Magaaho ka Lulululu e Tau Kerisiano Tuga ne Saito
ATO mate a Iesu ne hataki e ia e tau tutaki haana: “Kitiala, kua manako a Satani kia mutolu, ke lulululu a mutolu tuga ne saito.” (Luka 22:31) Ko e heigoa e kakano haana ke he mena ia?
He vahā ha Iesu, ne lahi e magaaho mo e malolō ne fakaaoga ke helehele e tau saito. Fakamua, ne fakaputu he tau tagata helehele e tau kakau saito mai he fonua. Ti, haha ai he fuga lapalapa maō po ke fakaaoga e tau manu gahua fonua he toho i luga e mena ke taholi aki e tau saito ke pakipaki fakavalavala ai. He tauteaga nei, ne mokulu mai e tau saito he tau kakau mo e tau gati. Oti mogoia, ti aku hake he tau tagata gahua fonua e tau mena nei ke he matagi. Ko e tau fua saito, po ke tau saito ne mau, ne mokulu ke he taholiaga saito, ka e puhi he matagi e tau otaota ke he vao. Fakahiku, ne lulululu fakamitaki e tau fua saito ke utakehe ha veve i ai.
Ne hako e tau kupu ha Iesu, ne totoko malolō a Satani ke he tau tutaki ha Iesu he magahala ia, ti kua totoko foki e ia a tautolu he vahā nei. (Efeso 6:11) Mooli, ne nakai fakatupu fakahako e Satani e tau lekua oti ne fehagai mo tautolu he moui. (Fakama. 9:11) Ka e makai agaia a Satani ke fakaaoga e ha puhala haana ke moumou aki e mahani fakamooli ha tautolu. Ma e fakatai, liga kamatamata e ia a tautolu ke muitua ke he puhala moui velevele koloa, ti fifili e fakafiafiaaga matematekelea, po ke ke taute e mahani kelea he feuaki. Liga fakaaoga foki e ia e tau kapitiga aoga po ke he gahuaaga mo e tau magafaoa ne nakai talitonu ke fakaohooho a tautolu ke tutuli katoatoa e tau mena oti kua foaki mai he lalolagi i loto he aoga mo e tau feua. Lafi ki ai, liga fakaaoga e Satani e favale fakahako mai he lali ke moumou e mahani fakamooli ha tautolu ke he Atua. Mooli ai, kua loga e puhala ha Satani kua fakaaoga ke lulululu fakatai aki a tautolu.
Puhala fe ka maeke ia tautolu ke kautū ke he fī malolō nei? Nakai maeke ia tautolu ke taute he malolō ni ha tautolu. Kua mua e malolō ha Satani ki a tautolu; ka e iloa e tautolu kua mua atu e malolō lahi ha Iehova ki a Satani. Kaeke ke mauokafua katoatoa a tautolu ki a Iehova, liogi fakamakai ma e iloilo mo e malolō ke fakauka, mo e falanaki katoatoa ke he takitakiaga haana, to fakamalolō e ia a tautolu ke totoko e tau lagatau ha Satani.—Sala. 25:4, 5.
Ka kamatamata, kua lata a tautolu ke lotomatala ke “mailoga e tau mena mitaki mo e tau mena kelea” ti kalo mai mogoia he fakahehē he tau lagatau ha Satani. (Hepe. 5:13, 14) To lagomatai e Iehova a tautolu ke feaki e lotomatala ia. Ti kua lata mogoia a tautolu ke tapiki ke he puhala hako, pete ko e heigoa ni e mena ka tupu. Ka muitua a tautolu ke he takitakiaga ha Iehova, to lalago katoatoa e ia e fifiliaga malolō ha tautolu ke taute e mena hako.—Efeso 6:10.
To lali a Satani ke lulululu a tautolu tuga ne tau saito. Ka e he malolō ha Iehova, kua maeke ia tautolu ke totoko a ia, he mauokafua e tua. (1 Pete. 5:9) E, kua fakamafana mai he Kupu ha Iehova ki a tautolu: “Kia totoko atu a mutolu ke he tiapolo, ti hola kehe ai a ia ia mutolu.”—Iako. 4:7.