamatala. He taute e mena nei, tokologa ne fakakaupā e gahua tupe ke gahua vala magaaho. Kua fifili e falu ke fekafekau ko e tau paionia pauaki he tau matakavi kua manako lahi ma e tau tagata fakailoa he Kautu, he foaki 130 e tulā po ke molea atu ke he fekafekauaga he tau mahina takitaha. Ko e tau paionia kua momoui fakalatalata, he mauokafua to foaki e Iehova e tau mena kua lata mo e tau momoui ha lautolu. (Mataio 6:31-33; 1 Timoteo 6:6-8) Ko lautolu kua nakai paionia tumau kua maeke ke fekafekau ko e tau paionia fakakū ka maeke a lautolu, he fakalahi e gahua fakamatala ha lautolu ke he 30 po ke 50 e tulā he mahina.

Ko e paionia ne fakaohooho he fakaalofa ke he Atua mo e tau tagata. Tuga a Iesu, mailoga e mautolu e tuaga manako fakaagaaga kua moua he tokologa he vahā nei. (Mareko 6:34) Ka e ha ha ia mautolu e iloilo ka lagomatai a lautolu he mogo tonu nei, he foaki ki a lautolu e amaamanakiaga mauokafua ma e vahā anoiha. Ko e fakaalofa ke he katofia kua fakalagalaga e paionia ke foaki fakalahi e magaaho mo e malolō haana ke lagomatai fakaagaaga e falu. (Mataio 22:39; 1 Tesalonia 2:8) Ti ko e fua, ko e tua haana kua fakamalolō, ti fakatata lahi atu ke he Atua, ti lahi e fiafia ne moua e ia.​—Gahua 20:35.

• Fakamaama fēfē e koe e paionia?

• Ko e heigoa ne fakalagalaga e falu ke paionia mau?

Ko e fakaakoaga faka-Atua kua leva e eke mo fakamailoga he Tau Fakamoli a Iehova. Ko e aoga pauaki ne taute ma lautolu kua foaki katoa e tau magaaho ha lautolu ke he gahua fakamatala he Kautu ke maeke ia lautolu ke ‘fakakatoatoa ni ha lautolu a feua.’​—2 Timoteo 4:5.

Aoga Fekafekau Paionia. He matahiku he tau fakamua he fekafekauaga mau he paionia tumau, kua hu atu a ia ke he aoga ne ono e aho ka fakahoko he Fale he Kautu ne tata mai. Ko e kakano he aoga ke lagomatai e paionia ke fakatata lahi atu ki a Iehova, ke lauia mitaki lahi e tau vala oti he fekafekauaga mo e matutaki ke he fekafekauaga fakamooli.

Aoga ma e Tau Tagata Fakamatala. Ko e aoga nei ne ua e mahina kua taute ke fakamahani e tau paionia kua leva mo e lotomatala ne makai ke toka e tau kaina ha lautolu ke gahua he ha matakavi kua manako ke he lagomatai ha lautolu. Kua tuga pehē a lautolu, “Ko au hanai, kia fakafano atu e koe au,” he fifitaki ke he Evagelia ne mua ue atu ne fekafekau he lalolagi, ko Iesu Keriso. (Isaia 6:8; Ioane 7:29) Ko e hiki mamao mai mo e kaina kua liga putoia e lata ke hikihiki ke he puhala moui nakai monuina lahi. Ko e aga fakamotu, matagi, mo e tau mena kai to liga kehe mamao mai he tau mena kua fa mahani e tagata ki ai. Liga lata foki ke fakaako e vagahau foou. Lagomatai he aoga nei e tau matakainaga nonofo takitokotaha mo e tau hoa mau, ne taki 23 ke he 65 e tau moui, ke feaki e tau mahani fakaagaaga ke lata mo lautolu he kotofaaga foou mo e tau lotomatala ke lagomatai a lautolu ke fakaaoga fakalahi e Iehova mo e he fakatokatokaaga haana.

Aoga Tohi Tapu a Kiliata he Kolo Toko. He vagahau Heperu, ko e “Kiliata” kua kakano “Tanakiaga Maka mo Fakamooli.” Tali mai he fakatū a Kiliata he 1943, kua molea e 8,000 matakainaga ne kautū mai he aoga nei ti kua fakafano atu ko e tau misionare ke fakamatala “ke he fakaotiaga he [tau kala he] lalolagi,” ne mitaki lahi e fua ne moua. (Gahua 13:47) Magaaho fakamua ne hohoko atu a lautolu nei kua kautū ki Peru, ne nakai fai fakapotopotoaga he motu. Mogonei, kua molea e 1,000 i ai. He kamata e tau misionare ha tautolu ke gahua i Sapanī, ne kavi hogofulu ni e Fakamoli he motu. Mogonei, kua molea e 200,000. Ko e aoga Kiliata ne lima e mahina kua putoia e fakaako fakahokulo he Kupu he Atua. Ko lautolu ne haia he fekafekauaga ko e tau paionia tumau po ke tau misionare he fonua, he tau la ofisa, po ke he gahua takaiaga kua uiina ke he aoga nei ma e fakaakoaga lahi ke lagomatai ke fakalagotatai mo e fakamalolō e gahua he lalolagi katoa.

• Ko e heigoa e kakano he Aoga Fekafekau Paionia?

• Taute ma hai e Aoga ma e Tau Tagata Fakamatala?