Tau Hūhū he Tau Tagata Totou
Maeke nakai ke iloa e magaaho tonu he aho ne fakahoko e fakatautauaga ha Iesu Keriso?
Ko e hūhū nei kua lagā mai ha kua tuga e nakai fetataiaki e tau tala omoomoi ne fakamau he tagata tohia Evagelia ko Mareko mo e aposetolo ko Ioane ke he mate ha Iesu. Pehē a Mareko: “Ko e magaaho tolu ne fakasatauro ai e lautolu [tau kautau] a ia.” (Mare. 15:25) Hagaao ki a Ioane, “na ko e magaaho ono” ne tuku atu e Pilato a Iesu ke he tau Iutaia ke fakasatauro. (Ioane 19:14-16) Ko e tau tagata talahau tala he Tohi Tapu ne foaki e tau fakamaamaaga kehekehe he lali ke fakamafola tuga e fekehekeheaki nei. Ka kua nakai lahi e talahauaga faka-Tohiaga Tapu ne moua ke fakamaama e kehekehe he tau tala ua nei. Pete ia, he manamanatu ke he puhala ne onoono e tau tagata ke he magaaho he vahā ia ka lagomatai lahi.
He senetenari fakamua he Vahā Nei ha tautolu, ne vevehe he tau Iutaia e aho ke he 12 e tulā, he totou mai he hakeaga laā. (Ioane 11:9) “Ko e magaaho tolu” kua kamata mai he matahola valu ke he matahola hiva he pogipogi ti “ko e magaaho ono” ne oti liga he tupou laā. Mooli, ne hake mo e tō e laā he tau magaaho kehekehe he tau. Ti ko e loa he maama he aho kua kehekehe he fakatatau ni ke he vahā. Mua atu, ko e tulā he aho kua iloa he kitekite e tuaga he laā. Ti ko e mena ia kua fuafua ai e tau magaaho. Ko e Tau Tohiaga Tapu Heleni Kerisiano kua fa hagaao ke he tau mena tutupu he magaaho tolu, ono, po ke hiva—fa mahani ke kakano kua teitei ke he magaaho ia. (Mata. 20:3, 5; Gahua 10:3, 9, 30) Ko e talahauaga pauaki, tuga e “magaaho fitu,” kua fakatū laia he lata ke talahau e magaaho tonu ke he fakalaulahiaga he tala.—Ioane 4:52.
Ko e tau tala he Evagelia kua tatai hagaao ke he magaaho he tau mena tutupu he aho fakahiku ha Iesu he lalolagi. Ne fakakite e lautolu tokofā, ko e tau ekepoa mo e tau patu ne feleveia he mole e matafatafaata he aho ti uta a Iesu ke he Kovana Roma ko Ponotio Pilato. (Mata. 27:1; Mare. 15:1; Luka 22:66; Ioane 18:28) Ne talahau e Mataio, Mareko, mo Luka, mai he magaaho ono ne fitā a Iesu i luga he akau, ne pouli oti e motu ato “hoko ni ke he magaaho hiva.”—Mata. 27:45, 46; Mare. 15:33, 34; Luka 23:44.
Taha e manatu aoga lahi ne liga lauia e magaaho ne fakatautau a Iesu ko e mena nei: Ko e keli po ke fahi kua manamanatu ki ai ko e vala he fakaholoaga he fakatautau. Falu magaaho kua kelea lahi e keli ti mate e tagata. He mena ne tupu ki a Iesu, kua liga mamahi lahi mahaki ti lata he taha tagata taane ke fua e akau fakakikiveka he mole e kamata a Iesu ke fua ai tokotaha. (Luka 23:26; Ioane 19:17) Kaeke ko e keli kua fakamailoga e kamataaga he fakaholoaga he fakatautau, kua fai magaaho ka mole ato pao fao a Iesu ke he akau fakakikiveka. Ko e tau tagata kehekehe kua liga talahau e tau magaaho kehekehe ma e fakatautau, ti falanaki ke he tuaga katoa he fakaholoaga ne mailoga e lautolu takitokotaha e magaaho.
Ko e aposetolo ko Ioane ne tohi e tala haana he mole e tau hogofulu tau he falu tagata tohia Evagelia. Ko e mena haia ati iloa e ia e tau tala ha lautolu. Mooli, ne putoia e Ioane e magaaho ne liga kehe mai he ha Mareko. Ka e fakakite he mena nei e fakamooliaga maaliali kua nakai fifitaki noa ni e Ioane e tala ha Mareko. Kua omoomoi tokoua a Ioane mo Mareko he agaaga he Atua. Pete he nakai lahi e talahauaga faka-Tohi Tapu ke fakamaama e kehekehe, maeke ia tautolu ke falanaki ke he tau tala he Evagelia.