“Kua Fakamooli Tuai Haaku Miti”

He hogofulu ma lima e tau kua mole, ne gahua paionia tumau a Emilia. Ka kua fakaoti e ia e gahua fekafekau tumau haana. He tau tau gahoa ne mole laia, ne fa manamanatu a ia ke he magaaho nā ne mua atu e fiafia he moui haana, ti liu a ia manako ke fakalahi e gahua haana he fonua.

Ka kua lahi e magaaho gahua tupe ha Emilia, ti fofō he mena fakatauhele nei e fiafia haana. Lagataha e talahau e ia i mua he kaugahua haana: “Manako au ke fakatote hifo e tau tulā gahua haaku!” Ne logona he takitaki gahua haana e mena nei ti fina atu a ia ki a Emilia mo e hūhū ko e mooli nakai. Ne tala age a Emilia ē mooli. Ka e, ke maeke ai kua lata ni ke moua e taliaaga he ulu fakatonu ha ko e fakaveaga he kamupanī kua lata ni e tau tagata gahua oti ke foaki katoatoa e tau magaaho. Ne tauteute e matakainaga fifine ha tautolu ke fono mo e ulu fakatonu ti liogi a ia ma e mafola mo e loto malolō.

He fono, ne ole fakatotonu ka e fakamalolō a Emilia ke mutu hifo e tau tulā gahua haana. Fakamaama e ia na fakaaoga e ia e tau magaaho haana ne nakai gahua ke lagomatai e falu: “Ko au ko e taha he Tau Fakamoli a Iehova, ti lagomatai fakaagaaga e au e tau tagata. He vahā nei kua tokolalo e mahani mitaki he tokologa. Kua lata a lautolu ke maaliali e tau iloaaga mo e tau tuaga, ti ko e iloilo ka tala age e au mai he Tohi Tapu kua aoga lahi ki a lautolu. Nakai manako au ke he tau matagahua haaku ka hili e gahua ke fakatote hifo e tuaga gahua haaku hinei, ka kua manako au ke lahi e magaaho ke lagomatai e tau tagata. Ko e kakano haia ati manako au ke fakatote hifo e tau tulā gahua haaku.”

Ne fanogonogo fakatekiteki e ulu fakatonu, ti pehē ko e mena lagataha e manamanatu a ia ke taute e gahua foaki noa. Ti pehē a ia: “Ha ko e tau kakano ne tala mai e koe, logona hifo e au kua lata au ke talia e ole haau. Ka e mailoga nakai e koe to tote e tupe haau ka moua?” Ne pehē a Emilia kua mailoga e ia ti kaeke kua pihia, to fakamukamuka e ia e moui haana. Ne lafi e ia: “Ko e foliaga haaku ne mua e aoga ke taute taha mena mitaki mooli ma e tau tagata.” Tala age e ulu fakatonu ki a ia: “Nava au ke he tau tagata ne foaki fiafia e tau magaaho ha lautolu ma e falu.”

Nakaila fai ne fakagahua he kamupanī ia ne moua e tau tuaga mitaki pihia. Kua fakaatā a Emilia mogonei ke gahua ni fā e aho he faahi tapu. He ofo lahi a ia, kua hake e totogi haana, ti lahi ni tuga he mogo fakamua! Pehē a ia: “Kua fakamooli tuai haaku miti, ti maeke au ke liu foki paionia tumau!”

Kua manamanatu nakai a koe ke hikihiki e tau tuaga haau ke hu atu po ke liu hu atu ke he gahua paionia?

[Blurb he lau 32]

Ne tala age e ulu fakatonu ki a ia: “Nava au ke he tau tagata ne foaki fiafia e tau magaaho ha lautolu ma e falu”