Lata Nakai a Koe ke Peehi Haau a Tau Manako Fakatagata?
TOKOUA e tama ikiiki hane fefeua. Ne hamu he taha tama e toi mahuiga haana mai he taha tama ti kaā, “Ko e haaku!” Mai he vahā tote, kua fitā he fakatātā he tau tagata nakai mitaki katoatoa e lotokai. (Kene. 8:21; Roma 3:23) Lafi ai, kua fakatupu ki mua he lalolagi lahi e aga ko au fakamua. Ke kalo mai a tautolu he agaaga nei, kua lata ni ke totoko fakamalolō a tautolu ke he tau hihiga lotokai. Ka nakai taute pihia e tautolu, to liga mukamuka a tautolu ke fakatupetupe e falu mo e fakalolelole e fakafetuiaga ha tautolu mo Iehova.—Roma 7:21-23.
He fakamafana ki a tautolu ke manamanatu kua lauia e falu ha ko e tau gahua ha tautolu, ne tohi he aposetolo ko Paulo: “Kua pule e au ke he tau mena oti ke eke e au, ka e nakai aoga e tau mena oti; kua pule e au ke he tau mena oti ke eke e au, ka e nakai fakamafana he tau mena oti.” Ne pehē foki a Paulo: “Aua neke eke a mutolu mo mena ke fakatupetupe ai.” (1 Kori. 10:23, 32) Ke he tau mena ne putoia e tau manako fakatagata mogoia, ko e puhala pulotu ke hūhū ki a tautolu ni: ‘Kua makai nakai au ke fakatoka kehe falu tonuhia haaku ka liga fakalekua e mafola he fakapotopotoaga? Kua mautali nakai au ke muitua e tau matapatu fakaakoaga he Tohi Tapu, pete ni ka liga uka ki a au?’
He Fifili e Gahua Tupe
Laulahi he tau tagata ne onoono ke he fifiliaga ha lautolu ke he gahua tupe ko e fifiliaga fakatagata ti tote lahi—kaeke kua fai—lauiaaga ke he falu. Ka e manamanatu ke he mena ne tupu ke he taha tagata pisinisi he taone tote i Amerika Toga. Ne talahaua a ia ko e tagata pelē tupe mo e konahia. Ti ko e fua he fakaako e Tohi Tapu mo e Tau Fakamoli a Iehova, ne tupu fakaagaaga a ia ti hiki e puhala moui haana. (2 Kori. 7:1) He magaaho ne talahau kua manako a ia ke taute e gahua fakamatala ke he tau tagata fakalataha mo e fakapotopotoaga, ne fakamafana fakalotomatala he motua a ia ke manamanatu ke he tuaga gahua tupe haana. He fai magaaho, ko e tagata taane nei he taone ko e matapatu ne sela e kava mai he cane—ko e mena ne loga e aoga ka e fakaaoga lahi he matakavi ia ke hui aki e tau inu humelie ti inu pauaki ke konahia.
Ne mailoga he tagata nei kaeke ke fakamatala a ia ke he tau tagata ka e sela agaia e inu nei, to kelea e higoa he fakapotopotoaga ti liga lekua e fakafetuiaga haana mo e Atua. Pete he lahi e magafaoa haana ke leveki, ne oti e sela kava haana. Kua leveki e ia e magafaoa haana mogonei he sela e tau koloa laupepa. Ko e tagata nei, hoana haana, mo e fanau tokoua mai he lima e tama ha laua kua papatiso mogonei. Ne fakamatala fakamakutu e lautolu e tala mitaki mo e vagahau fakatonu atu.
He Fifili e Tau Fioaga
Ko e fakalataha ke he fakafiafiaaga kia mo e tau tagata ne nakai tua fakalataha mo tautolu ko e manako fakatagata, po kua putoia e tau matapatu fakaakoaga he Tohi Tapu? Taha e matakainaga fifine ne manako ke fano ke he fiafiaaga mo e fuata taane ne nakai ko e Kerisiano mooli. Pete he hataki ke he tau hagahaga kelea, ne logona hifo e ia ko e tonuhia haana ke taute pihia ti fano a ia ke he fiafiaaga. Nakai leva e hoko atu haana, ne age e inu ne hui aki e tau tegavai fakamohe ne malolō lahi. Ne ala a ia he fai tulā ne mole ti iloa kua fakapilo pulenoa a ia he tagata ne pehē ko e kapitiga haana.—Fakatatai Kenese 34:2.
Liga nakai fua kelea pihia tumau e lafi mo lautolu ne nakai tatai e tua, ka e hataki he Tohi Tapu: “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.” (Fakatai 13:20) Kua nakai fakauaua ke he mena ia—ko e fifili e tau fioaga kelea ka fakatapakupaku a tautolu ke he tau mena hagahaga kelea! “Kua kitia he tagata lotomatala e kelea, mo e fakamumuli ai a ia,” he talahau he Tau Fakatai 22:3, “ka ko e tau tagata goagoa, kua o age ai a lautolu, ti fakahala ai a lautolu.” Kua maeke e tau fioaga ha tautolu ke lauia a tautolu mo e fakafetuiaga ha tautolu mo e Atua.—1 Kori. 15:33; Iako. 4:4.
He Tau Tapulu mo e Tauteuteaga
Kua hikihiki tumau e tau sitaila mo e tau fasone. Ka kua tumau agaia e tau matapatu fakaakoaga he Tohi Tapu ke he tau mena tui mo e tauteuteaga. Ne fakamalolō e Paulo e tau fifine Kerisiano ke “taute e lautolu a lautolu ke he tau tapulu kua gali, mo e maimaina mo e mahani fakalatalata”—ko e matapatu fakaakoaga kua aoga foki ke he tau tagata taane. (1 Timo. 2:9) Ne nakai tutala a Paulo ke he tau tapulu nakai fulufuluola, ti nakai pehē foki a ia kua lata e tau Kerisiano oti ke tatai e tau manako. Ka e kua e mahani fakalatalata? Taha e tohi fakamaama kupu ne fakamaama e mahani fakalatalata ko e “atāina mai he fakaikaluga po ke fakateaga . . . e puhala mena tui, vagahau, po ke mahani.”
Kua lata ia tautolu ke hūhū hifo: ‘Maeke nakai au ke talahau fakamooli kua mahani fakalatalata au kaeke ke peehi e au e tau tonuhia haaku ke tauteute ke he puhala kua futiaki teao mai ki a au? Kua fakakite kia e au e iloaaga hepe hagaao ki a au po ke tau mahani ne moui fakatatau au ki ai? Maeke ia tautolu ke kalo mai he “nakai tuku atu . . . ha mena ke tupetupe ai” hagaao ke he mena nei he “aua neke takitokotaha mo e manamanatu ke he tau mena [ha tautolu], ka e takitokotaha mo e manamanatu ke he tau mena he falu.”—2 Kori. 6:3; Filipi 2:4.
He Tau Mena Fakapisinisi
He tutupu e tau lekua lalahi hagaao ke he tau fehagaiaga hehē po ke fofō i loto he fakapotopotoaga i Korinito, ne tohi e Paulo: “Ka e nakai kia fakauka he ha a mutolu ke he mahani kelea? Ka e nakai kia fakauka he ha ke he fofoaga he tau mena ha mutolu?” Ne fakatonu e Paulo e tau Kerisiano ke makai ke foaki taha mena ka e nakai uta e matakainaga ke he fakafiliaga. (1 Kori. 6:1-7) Taha e matakainaga taane he Tau Faahi Kaufakalataha ne omaoma ke he fakatonuaga nei. Ne fekehekeheaki e manatu haana mo e Kerisiano ne takitaki e gahua hagaao ke he tau totogi ne lata a ia ke moua. He muitua ke he tau takitakiaga faka-Tohi Tapu, ne lagaloga e fono tokoua e tau matakainaga ka e nakai moua ha tali ke he lekua. Fakahiku, ne uta e laua e lekua “ke he [“fakapotopotoaga,” NW],” ne hukui he tau motua Kerisiano.—Mata. 18:15-17.
Momoko ai, ne nakaila maeke ia ke fakamafola e lekua. Mole e lagaloga e liogi, ne fifili e tagata gahua ke mole noa e laulahi he tupe ia ne manatu a ia kua nakaila totogi age. Ko e ha? Ne talahau e ia he magaaho fakamui, “Ko e fekehekeheaki nei kua fofō e olioli haaku ti moumou e tau magaaho aoga haaku ne kua lata ke fakaaoga ke taute e tau matagahua fakaagaaga haaku.” He mole e taute e fifiliaga ia, ne logona he matakainaga kua liu a ia olioli foki, ti logona e ia e monuina ha Iehova ke he fekafekauaga haana.
Ke he Tau Mena Ikiiki Foki
He nakai peehi ni ha tautolu a tau manako fakatagata kua tamai foki e tau monuina ke he tau mena ikiiki. Ko e aho fakamua he fonoaga he faahimotu, ne hohoko atu tuai e hoa paionia mo e moua e tau nofoa ne manako pauaki a laua ki ai. He kamata e polokalama, ne o mai fakatepetepe e magafaoa lahi mo e tau fanau ke he toloaga kua apiapi. Ne mailoga kua kumi e magafaoa ke he taha nofoaga ke nonofo auloa ai, ne age he hoa paionia e tau nofoa ua ha laua. Kua taute he mena nei e magafaoa katoa ke nonofo auloa. Fai aho he mole e fonoaga, ne moua he tau paionia e tohi fakaaue mai he magafaoa. Kua fakamaama he tohi ne fakalolelole lahi a lautolu ha kua mule he hohoko ke he fonoaga. Ko e logonaaga ia ne hiki vave ke he olioli mo e loto fakaaue ha ko e totonu he hoa paionia.
Ka feleveia a tautolu mo e tuaga pihia, kia fakamakai a tautolu ke tuku kehe e tau manako ha tautolu ke lata ma e falu. He fakakite e fakaalofa ne “nakai kumi e ia hana tau mena,” kua lagomatai a tautolu ke fakatumau e mafola i loto he fakapotopotoaga mo e tau katofia ha tautolu. (1 Kori. 13:5) Ka e mua atu e aoga, kua fakatumau e tautolu e tuaga kapitiga mo Iehova.
[Fakatino he lau 20]
Makai nakai a koe ke tuku kehe e tau manako fakatagata he fifiliaga haau ke he fasone?
[Fakatino he lau 21]
Makai nakai a koe ke age e nofoa haau ma e tau matakainaga haau?