Tau Hūhū he Tau Tagata Totou

He tohi haana ke he tau Heperu, ne tutala e aposetolo ko Paulo ke he “fakalago he tau lima.” Kua hagaao kia a ia ke he kotofaaga he tau motua po ke taha mena foki?—Hepe. 6:2.

Nakai fai kakano ke manatu malolō, ha kua liga hagaao a Paulo ke he fakalago he tau lima ke tuku age e tau mena fakaalofa he agaaga.

Kua tutala e Tohi Tapu ke he fakalago he tau lima ke felauaki mo e tau kotofaaga fakateokarasi. Ne “fakalago atu e Mose hana tau lima ki luga” ha Iosua he kotofa a ia mo hukui haana. (Teu. 34:9) He fakapotopotoaga Kerisiano, ne kotofa falu patu he fakalago he tau lima. (Gahua 6:6; 1 Timo. 4:14) Ne hataki a Paulo ke nakai alumaki ke fakalago e tau lima ke he taha tagata.—1 Timo. 5:22.

Ka kua fakamalolō e Paulo e tau Kerisiano Heperu ke ‘hohoko atu ke he katoatoaaga’ ha kua toka e lautolu mogonei e “kupu fakamua.” Ne tohi mogoia e ia e “tokihala ke he tau gahua ke mamate ai, mo e tua ke he Atua, ko e tau kupu foki he tau papatisoaga, mo e fakalago he tau lima.” (Hepe. 6:1, 2) Ko e kotofa kia he tau motua kua eke mo mena fakamua ne kua lata e tau Kerisiano ke hohoko atu ki ai? Nakai. Ke eke mo motua he fakapotopotoaga nukua lata e tau matakainaga taane kua motua fakaagaaga ke foli ki ai mo e loto fakaaue ki ai.—1 Timo. 3:1.

Ka kua fai aoga foki e fakalago he tau lima. He senetenari fakamua, ne tiaki e Iehova e tau Isaraela he tino ka e fifili a Isaraela fakaagaaga mo tau tagata haana, ko e fakapotopotoaga he tau Kerisiano fakauku. (Mata. 21:43; Gahua 15:14; Kala. 6:16) Ko e tau mena fakaalofa fakamana he agaaga, tuga e vagahau ke he tau vagahau kehekehe ne kitia ke he hikiaga ia. (1 Kori. 12:4-11) He eke a Konelio mo e magafaoa haana mo tau tagata talitonu, ne moua e lautolu nei ne foou e agaaga tapu, ti kitia ai he “vagahau mai ke he tau vagahau kehekehe.”—Gahua 10:44-46.

He falu magaaho, ne tuku age e tau mena fakaalofa fakamana he fakalago he tau lima. He folafola e Filipo e tala mitaki i Samaria ne kua tokologa ne papatiso. Ne fakafano atu he kau fakatufono e tau aposetolo ko Peteru mo Ioane. Ko e ha? Ne totou e tautolu: “Ati fakalago atu ai ha laua a tau lima kia lautolu [ne papatiso laia], ti moua ai e lautolu e [a]gaga [t]apu.” Kua liga kakano e mena ia kua moua e lautolu e tau mena fakaalofa he agaaga, ne kua kitia ai ke he tau lotomatala. Ne iloa e tautolu e mena nei ha ko Simona, ne eke fakamua e tau lagatau taulaatua, nukua kitia e gahuahuaaga nei he agaaga ti lali lotokai ke age e tau tupe ke maeke ke fakalago haana tau lima ki luga he falu ke maeke ia lautolu ke moua e agaaga tapu ke gahua fakamana. (Gahua 8:5-20) Fakamui, ne 12 e tagata i Efeso ne papatiso. Ne totou e tautolu: “Kua fakalago foki e Paulo hana tau lima kia lautolu, ti hoko ai e [a]gaga [t]apu kia lautolu; ti vagahau a lautolu ke he tau vagahau kehekehe, mo e perofeta mai.”—Gahua 19:1-7; fakatatai 2 Timoteo 1:6.

Ko e mena ia, kua hagaao a Paulo ia Heperu 6:2 ke he fakalago he tau lima ke tuku atu he tau mena fakaalofa he agaaga ki a lautolu ne tua foou.