Ka Mate a Ia ne Fakahele
He afiafi Ua ia Iulai 17, 2007, kavi ke he matahola fitu, ne lifa e vakalele mai he hala he malē vakalele ne lavelave lahi mahaki i Parasili, he lotouho a São Paulo. Ne holo e vakalele ke he taha faahi he puhalatū lahi mo e oka he fale toka koloa. Kavi ke he 200 tagata ne mamate he pakia.
KO E fakamaamaaga ke he matematekelea lahi mahaki ke he kautaha vakalele i Parasili to mau tumau ke he tau manamanatuaga ha lautolu ne mamate e tau fakahele. Ko Claudete e taha ha lautolu ia ne logona e galo pihia. Hane kitekite televisoni a ia he magaaho ne logona e tala ke he vakalele ne oka. Ko e tama taane haana, ko Renato, ne haia he vakalele. Ne 26 laia e tau moui haana. Ko e tauteute a ia ke mau e hoana ia Oketopa. Ne lali fakamakamaka a Claudete ke hea ke he selafoni he tama taane, ka kua nakai fai tali. Ne veli a ia ke he foloa ti tagi tautau.
Ne mate e kapitiga ha Antje, ne kua toka mama ke mau, he pakia lahi he motoka ia Ianuari 1986. He logona e ia e tala, ne nonaia a ia. “Ko e mena fakamua haaku ko e nakai talitonu. Ne manatu au ko e miti kelea mo e to amanaki ni au ti ala ke iloa kua nakai mooli ai. Ne vivivivi au ti mamahi lahi e tino ke tuga kua fai tagata ne fakapakia e manava haaku.” Ne matematekelea a Antje ke he fakaatukehe ke tolu e tau i mua. Pete kua 20 e tau he mole e pakia ia, ne vivivivi agaia a ia ka manatu e mena ne tupu.
Nakai maeke he ha kupu ke fakamaama e tau logonaaga momoko ne lauia he ofomate, nakai talitonu, nonaia, mo e fakaatukehe ne tupu mai ha ko e matematekelea pihia, ko e mate fakaofo. Pete he iloa tuai to mate e fakahele, tuga he leva e gagao haana, kua maeke agaia ke maanu lahi mahaki. Nakai fai tagata kua mautali katoatoa ma e mate he fakahele. Ne mate e matua fifine ha Nanci he 2002 he mole e leva e gagao. Ka ko e aho ne mate e matua fifine haana, ne nofo a Nanci he foloa he fale gagao mo e fakaatukehe lahi mahaki. Tuga kua galo tamokimoki e kakano he moui ki a ia. Lima tuai e tau he mole, ka e tagi agaia a ia ka manamanatu ke he matua fifine haana.
Ne nakai galo katoatoa he tau tagata e mate he fakahele, ka e iloa e lautolu ke fehagai ki ai, he talahau e Ekekafo ko Holly G. Prigerson. Kaeke kua galo e fakahele haau he mate, pete he mate fakaofo po ke nakai, liga manamanatu a koe: ‘Kua lata nakai ke maanu? Maeke fēfē ke fehagai ke he galo he fakahele? To liu nakai au ke kitia e fakahele haaku?’ To fakatutala e vala tala ka mui mai ke he tau mena nei mo e falu hūhū ka liga ha ha ia koe.
[Picture Credit Line he lau 3]
EVERTON DE FREITAS/AFP/Getty Images