Manatu Nakai e Koe?

Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke tali e tau hūhū i lalo:

• Ko e ha kua aoga lahi ke fakatumau a tautolu ke he ha tautolu a mahani fakamooli Kerisiano?

He fakatumau e mahani fakamooli ha tautolu kua maeke ai ke lalago ke he pule katoatoa ha Iehova mai he fakaalofa mo e ke fakakite ko Satani ko e pikopiko. Kua foaki foki he mahani fakamooli ha tautolu e fakavēaga kua maeke e Atua ke fakafili a tautolu, ko e mena ia, kua latatonu ai ke he amaamanakiaga ha tautolu ma e vahā anoiha.—12/15, lau 4-6.

• Ko e heigoa falu mataulu ne fakaata e matagahua ha Iesu he finagalo he Atua?

Ko e Tama fuataha. Ko e Kupu. Ko e Amene. Ko e Hulalo he maveheaga foou. Ko e Ekepoa ne Mua. Ko e Tega ne mavehe mai.—12/15, lau 15.

• Maeke fēfē ia tautolu ke muitua e fakafifitakiaga a Maria he taofi e “tau kupu oti ia mo e manamanatu ki ai ke he hana loto”?

Kua latatonu ia tautolu ke onoono ke he Tohi Tapu ko e Kupu omoomoi he Atua ti totou tumau ki ai. Ti kua lata ke tanaki e tau kupu fakaagaaga he tau loto ha tautolu, he manamanatu ki ai. Ka manamanatu fakahokulo a tautolu ke he mena ne totou ke he Tohi Tapu, manamanatu ke he tau puhala ke fakaaoga katoatoa ai e fakatonuaga a Iehova, ati foaki ai ke he tua ha tautolu e huhua kua lata ke tupuaki ai.—1/1, lau 12-15.

• Ko e heigoa falu kei ke fakamalolō aki e maveheaga he fakamauaga?

Ua ko e: (1) Tuku fakamua e fakamauaga haau. (2) Kalo he tau puhala oti ne nakai fakamooli. He mauokafua po ke muhu lekua e fakamauaga haau, kua lata e hoa haau ke iloa kua fakamooli a koe ke taute e fakamauaga ha mua ke kautū; to lagomatai e tau kei ua ia.—1/1, lau 18-21.

• Ko e heigoa e manatu ne taute e Iesu he talahau e ia e fakataiaga ne putoia e talaga he ua e fale, taha ne ta he oneone mo e taha ne ta he mena patu?

Ne talahau e Iesu e fakataiaga ke fakakite aki e tau gahua he tau tagata ta fale. Ko lautolu ne fanogonogo teao ke he tau fakaakoaga he Tohi Tapu po ke totou e Tohi Tapu i kaina kua tuga e ta e kaina haana i luga he oneone. Ka ko lautolu ne fakagahua e tau fakaakoaga he Keriso kua tuga e tagata ne “keli fakahokulo ia, kua toka e fakave ki luga he mena patu.” (Luka 6:48) Ne talia e lautolu e paleko ti eketaha ke fakagahua e tau mena ne ako e lautolu mai he fakaako e Tohi Tapu ke he tau momoui ha lautolu he tau aho takitaha.—1/1, lau 22-24.

• Maeke fēfē ia tautolu ke fakalahi e olioli ka moua ai he fekafekauaga ha tautolu?

Maeke ia tautolu ke tauteute e tau loto ha tautolu, hagaaki ke he lahi he mena kua maeke ia tautolu ke lagomatai e falu. Maeke ia tautolu ke fakamatala mo e manamanatu ke kamata e tau fakaako Tohi Tapu. Ka feleveia mo e favale, maeke ia tautolu ke hikihiki e fakafeleveiaaga ha tautolu ke fakalagalaga e fiafia ha lautolu he matakavi ha tautolu.—1/15, lau 8-10.

• Lata ke lauia fēfē e tau fakaakoaga Tohi Tapu ke he aga he Kerisiano mo e tau gahua mauku?

Pete kua liga momoko e Kerisiano he mamate e tau fakahele, kua iloa e ia ko lautolu ne mamate kua nakai iloa ha mena. Pete foki ka tuhituhi e lautolu ne nakai talitonu a ia, to kalo mai a ia he tau aga fakamotu ne fakapiki ke he manatu na maeke e tau tagata mamate ke lauia a lautolu ne momoui. Ke kalo he tau lekua, kua fakamau he falu Kerisiano e tau manako ha lautolu ke taute aki e fakaholoaga he mauku.—2/15, lau 29-31.

• Kua galo kia e “tohi a Iasera” mo e ‘tohi he tau Tau a Iehova’ he Tohi Tapu? (Iosua 10:13; Nume. 21:14)

Nakai. Kua liga ko e tau tokumene ne nakai omoomoi he agaaga he vahā Tohi Tapu ti kua hagaao ki ai e tau tagata tohia Tohi Tapu.—3/15, lau 32.