Fakatupu he Kaufakalataha e Holo ki Mua Fakaagaaga
KUA aoga lahi e aga kaufakalataha ma lautolu ne manako ke holo ki mua e feaki he magafaoa ne manamanatu fakaagaaga. He magaaho ne tufuga e Iehova e hoa fakamua, ne fakamalolō e ia e lata ke kaufakalataha. Kua lata ia Eva ke gahua mo Atamu ko e “lagomatai” ki a ia. (Kene. 2:18) Kia kau tokoua i loto he fakamauaga, he felalagoaki e taane mo e fifine. (Fakama. 4:9-12) He taute foki e matagahua ne kotofa e Iehova ke he tau matua mo e tau fanau kua lata ke moua e kaufakalataha.
Tapuakiaga he Magafaoa
Ko Barry mo Heidi ne lima e tama. Ne mailoga e lautolu he gahua auloa ke taute e fakaakoaga Tohi Tapu he magafaoa kua lagomatai a lautolu ke holo ki mua. Ne fakamaama e Barry: “Ma e fakaakoaga he magafaoa, ne age e au ke he fanau e tau kotofaaga ikiiki he falu magaaho. Liga ole au ki a lautolu ke tauteute falu talahauaga ne fakavē ke he tau vala tala he Awake! Ne taute foki e mautolu e tau magaaho fakamahani ma e gahua he fonua ke igatia e tama mo e mautali ke fai fakataitaiaga.” Ne lafi e Heidi: “Ne igatia a mautolu oti ke fai laupepa ne tū ai e tau foliaga fakaagaaga ne manako a mautolu ke hokotia ki ai, ti liu tutala a mautolu ke he tau mena nei he falu magaaho he fakaakoaga he magafaoa ke mailoga kua fēfē e holo ki mua ha mautolu.” Ne mailoga foki he hoa nei, he ha ha ai e tau pō pauaki ne nakai kitekite televisoni ai kua moua he magafaoa katoa e magaaho ke totou.
Tau Feleveiaaga he Fakapotopotoaga
Ko Mike mo Denise ne feaki fā e fanau. Aoga fēfē e magafaoa ha lautolu he gahua auloa? Ne pehē a Mike: “Falu magaaho, pete he mua atu e mitaki he tau pulega ne fakatoka kua nakai kautū tumau, ka e iloa e mautolu he kaufakalataha kua lagomatai a mautolu ke o tuai he tau feleveiaaga. Ne fakamaama e Denise: “He lalahi hake e fanau ne igatia a lautolu mo e tau matagahua ke taute. Ko e tama fifine ha maua ko Kim, ne lagomatai ke kaitunu mo e fakatoka e laulau.” Ne manatu he tama taane ha laua ko Michael: “He tau pō Ua ne taute e feleveiaaga he fakapotopotoaga he kaina ha mautolu. Ti fakameā e mautolu e poko, vacuum e foloa, ti tuku mai e tau nofoa ki fafo.” Ne lafi he taha tama taane ko Matthew: “Ne hau tuai a Tete ki kaina mai he gahua he tau pō feleveiaaga ke lagomatai a mautolu ke tauteute ma e feleveiaaga.” Ti ko e heigoa e fua?
Aoga Lahi e Tau Laliaga Oti
Ne talahau e Mike: “He 1987, ne kamata au mo Denise ke gahua ko e tau paionia. He magaaho ia, tokotolu ni e tama ha maua ne nonofo agaia i kaina. Tokoua ia lautolu ne eke foki mo tau paionia, mo e gahua falu ke he tau matagahua tā fale he Peteli. Ne fiafia lahi foki e magafaoa ha mautolu ha kua maeke ia mautolu ke lagomatai 40 e tagata kehekehe ke hokotia ke tukulele mo e papatiso. Kua monuina foki a mautolu he gahua ko e magafaoa ke he tau matagahua tā fale, ke he falu motu foki.”
Mooli, kua aoga lahi e tau laliaga oti he kaufakalataha e magafaoa. Maeke nakai ia koe ke moua falu puhala foki ke kaufakalataha a koe mo e falu he magafaoa haau? Maeke ia koe ke iloa mooli to lagomatai he aga kaufakalataha e magafaoa haau ke holo ki mua fakaagaaga.
[Fakatino he lau 28]
Fakatupu he tau magaaho fakamahani e holo ki mua he gahua he fonua