“Ko e Tonuhia he Tama ke he Tupu Fakaagaaga”
IA Tesemo 9, 2008, ne taute he Swedish Academy for the Rights of the Child e fono pauaki ne mataulu “Ko e Tonuhia he Tama ke he Tupu Fakaagaaga.” Loga e manatu ne talahau he tau gutuvagahau ne hukui e Lotu i Suitene, falu vahega lotu ha Kerisitenitome, Isilama, mo e matakau lagomatai tagata.
Taha he tau gutuvagahau ko e akoako ne pehē: “Nakai maeke e tagata ke fakamaama fakahako mo e fakamitaki e aoga lahi ne ha ha he tau tala Tohi Tapu ke he moui fakaagaaga he tau tama.” Fakapuke fēfē he tau kupu he Tohi Tapu e tau manako fakaagaaga he tau tama?
“Kua foaki he tau kupu mo e tau tala ke he tau tama e magaaho ke fakakite mo e manamanatu fakahokulo he tagata,” he talahau he akoako. Tohi hifo e ia “e tala ha Atamu mo Eva, ha Kaino mo Apelu, ha Tavita mo Koliato, he fanauaga ha Iesu, he tagata oko tukuhau ko Sakaio, he tala fakatai ke he tama moumou koloa, he Samaria mitaki.” Ne fakakite mai e tau mena nei ko e “falu he tau tala ne eke mo fakafifitaki ke takitaki e manamanatuaga [he tama] ke he tau puhala aoga loga he moui ke he tau mena fakahehē, fakamagalo, fakafeilo, fakavihia, nofogati, fakamafola, fakaalofa katoatoa mo e fakamatakainaga.” Ne lafi e ia: “Maeke e tau kupu nei ke foaki e tau puhala ke hiki e moui he tagata ti eke mo gahuahuaaga mo e aoga.”
Mooli, ko e mena mitaki ke fakamalolō e totou Tohi Tapu. Ka kua maeke mooli kia he tau tama ke “fakakite mo e manamanatu fakahokulo he tagata” ke he tau mena ne totou e lautolu mai he tau Tohiaga Tapu mo e hokotia ke he tau fakahikuaga hako?
Lata foki ke fakamaama ke he tau tagata lalahi e tau kupu he Tohi Tapu. Ma e fakatai, ne talahau he Tohi Tapu ki a tautolu e tagata taane ne nakai maeke ke moua e moui fakaagaaga mooli he “fakakite mo e manamanatu fakahokulo he tagata.” Ko e tagata ia ko e takitaki Aitiope. Ne totou a ia he perofetaaga ha Isaia ka e nakai maama ai e kakano. Ha kua manako a ia ke maama e tohi he perofeta, ne talia e ia e fakamaamaaga ne tala age he tutaki ko Filipo ki a ia. (Gahua 8:26-40) Fai foki ne tuga e Aitiope. Lata ia tautolu oti—mua atu ke he tau tama—ke fakamaama ki ai e tau kupu he Tohi Tapu.
Kua hataki he Tohi Tapu a tautolu: “Kua lili ai e goagoa ke he loto he tama.” (Fakatai 22:15) Lata he tau tama ke moua e takitakiaga mo e lagomataiaga, ti ha ha he tau matua ha lautolu e matagahua ke foaki ki a lautolu e fakaakoaga ke he tau mahani mo e tau mena fakaagaaga ne fakavē ke he Tohi Tapu mo e tau mena ne fakaako he fakapotopotoaga Kerisiano. Kua ha ha he tau tama e tonuhia ke he fakamahaniaga pihia. Tali mai he vahā tote, kua lata a lautolu ke lagomatai ke atihake e fakavēaga mauokafua ke he Tohi Tapu ma e tupu fakaagaaga ke maeke ia lautolu ke eke mo “tau tagata motua, . . . kua mahani he ako mua ai ke mailoga e tau mena mitaki mo e tau mena kelea.”—Hepe. 5:14.