Ko e Ha ne Tupu e Kelea Muitui mo e Matematekelea?

Ka lauia e tagata he matematekelea, fa mahani ke hūhū: “Ko e ha ne pihia ai?” Fiafia mooli a tautolu ha kua foaki mai he Tohi Tapu e tau tali ne maama mitaki ke he hūhū ia!

1. Kamata fēfē e Satani e kelea muitui he lalolagi?

Totoko a Satani ko e Tiapolo ke he Atua. Manako a Satani ke pule ke he falu ti fakaohooho e ia e tau matua uluaki ko Atamu mo Eva ke fakalataha mo ia he totokoaga. Taute e Satani e mena nei he fakavai ki a Eva. (Kenese 3:1-5) Fakaohooho e ia a Eva ke manamanatu kua fai mena mitaki ne nakai age e Iehova ki a Eva. Pehē a ia to mua atu e fiafia he tau tagata ka nakai omaoma a lautolu ke he Atua. Talahau e Satani e pikopiko fakamua he tala age ki a Eva to nakai mate a Eva. Ati fakahigoa he Tohi Tapu a Satani “ko e pikopiko a ia, mo e matua he pikopiko.”​—Ioane 8:44.

2. Ko e heigoa ha Atamu mo Eva ne fifili ke taute?

Fakamokoi mooli a Iehova ki a Atamu mo Eva. Pehē a ia kua maeke a laua ke kai mai he tau akau oti kana he kaina ko Etena ka e taha e akau kua nakai fakaatā a laua ke kai. (Kenese 2:15-17) Ka e fifili ni a laua ke kai e fua he akau ia. Ko Eva ne “toto ai e ia ke he fua he akau mo e kai ai.” Fakamui, “ti kai ai foki” e Atamu. (Kenese 3:6) Ne nakai omaoma a laua ke he Atua. Mitaki katoatoa a Atamu mo Eva, ti mukamuka a laua ke taute e mena hako. Ka e nakai omaoma pauaki a laua ke he Atua, ti agahala mo e tiaki e laua e pule Haana. Moua e laua e tau matematekelea loga ha ko e fifiliaga ia.​—Kenese 3:16-19.

3. Lauia fēfē a tautolu ha ko e fifiliaga ha Atamu mo Eva?

Magaaho ne agahala a Atamu mo Eva ne nakai mitaki katoatoa a laua ti fakaholo age e nakai mitaki katoatoa ke he tau fanau oti ha laua. Pehē e Tohi Tapu hagaao ki a Atamu: Ne “hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana.”​—Roma 5:12.

Loga e kakano ti matematekelea a tautolu. Falu magaaho kua matematekelea ai ha ko e tau fifiliaga kelea ne taute e tautolu. Falu magaaho kua matematekelea ai ha ko e tau fifiliaga kelea ne taute he falu tagata. Falu magaaho kua matematekelea ai ha ko e tau mena tutupu fakaofo.​—Totou Fakamatalaaga 9:11.

KUMIKUMI FAKAHOKULO

4. Ko ia ne fakatupu e matematekelea ha tautolu

Tokologa e tagata ne talitonu ko e Atua ne pule ke he lalolagi katoa. Mooli nakai e mena ia? Tā e VITIŌ.

VITIŌ: Ko Hai ne Pule ke he Lalolagi? (1:24)

Totou Iakopo 1:13 mo e 1 Ioane 5:19, ti tutala ke he hūhū nei:

• Ko e Atua kia ne fakatupu e matematekelea mo e kelea muitui?

5. Manamanatu ke he tau mena tutupu ha ko e pule ha Satani

VITIŌ: Ko e Ha ne Fakaatā he Atua e Matematekelea?​—Vitiō Kū (3:07)

Totou Kenese 3:1-6, ti tutala ke he tau hūhū nei:

• Ko e heigoa e pikopiko ne talahau e Satani?​—Kikite e kupu 4 mo e 5.

• Fakamaama fēfē e Satani kua fai mena mitaki a Iehova ne taofi mai he tau tagata?

• Pehē a Satani, lata kia e tau tagata ke Pule a Iehova ki ai ke moua e fiafia?

Totou Fakamatalaaga 8:9, ti tutala ke he hūhū nei:

• He magaaho ne nakai Pule a Iehova ke he lalolagi nei, ko e heigoa ne tupu?

1. A. Atamu mo Eva ne mitaki katoatoa ne nonofo i Parataiso. Ka e fanogonogo a laua ki a Satani ti totoko ki a Iehova

2. E. He mole e totokoaga, ne puke e lalolagi he agahala, matematekelea, mo e mate

3. I. To fakaotioti e Iehova e agahala, matematekelea, mo e mate. To liliu e tau tagata ke mitaki katoatoa ti nonofo i Parataiso

6. Fioia e Iehova e matematekelea ha tautolu

Manamanatu nakai e Atua ke he matematekelea ha tautolu? Kikite ke he tau talahauaga he Patuiki ko Tavita mo e aposetolo ko Peteru. Totou Salamo 31:7 mo e 1 Peteru 5:7, ti tutala ke he hūhū nei:

• Fēfē e logonaaga haau he iloa kua fioia mo e manatu e Iehova e matematekelea ha tautolu?

MANATU KATOA

Ko Satani ko e Tiapolo mo e tau tagata uluaki tokoua ne fakatupu e kelea muitui he lalolagi. Manamanatu lahi a Iehova ke he matematekelea ha tautolu, ti nakai leva to utakehe e ia.

Liu Fakamanatu

• Ko e heigoa e pikopiko ne tala age e Satani ko e Tiapolo ki a Eva?

• Lauia fēfē a tautolu oti ha ko e totoko ha Atamu mo Eva?

• Iloa fēfē e tautolu kua manamanatu a Iehova ke he matematekelea ha tautolu?

KUMI FOKI

Fakaako ke he fakamaamaaga he Tohi Tapu ke he agahala.

“Ko e Heigoa e Agahala?” (Vala tala he kupega hila)

Totou foki ke he matakupu ne talahau e Satani ko e Tiapolo he kaina ko Etena.

“Ko e Ha ne Fakaatā he Atua e Matematekelea?” (Vala tala he Kolo Toko)

Kumikumi e tau tali mafanatia ke he hūhū uka.

“Ko e Ha ne Tupu e Holocaust? Ko e Ha ne Nakai Taofi Ai he Atua?” (Vala tala he kupega hila)

Kitekite ke he taha tagata ne fakaako hagaao ke he matematekelea ne kitia e ia he moui haana.

Nakai Tokotaha Au (5:09)