Fahia ke he Nakai Fakamooli he Hoa

KO MARGARITA mo e taane haana ko Raúl, ne fekafekau tokoua ko e tau tagata gahua mau ke he loga e tau tau.a Ka e nakai leva e fanau e tama uluaki ha laua, ne kamata a Raúl ke tafea kehe mai ia Iehova. Fai magaaho ai, ne kamata a Raúl ke moui mahani feuaki ti tuku ki tua he fakapotopotoaga Kerisiano. “He tutupu e tau mena oti nei,” he talahau e Margarita, “ne logona hifo e au ko e mate fai au. Ne malipilipi e loto haaku, ti nakai iloa e au e mena ke taute.”

Nakai leva e fai taane a Jane, ne moumou he taane haana e falanakiaga mo e fakaalofa hofihofi haana ke he taha puhala. Ne kamata e taane ke ekefakakelea a ia he keli. “He mogo fakamua ne moto e ia au,” he talahau e Jane, “ne ofo lahi au, mā, mo e logona e fakateaga. Ne tupu tumau e mena nei, ti olelalo a ia ke fakamagalo e au a ia. Manatu au ko e matagahua Kerisiano haaku ke fakamagalo mo e fakanimo tumau. Ne manatu foki au kua nakai fakamooli ke talahau e lekua ha maua ke he taha tagata—pihia foki ke he tau motua he fakapotopotoaga ha tautolu. Ne fakatumau e ekefakakelea mo e fakamagalo nei ke he loga e tau tau. Ke he tau magaaho oti ia, ne manatu au kua fai mena au kua lata ke taute ke fakaalofa e taane haaku ki a au. He magaaho fakamui ne tiaki e ia au mo e tama fifine ha maua, ne logona hifo e au kua kaumahala au, na lata au ke taute po ke talahau taha mena ke pipi aki e fakamauaga.”

Ke tuga a Margarita mo Jane, liga kua matematekelea haau a manamanatuaga, tuaga fakatupe, mo e tuaga fakaagaaga ha kua nakai fakamooli e taane haau ki a koe. Po ke liga ko e taane a koe hane logona hifo e loto mamahi mo e vihi lahi ha kua nakai mahani fakamooli e hoana haau. Nakai fakatikai, kua nonofo a tautolu he “tau aho fakamui to hohoko mai ai e tau aho uka,” tuga ne talahau tuai he Tohi Tapu. Kua fakakite mai he perofetaaga nei ko e “tau aho fakamui,” to matematekelea e magafaoa, ti nakai fai fakaalofa mooli ke he tau puhala loga. To fakatikai he falu e talahauaga ha lautolu ke fekafekau ke he Atua. (2 Timo. 3:1-5) Ne nakai hao mai e tau Kerisiano mooli he tau lekua nei; ko e mena ia, ko e heigoa ka lagomatai a koe ke fahia kaeke kua moumou e falanakiaga haau?

Kitia a Koe Tuga ne Kitia e Iehova a Koe

He magaaho fakamua, to liga uka ia koe ke talitonu ko e tagata ne fakaalofa a koe ki ai kua fakamamahi lahi a koe. Ti liga kamata foki a koe ke manatu hifo ko koe ati mahani agahala e hoa haau.

Ka e manatu, ne nakai fakamooli foki e taha tagata ne falanaki mo e ofania he tagata mitaki katoatoa ko Iesu. Ne fifili e Iesu e tau kapitiga tata lahi haana, ko e tau aposetolo, he mole e liogi fakamakamaka. Ko lautolu oti toko 12 he magaaho ia ko e tau fekafekau mahani fakamooli ha Iehova. Nakai noa, ne momoko lahi mahaki a Iesu he magaaho ne “fakavai” po ke, afo e Iuta. (Luka 6:12-16) Ka e nakai tuku e Iehova e fakalagoaga ki a Iesu ha ko e tau gahua ha Iuta.

Mooli, nakai fai hoa mau he magaaho nei ne mitaki katoatoa. To hehē tokoua e tau hoa. Ko e salamo ne omoomoi ke tohi fakamooli: “Ioha na e, ane mai tokaloto e koe e tau mahani hepehepe, po ko hai, ma [Iehova] na e, ke maeke ke tu atu?” (Sala. 130:3) He fifitaki ki a Iehova, kua lata tokoua e tau hoa ke manamanatu ke fakamagalo e tau nakai mitaki katoatoa he taha.—1 Pete. 4:8.

Ka e “to takitokotaha a tautolu mo e talatala atu hana mahani ke he Atua.” (Roma 14:12) Ka fakatumau e hoa mau ke vagahau po ke mahani kelea, ko ia ni kua lata ke tali atu ki a Iehova. Kua vihiatia e Iehova e favale mo e kupu kelea, ti nakai fai kakano hako ke taute pihia e hoa he nakai fakaalofa mo e nakai fakalilifu ki a ia. (Sala. 11:5; Efeso 5:33; Kolo. 3:6-8) Ka e, kaeke kua fakatumau ni mo e nakai fakatokihala e Kerisiano ne ita mo e to nakai hiki, kua latatonu e tagata ia ke tuku ki tua he fakapotopotoaga Kerisiano. (Kala. 5:19-21; 2 Ioa. 9, 10) Kua nakai lata e hoa mau ke kelea e loto he tala age e mahani nakai faka-Kerisiano pihia ke he tau motua. Mooli, na fakaalofa hofihofi a Iehova ke he tau tagata ne mamahi he ekefakakelea pihia.

Ka faivao e hoa mau, kua agahala a ia ke he hoa haana ne nakai agahala ti pihia ki a Iehova. (Mata. 19:4-9; Hepe. 13:4) Ka eketaha e hoa ne nakai fai kelea ke moui fakatatau ke he tau matapatu fakaakoaga he Tohi Tapu, kua nakai lata a ia ke kelea e loto ha ko e agahala nakai fakamooli he tagata mahani faivao.

Manatu na iloa e Iehova e logonaaga haau. Ne fakamaama e ia a ia ko e taane he motu ko Isaraela, ti haia i loto he Kupu haana e tau kupu mafanatia ne fakakite e mamahi lahi ne logona e ia ha ko e mahani faivao fakaagaaga he motu ia. (Isaia 54:5, 6; Iere. 3:1, 6-10) Kia mafanatia na mataala lahi a Iehova ke he tau hihina mata haau kaeke kua nakai fakamooli e hoa mau haau ki a koe. (Mala. 2:13, 14) Iloa e ia kua manako a koe ke moua e mafanatia mo e fakamalolōaga.

Puhala ne Foaki e Iehova e Fakamafanaaga

Taha he tau puhala ne foaki e Iehova e fakamafanaaga kua puhala mai he fakapotopotoaga Kerisiano. Ne moua e Jane e lagomataiaga pihia. “Kua felauaki tonu e ahiahi mai he leveki takaiaga he magaaho ne fakaagitau lahi mahaki au,” he manatu e Jane. “Na iloa e ia e fakaatukehe lahi mahaki haaku ha kua tohi e taane haaku ke tau vevehe. Ne fai magaaho a ia ne lagomatai au ke manamanatu ke he tau kupu tohi tuga e 1 Korinito 7:15. Ko e tau kupu Tohi Tapu mo e tau talahauaga totonu haana ne lagomatai au ke fakatotoka e tau logonaaga agahala haaku ti foaki ki a au e mafola he manamanatuaga.”b

Ko Margarita, ne totoku fakamua, ne iloa foki kua foaki e Iehova e lagomatai aoga ne puhala mai he fakapotopotoaga Kerisiano. “Magaaho ne kitia maaliali ai kua nakai fakatokihala e taane haaku,” he talahau e Margarita, “ne uta e au e tau tama haaku ti hiki ke he taha taone. He hohoko atu, ne maeke au ke moua ua e poko ke totogi ke nonofo ai. Aho hake, he momoko lahi mahaki agaia, ko e magaaho ne oko mai au he tau mena ki fafo he tau kato ha mautolu ne nokonoko e gutuhala. Ne manatu au ko e fifine ne pule ke he fale, na nofo he tapa he poko ha mautolu. Ofo lahi ai, ko e matakainaga fifine ne fakaako Tohi Tapu mo e matua fifine haaku ti lagomatai e magafaoa ha mautolu ke iloa e kupu mooli. Ne nakai amanaki a ia ke kitia au ka ko e hau ai ke he fale nei ke fakaako Tohi Tapu mo e fifine ne pule ke he fale. Kua logona hifo e au e fakatotoka—ti tagi au he momoko. Ne fakamaama age e au e tuaga haaku, mo e tagi tokoua a maua. Ati fakatoka agataha e ia ke oatu a mautolu he feleveiaaga he aho ia. Ne fakafeleveia he fakapotopotoaga a mautolu, ti taute he tau motua e tau fakatokaaga ke lagomatai au ke leveki e tau manako fakaagaaga he magafaoa haaku.”

Puhala kua Maeke e Falu ke Lagomatai

Kua maeke mooli a lautolu he fakapotopotoaga Kerisiano ke foaki e tau lagomatai aoga ke he loga e puhala. Ma e fakatai, ne lata a Margarita mogonei ke kumi taha gahua tupe. Ne taha e magafaoa he fakapotopotoaga ne foaki ke lagomatai he leveki e tau tama haana ka hili e aoga kaeke kua lata.

“Ko e mena ne mua atu e loto fakaaue haaku ki ai,” he talahau e Margarita, “ko e magaaho ka ole mai e tau matakainaga ke ō mo au mo e tau tama haaku he gahua he fonua.” Ha ko e tau lalagoaga aoga pihia, kua lagomatai e lautolu he fakapotopotoaga ke ‘fetogiaki ke he tau kavega ke fua’ ti ko e taute pihia kua fakamooli e “fakatufono he Keriso.”—Kala. 6:2.

Ko lautolu ne matematekelea ha ko e tau agahala he falu kua loto fakaaue mooli ke he lagomatai aoga pehēnei. Ko Monique, ne tiaki he taane haana a ia, ti toka hifo e kaitalofa ko e $15,000 [U.S.] he credit-card mo e tokofā e tama ke feaki, ne pehē: “Ko e lahi ha ia he fakaalofa he tau matakainaga fakaagaaga haaku. Nakai maeke au ke manamanatu ko e fēfē la e moui haaku ane mai nakai lagomatai e lautolu. Manatu au kua tuku mai e Iehova e tau matakainaga homo ue atu, ne foaki e lautolu a lautolu ke lagomatai e tau tama haaku. Ne fiafia lahi au he kitia e tau tama haaku kua tutupu hake ke motua fakaagaaga ha ko e lagomatai pihia. Ka manako au ke moua e fakatonuaga, ne lagomatai he tau motua au. Ka manako au ke tutala ke he taha tagata, ne fanogonogo a lautolu.”—Mare. 10:29, 30.

Ka e mooli, to mailoga he kapitiga fakaalofa e magaaho kua mitaki lahi ke nakai tala ke he mena fakaatukehe ia ne tupu ke he taha tagata. (Fakama. 3:7) “Laulahi he tau magaaho,” he talahau e Margarita, “ne fiafia lahi au ke tutala mo e tau matakainaga fifine he fakapotopotoaga foou haaku ke he gahua fakamatala, tau fakaako Tohi Tapu mo e tau fanau ha mautolu—ke tala ke he ha mena ni ka e nakai ke he tau lekua haaku. Ne fakaaue au ki a lautolu he fakaatā au ke toka e tuaga he moui haaku kua mole mo e lagomatai au ke taute e kamataaga foou.”

Totoko e Manako ke Taui Atu

Falu magaaho, pete he nakai logona hifo ko koe ati agahala e hoa haau, ka e liga ita a koe ha kua matematekelea lahi a koe ha ko e tau hehē haana. Ka toka ke tupu, to liga eke e ita nei ke fakalolelole aki e fifiliaga haau ke fakamooli tumau ki a Iehova. Ke fakatai, liga hihiga a koe ke kumi puhala ke taui atu e hoa haau ne nakai mahani fakamooli.

Ka mailoga e koe kua kamata e tau logonaaga pihia ke tupu hake ia koe, liga lata a koe ke manamanatu ke he fakafifitakiaga ha Iosua mo Kalepa. Ne foaki e tau momoui he tau tagata tua fakamooli nei ke toko e Motu he Maveheaga. Ko e falu tagata toko ne temotemoai e tua ti fuluhi kehe e lautolu e tau tagata mai he omaoma ki a Iehova. Ne manako foki e falu Isaraela ke pinimaka a Iosua mo Kalepa he lali a laua ke fakamalolō e motu ke fakatumau e tua fakamooli. (Nume. 13:25–14:10) Ko e fua he tau gahua ha Isaraela, ne o fano a Iosua mo Kalepa he tutakale ke he 40 e tau, nakai ha ko e hehē ha laua, ka ko e hehē he falu tagata.

Pete kua liga hogohogo manava a Iosua mo Kalepa, ne nakai toka e laua e tau agahala he tau matakainaga ha laua ke fakaita aki a laua. Ne hagaaki a laua ke fakatumau e lagotatai fakaagaaga ni ha laua. He matahiku he 40 e tau he tutakale, ko laua fakalataha mo e tau Levi ne moua e palepale ha kua hao mai he atuhau ia ti fakaatā ke huhū atu ke he Motu he Maveheaga.—Nume. 14:28-30; Iosua 14:6-12.

Ko e tau gahua he hoa haau ne nakai mahani fakamooli to liga leva e fakamatematekelea ki a koe. To liga fakaoti e fakamauaga, ka e liga matematekelea e loto haau mo e uka fakatupe he magaaho fakamui. Pete ia, he nakai fakaatā e tau manamanatu fakalolelole ke lauia a koe, manatu na iloa e Iehova e puhala mitaki lahi ke fehagai mo lautolu ne tiaki pauaki e tau tuaga haana, tuga ne iloa he tau Isaraela ne nakai tua fakamooli he tutakale.—Hepe. 10:30, 31; 13:4.

Maeke ia Koe ke Fahia!

He nakai fakaatā e tau manatu kelea ke pehia ai a koe, fakapuke e loto haau aki e tau manatu ha Iehova. “Ne mailoga e au ko e fanogonogo ke he tau tapakiaga he The Watchtower mo e Awake! ne lagomatai au ke fahia,” he talahau e Jane. “Ko e tau feleveiaaga foki ko e punaaga lahi he malolō. He fai vala ke he tau feleveiaaga ne lagomatai au ke nakai manamanatu ke he tau lekua haaku. Ne lagomatai pihia foki he gahua fakamatala au. He lagomatai e falu ke atihake e tua ki a Iehova, ne fakamalolō e au e tua haaku ni. Ti ko e leveki he tau tagata fakaako Tohi Tapu ne lagomatai au ke manamanatu ke he tau mena ne mua atu e aoga.”

Ko Monique, ne totoku fakamua, ne pehē: “He fina atu tumau ke he tau feleveiaaga mo e fakalataha tumau ke he gahua he fonua ka fahia au, ati maeke au ke fakauka. Kua femataaki lahi e magafaoa haaku mo e ke he fakapotopotoaga foki. Ne lagomatai he mena ne tupu ki a au ke mailoga e tau lolelole ni haaku. Kua kamatamata tuai au, ka ko e lagomatai ha Iehova ati maeke ia au ke fahia.”

Maeke foki ia koe ke fahia mai he tau kamatamata pihia. Pete e mamahi ne tupu mai he nakai fakamooli, eketaha ke muitua e fakatonuaga omoomoi ha Paulo: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”—Kala. 6:9.

[Tau Matahui Tala]

[Fakatino he lau 31]

Ko e tau hoa ne tiaki kua loto fakaaue ki a lautolu ne lagomatai a lautolu ke gahua he fonua