Kia Fakatumau “Hau a Fakaalofa Fakamua”
“Kia taofi mau e tau mena ha ha ia koe.”—FAKAKITE. 3:11.
1, 2. Fēfē e logonaaga haau he magaaho ne talia e koe kua mooli e tau mena ne ako e koe hagaao ki a Iehova?
MANATU nakai e koe e magaaho fakamua ne fakaako a koe hagaao ke he amaamanakiaga homo ue atu ne foaki e Iehova ke he tau tagata ne omaoma? Kaeke kua fai lotu ne fano fakamua a koe ki ai, fēfē e logonaaga haau he magaaho ne fakamaama atu mai he Tohi Tapu e finagalo he Atua po ke magaaho fakamua ne fakamaama atu e tau fakaakoaga ne uka ke maama? Liga mailoga e koe ne kua fakahēhē a koe. Ka kua fiafia a koe mogonei he iloa e kupu mooli! Kaeke kua feaki hake he tau matua Kerisiano a koe, manatu nakai e magaaho ne talia e koe kua mooli e tau mena ne fakaako hagaao ki a Iehova ti fifili ke moui fakatatau ki ai?—Roma 12:2.
2 To tokologa e matakainaga fakaagaaga haau ka talahau ki a koe ne logona e lautolu e olioli lahi, fakatata ki a Iehova, mo e loto fakaaue ha kua futia e ia a lautolu. (Ioane 6:44) Ne omoi he fiafia ha lautolu a lautolu ke fakalataha atu ke he tau gahua faka-Kerisiano. Kua pukeina a lautolu he fiafia ti manako a lautolu ke talahau e tau mena ne logona hifo e lautolu ke he tau tagata oti. Kua tupu nakai ha mena pihia ki a koe?
3. Ko e heigoa e tuaga he fakapotopotoaga Efeso he magaaho ne fakafano e Iesu e fekau ki a lautolu?
3 He hagaao ke he fakapotopotoaga Kerisiano he senetenari fakamua i Efeso, ne vagahau a Iesu ke he “hau a fakaalofa fakamua.” Ne loga e tau mahani mitaki he tau Efeso, ka kua lolelole e fakaalofa fakamua ha lautolu ma Iehova. Ati pehē a Iesu ki a lautolu: “Kua iloa e au hau a tau gahua, mo e hau a gahua lahi, mo e hau a fakauka, kua nakai maeke kia koe ke ha i ai a lautolu kua mahani kelea; kua kamatamata foki a lautolu kua talahau mai ko e tau aposetolo a lautolu, ka e nakai fakai; kua iloa foki e koe ko e tau tagata pikopiko a lautolu. Kua fakauka foki a koe, to ha ia koe e fakamanavalahi, kua gahua fakalahi foki a koe ha ko e haku a higoa, ka e nakai fakalolelole. Ka kua iloa e au taha mena kia koe, ha kua toka e koe hau a fakaalofa fakamua.”—Fakakite. 2:2-4.
4. Ko e ha e fekau ha Iesu ke he tau Efeso kua aoga ke he vahā nei?
4 Kua latatonu lahi e fakatonuaga ha Iesu ke he tau Efeso mo e falu fakapotopotoaga ne hagaao a ia ki ai he tohi ha Fakakiteaga he onoono ke he tau tutūaga ne fai magaaho ne ha ha ai he tau Kerisiano fakauku tali mai he 1914. (Fakakite. 1:10) Ka kua maeke agaia he falu Kerisiano mogonei ke galo e “fakaalofa fakamua” ha lautolu ma Iehova mo e kupu mooli faka-Kerisiano. He mauloto e mena ia, kia kumikumi a tautolu ke he puhala ka maeke ia koe ke taofi mau, liu fakafoou, mo e fakatolomaki e fakaalofa mo e makutu ne logona fakamua e koe ma e Atua mo e kupu mooli he liu mailoga mo e manamanatu hokulo a koe ke he tau mena tutupu ki a koe ni.
Ko e Heigoa Ati Talitonu a Koe ke he Kupu Mooli?
5, 6. (a) Ko e heigoa kua lata he tau Kerisiano takitokotaha ke fakamanatu ki a ia ni? (e) Ko e ha ne talia e koe kua fakaako he Tau Fakamoli a Iehova e kupu mooli? (i) Ko e heigoa ka lagomatai e tagata ke liu fakalagalaga e fakaalofa fakamua ne moua e ia?
5 Ko e tau tagata oti ne tukulele ki a Iehova kua lata ke “kumikumi” ki a ia ni “po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:1, 2) Taha puhala, kua putoia ai e fakaako ke he Tohi Tapu. Ko e mena ne talia he taha tagata ne fakaako he Tau Fakamoli a Iehova e kupu mooli kua liga kehe mai he mena ne talia he taha. Ne liu falu manatu, ne hiki a lautolu he magaaho ne totou e higoa faka-Atua i loto he Tohi Tapu po ke he maama e lautolu e tuaga mooli he tagata mate. (Sala. 83:18; Fakama. 9:5, 10) Ko e mena ne nava lahi he falu ko e fakaalofa ne ha ha he tau tagata ha Iehova. (Ioane 13:34, 35) Ko e falu foki, kua fiafia he maama e kakano ke nakai eke mo tagata po ke vala, he lalolagi. Ne fakahiku e lautolu kua nakai lata e tau Kerisiano ke fakalataha ke he tau taufetoko fakapolitika po ke tau felakutaki he tau motu.—Isaia 2:4; Ioane 6:15; 17:14-16.
6 Ma e tokologa, na ko e tau talahauaga nei mo e falu mena foki ne fakalagā e fakaalofa fakamua ha lautolu ma e Atua. Kia fakaaoga taha magaaho ke liu manamanatu ke he tau mena ne talia ai e koe e kupu mooli. Ko koe ko e tagata tokotaha ne kehe ue atu e tau tutūaga mo e tau mahani, ti ko e matapatu kakano haau ne fakaalofa ai a koe ki a Iehova mo e talitonu ke he tau maveheaga haana ne kua liga kehe mai he falu. Ke tuga a ia, ko e tau kakano pihia kua aoga foki ki a koe he aho nei ke tuga ne fakaako fakamua ai e koe. Kua nakaila hiki e kupu mooli. Ti ko e liu filifilia e tau manatu mo e tau logonaaga ia ka liu fakafoou mo e liu fakalagalaga e fakaalofa fakamua haau ma e kupu mooli.—Totou Salamo 119:151, 152; 143:5.
Fakamalolō Haau a Fakavēaga
7. Ko e ha kua lata ia tautolu ke fakamalolō e fakaalofa fakamua ha tautolu ma e kupu mooli, ti taute fēfē e tautolu?
7 Liga kua loga e tau hikihikiaga ke he moui haau tali mai he taute e koe e tukuleleaga ki a Iehova. Ko e fakaalofa fakamua haau ma e kupu mooli kua aoga lahi, ka e fai magaaho he mole, kua lata ia koe ke fakahokulo e fakaalofa ia ke fehagai mo e tau paleko foou ne kamatamata e tua haau. Pete ia, ne tumau a Iehova ke lalago a koe. (1 Kori. 10:13) Ti, ko e tau mena tutupu ki a koe he tau tau kua mole kua uho foki ki a koe. Ne lagomatai he tau mena ia a koe ke atihake e fakaalofa fakamua ne moua e koe, ti taute foki he tau mena tutupu nei a koe ke kitia mooli e finagalo he Atua, ko e mena mitaki, kua talia mo e fiafia.—Iosua 23:14; Sala. 34:8.
8. Fakakite fēfē e Iehova a ia ki a Mose, mo e o mai fēfē e tau Isaraela ke iloa lahi e Atua?
8 Ke fakatai, kia mailoga e tuaga ne ha ha he tau Isaraela he magaaho ne talahau e Iehova e finagalo haana ke laveaki a lautolu mai he tupaaga i Aikupito. Ne fakakite he Atua a ia ki a Mose, he talahau: “To fakamooli ai au ke he mena ia ti to fakamooli ni au ki ai.” (Esoto 3:7, 8, 13, 14, NW) Kakano he tau kupu ia, to taute e Iehova e tau mena kua lata ke fakatokanoa e tau tagata haana. Ke he tau mena tutupu ne mui mai mo e kua lata ma e tau tutūaga, ne kitia he tau Isaraela a Iehova hane fakatātā e tau faahi kehekehe he mahani haana—ko e Mua Ue Atu, ko e Ikifakafili, ko e Takitaki, ko e Laveaki, ko e Toa, mo e Foaki.—Esoto 12:12; 13:21; 14:24-31; 16:4; Nehe. 9:9-15.
9, 10. Ko e heigoa e tuaga ka lagomatai e taha tagata ke hau ke iloa e Atua, ti ko e ha kua mitaki ke liu manatu e tau mena tutupu pihia?
9 Kua kehe mai e tuaga haau ke he tau Isaraela i tuai. Pete he pihia, liga kua fai mena tupu ki a koe ati talitonu kua fiafia fakatagata e Atua ki a koe, ne atihake ai e tua haau. Liga ne taute e Iehova taha mena ne fakakite ke he taha puhala ni ko ia ko e Foaki, Fakamafana, po ke Faiaoga. (Totou Isaia 30:20e, 21.) Po kua mailoga e koe e tali maali ke he liogi. Ne liga fehagai a koe mo e paleko, ti lagomatai he taha matakainaga Kerisiano a koe. Po ke liga mailoga e koe he fakaakoaga fakatagata haau e tau kupu tohi ne latatonu ni mo koe.
10 Kaeke ke talahau e koe e tau mena tutupu pihia ke he falu tagata, to liga nakai fiafia e tala ia ke he falu ia lautolu. Mooli, kua nakai tutupu fakamana e tau mena ia. Ka kua kakano lahi e tau mena ia ki a koe. E, ne fakamooli a Iehova ke taute taha mena ke lagomatai a koe. Kia liu la manamanatu ke he tau tau ne nofo a koe he kupu mooli. Manatu nakai e koe e tau magaaho loga ne logona e koe e leveki hofihofi ha Iehova ki a koe? Kaeke ke pihia, he liu manatu e tau mena tutupu mo e logonaaga haau ki ai ka liu fakalagalaga e loto haau ke liu moua foki e fakaalofa ma Iehova tuga he magaaho fakamua. Kia tokiofa e tau mena tutupu ia. Manamanatu fakahokulo ki ai. Ko e tau fakamooliaga a ia na kua fiafia fakatagata a Iehova ki a koe, ti nakai fai tagata ka utakehe e mauokafua ia ia koe.
Kumikumi Hifo ki a Koe Ni
11, 12. Kaeke kua lolelole e fakaalofa he Kerisiano ma e kupu mooli, liga ko e ha ne pihia ai, ti ko e heigoa ne fakatonu mai e Iesu?
11 Ka nakai logona e koe e fakaalofa ma e Atua mo e kupu mooli tuga he vahā fakamua, kua nakai tupu e mena nei ha kua hiki a ia. Ne nakai hiki a Iehova. (Mala. 3:6; Iako. 1:17) Ne fiafia a ia ki a koe he vahā ia, ti kua mua ue atu e fiafia haana ki a koe mogonei. Ka e kua ka fai mena ne kua liga hiki he fakafetuiaga haau mo Iehova? Kua pihia kia ha kua logona e koe e pehiaaga, ti lahi e tupetupe ke he moui? Liga he vahā fakamua ne liogi fakamakamaka a koe, fakamakutu ke he tau fakaakoaga, ti fa manamanatu hokulo tumau. Kua makutu lahi kia a koe ke he fekafekauaga mo e fano tumau he tau feleveiaaga he fakapotopotoaga he vahā fakamua ke he mogonei?—2 Kori. 13:5.
12 Liga to nakai mailoga e koe e tau aga pehēnei ia koe, ka e kaeke kua mailoga ai, ko e ha la ne pihia ai? Kua pihia kia ha kua kapaletū ke foaki ma e magafaoa haau, leveki e malolō tino, po ke tau mena pihia, ati pokia ai e manamanatuaga haau ke he mafiti he aho a Iehova hane tata lahi mai? Ne pehē a Iesu ke he tau aposetolo haana: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti. Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai.”—Luka 21:34-36.
13. Ko e heigoa ne fakatai e Iakopo e Kupu he Atua ki ai?
13 Ko e tagata tohia omoomoi he Tohi Tapu ko Iakopo ne tomatoma e tau matakainaga talitonu ke kumikumi fakamooli hifo ki a lautolu ni he fakaaoga e Kupu he Atua. Ne tohia e Iakopo: “Kia eke a mutolu mo tau tagata omaoma ke he kupu, ka e aua neke fanogonogo hokoia ki ai, ke fakahehe ai e mutolu a mutolu. Ka fanogonogo taha ke he kupu ka e nakai oma ki ai, kua lata e tagata ia mo e tagata kua kitekite ke he hana mata ni ke he fakaata. Ha ko e mena kua kitekite atu a ia kia ia, ti fano kehe ai mo e nimo agataha ia ia po ke fefe e mata hana. Ka ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, kua nakai fanogonogo fakanimonimo e tagata ia, ka kua eke e ia e gahua, to monuina [a] ia ke he hana omaoma.”—Iako. 1:22-25.
14, 15. (a) Maeke fēfē he Tohi Tapu ke lagomatai a koe ke fakaholo ki mua e tuaga fakaagaaga haau? (e) Ko e heigoa e tau hūhū kua lata ke manamanatu a koe ki ai?
14 Maeke he tagata ke fakaaoga e fakaata ke kitia kua maopoopo a ia. Ke fakatai ki ai, kaeke ke kitia he tagata taane kua keu e fitiua haana, maeke ia ia ke fakahako. Kaeke ke kitia he fifine kua nakai maopoopo e ulu haana, maeke foki ia ia ke hetu fakamitaki. Tatai ki ai, kua lagomatai he tau Tohiaga Tapu a tautolu ke kumikumi hifo ki a tautolu ni. He fakatatai ne tautolu a tautolu mo e tau mena ne talahau he Tohi Tapu ne kua lata ke taute, kua fakaaoga ai e tautolu e Tohi Tapu ke tuga e fakaata. Ka ko e heigoa e aoga ka ono a tautolu ke he fakaata ka e nakai fakahako e mena ne kitia e tautolu kua keu? Kua pulotu a tautolu kaeke ke taute e tautolu e mena ne kitia i loto he “fakatufono kua katoatoa e mitaki” he Atua, ti ‘taute’ ai. Ka ko lautolu ne mailoga kua lolelole e fakaalofa fakamua ha lautolu ma Iehova mo e kupu mooli kua lata ke manamanatu ke he tau hūhū nei: ‘Ko e heigoa e tau paleko hane fehagai mo au he moui, ti tali fēfē au ki ai? Fēfē la e tali haaku he vahā fakamua? Kua fai mena kia ne hiki?’ Kaeke ke kitia e tau lolelole ha ko e kumikumiaga fakatagata pihia, kia nakai tiaki ai. Kaeke kua lata ke taute e tau hikiaga, kia fakamafiti ā ke taute ai.—Hepe. 12:12, 13.
15 Kua maeke foki he manamanatu hokulo pihia ke lagomatai a koe ke taute e tau foliaga mooli ke holo ki mua fakaagaaga. Ne foaki he aposetolo ko Paulo ke he ekegahua haana ko Timoteo e fakatonuaga omoomoi ke holo ki mua e fekafekauaga haana. Ne fakamafana e Paulo e fuata ko Timoteo: “Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.” Kua lata foki ia tautolu ke manamanatu, he fakaaoga e Kupu he Atua, ke he tau mena kua lata ia tautolu ke taute ke fakamahani ki ai.—1 Timo. 4:15.
16. Ko e heigoa e hagahaga kelea ne kua lata ke mataala a koe ki ai ka kumikumi hifo na koe ki a koe he fakaaoga e tau Tohiaga Tapu?
16 To fakakite he ha kumikumi fakatagata ne taute fakamooli e falu loleloleaga haau. Ti liga taute he mena ia a koe ke fakalolelole, ka kia nakai fakaatā ai ke tupu ki a koe. Ha ko e foliaga he kumikumi fakatagata ke mailoga e faahi ne kua lata ke holo ki mua. Kua manako mooli a Satani ke logona hifo he Kerisiano kua nakai aoga a ia ha kua nakai mitaki katoatoa. Ti kua ha ha ai e tau tala fakavai na vihiatia he Atua e tau laliaga oti ke fekafekau ki a ia. (Iopu 15:15, 16; 22:3) Ko e pikopiko ia ne fakamalolō a Iesu ke totoko ki ai; kua uho lahi a tautolu takitokotaha ke he onoonoaga he Atua. (Totou Mataio 10:29-31.) He mataala ke he tau nakai mitaki katoatoa haau ka taute a koe ke fakatokolalo he lali ke mitaki atu e tau mena ka taute, mo e lagomatai e Iehova. (2 Kori. 12:7-10) Kaeke ke fakakaupā he gagao po ke tau tau motua e tau mena kua maeke ia koe ke taute, kia fakatokatoka e tau foliaga ne kua fahia ke taute, ka e nakai tiaki po ke toka e fakaalofa haau ke lolelole fakahaga.
Loto Fakaaue ke he Tau Mena Loga
17, 18. Ko e heigoa e tau aoga ka moua he fakamalolō e fakaalofa fakamua ne moua e koe?
17 To moua e tau aoga lalahi ka matutaki ke fakamalolō haau a fakavēaga ke he fakaalofa fakamua ne moua e koe. Maeke ia koe ke fakahokulo e iloilo mo e loto fakaaue haau ke he Atua ma e takitakiaga fakaalofa haana. (Totou Tau Fakatai 2:1-9; 3:5, 6.) “To lahi foki e totogi ka taofi [ke he tau fakafiliaga ha Iehova],” he talahau he salamo. “Kua fakamoli e talahau a Iehova, kua fakailoilo a lautolu kua goagoa.” Mua atu, “uhoaki a lautolu kua hakohako ha lautolu a puhala, ko lautolu kua o fano ke he fakatufono a Iehova.”—Sala. 19:7, 11; 119:1.
18 To talia mooli a koe kua loga e tau mena mitaki haau ne lata ke loto fakaaue ki ai. Kua maama e koe e tau kakano ke he tau mena ne tutupu ke he lalolagi. Kua aoga a koe mai he levekiaga mo e foakiaga ne age he Atua ke he tau tagata haana he vahā nei. Nakai fakauaua kua logona foki e koe e loto fakaaue ha kua futiaki mai e Iehova a koe ke he fakapotopotoaga haana he lalolagi katoa mo e foaki ki a koe e lilifu he eke mo taha he Tau Fakamoli haana. Kia totou ā e tau monuina haau! Kaeke ke tohi hifo e koe e tau monuina haau, to liga loga lahi. He taute tumau pihia e koe ka lagomatai mooli a koe ke fakagahua e tomatomaaga: “Kia taofi mau e tau mena ha ha ia koe.”—Fakakite. 3:11.
19. Lafi ke he manamanatu hokulo ke he fakafetuiaga haau mo e Atua, ko e heigoa kua aoga lahi ke fakatumau e malolō fakaagaaga haau?
19 He manamanatu hokulo ke he puhala ne tupu e tua haau he tau tau kua mole, ka eke mo taha lakaaga ke lagomatai a koe ke taofi mau e tau mena ne ha ha ia koe. Kua fa hagaaki lagaloga e senolo nei ke he falu matakupu aoga ke maeke ke fakatumau e malolō fakaagaaga. Ha ha he tau mena ia ko e liogi, fakalataha mo e tali he tau feleveiaaga faka-Kerisiano, mo e fakamakutu ke he gahua he fonua. To lagomatai he tau mena nei a koe ke matutaki ke liu fakafoou, liu fakalagalaga, mo e fakamalolō e fakaalofa fakamua ne moua e koe.—Efeso 5:10; 1 Pete. 3:15; Iuta 20, 21.
To Tali Fēfē e Koe?
• Maeke fēfē he tau manako haau ke fakaalofa ki a Iehova ke eke mo punaaga he fakamalolōaga ki a koe mogonei?
• Ko e heigoa ne fakalagalaga a koe mai he tau tau loga ha ko e tau mena tutupu haau ni?
• Ko e ha kua lata ia koe ke filifilia e fakaalofa haau ma e Atua?
[Fakatino he lau 23]
Ko e heigoa ne futiaki mo e fakaohooho a koe hagaao ke he kupu mooli?
[Fakatino he lau 25]
Kitia nakai e koe ha mena hagaao ki a koe ni ne kua lata ke hiki?