Ko e Tau Gahua Oti ne Taute e Ia kua Hako Ia ma Haana
KO THEODORE JARACZ, ko e matakainaga he Kau Fakatufono he Tau Fakamoli a Iehova ne oti e fekafekauaga haana he lalolagi he pogipogi Lotu ia Iuni 9, 2010. Ne 84 haana a tau he moui, ka e moui agaia a Melita ko e hoana haana ke he 53 e tau. Moui agaia e mahakitaga lahi haana pihia foki mo e taha e nefiu mo e ua e nisi.
He fanau ia Sepetema 28, 1925, he Maaga ko Pike, Kentucky i U.S.A., ne fakamailoga e tukuleleaga he Matakainaga ko Jaracz ki a Iehova he 15 e tau he moui ia Aokuso 10, 1941. Ua e tau he mole, he 17 e tau he moui ne hu atu a ia ke he gahua paionia tumau, ati kamata e feua loa haana ne teitei 67 e tau he fekafekauaga mau.
He 1946, he 20 e tau he moui, ne fina atu e Matakainaga ko Jaracz he vahega ke fituaki he Aoga Tohi Tapu a Kiliata he Kolo Toko. Mole e kautūaga, ne kotofa e Matakainaga ko Jaracz ke fekafekau leveki faifano ki Cleveland i Ohio, ko e matakavi he Tau Faahi Kaufakalataha. He 1951, ne foaki ki a ia e kotofaaga ke he la i Ausetalia, ne leveki e ia e gahua he la. Hokotaki mai he 1983 Yearbook of Jehovah’s Witnesses ko e Matakainaga ko Jaracz “ne lahi e fakamalolō ke he tau matakainaga he motu katoa ha ko e fakamakutu haana ma e fakatokaaga fakateokarasi mo e mitaki e takitakiaga ke he fonua.”
He liu atu a ia ke he Tau Faahi Kaufakalataha, ne hoana he Matakainaga ko Jaracz a Melita Lasko ia Tesemo 10, 1956. Ne kamata e moui he fakamauaga ha laua ke he gahua faifano, he fakamakutu ke fekafekau ke he tau takaiaga mo e tau faahimotu ne putoia e matakavi lahi he Tau Faahi Kaufakalataha. He matahiku he 1974, ne uiina e Matakainaga ko Jaracz ke eke mo taha he Kau Fakatufono he Tau Fakamoli a Iehova.
To leva e manatu e Matakainaga ko Jaracz ko e fekafekau tukulele mo e mahani fakamooli ha Iehova, ne hagaaki loto katoatoa ke he tau matagahua fakateokarasi. Ko ia ko e taane loto fakaalofa mo e aga leveki ti ko e tagata fakaagaaga foki ne tuku fakamua e tau mena he falu ke he haana. (1 Kori. 13:4, 5) Ko e fiafia mooli nei ke he falu ne kitia he manamanatu lahi a ia ke taute fakamitaki mo e fakaalofa noa ke he tau tagata oti. Lafi ki ai, ko e fakaalofa tumau haana mo e mamata atu ke he tau tagata kua kitia he fakamakutu haana ke he gahua he fonua.
Pete he momoko lahi mahaki ha kua galo e tagata gahua malolō mo e fakahele he magafaoa Peteli mo e he tau matakainaga he lalolagi katoa, kua fiafia a tautolu ke he fekafekauaga fakamooli he Matakainaga ko Jaracz ki a Iehova ke he loga e tau hogofulu tau. Mauokafua ai a tautolu kua ‘fakamoli a ia ato hoko ke he mate, ti ta atu ai e foufou he moui kia ia.’ (Fakakite. 2:10) Kua iloa moolioli foki e tautolu ko e tau gahua oti ne taute e ia kua hako ia ma haana.—Fakakite. 14:13.