Fēfē Au ke he Kitiaaga a Iehova?
1. Fakatatai fēfē e Tohi Tapu ke he fakaata?
1 Fa lagafiha e onoono haau ke he fakaata? Tokologa ia tautolu ne taute pihia he tau aho oti ha kua lagomatai he mena nei a tautolu ke kitia e tau faahi he foliga ha tautolu ne kua lata ke fakamaopoopo. Kua fakatatai e Tohi Tapu ke he fakaata. Ko e totou e Kupu he Atua kua lagomatai a tautolu ke kitia ko hai a tautolu i loto, ko e tagata ne kitia e Iehova. (1 Samu. 16:7; Iako. 1:22-24) Kua maeke e kupu he Atua ke “fakafili foki e tau manatu mo e tau fakafiliaga he tau loto.” (Hepe. 4:12) Maeke fēfē he totou mo e manamanatu fakahokulo ke he Tohi Tapu ke lagomatai a tautolu ke kitia e tau faahi kua lata ia tautolu ke fakamalolō ke kautū ko e tau tagata fakamatala?—Sala. 1:1-3.
2. Lagomatai fēfē he Tohi Tapu a tautolu ke onoono fakahokulo hifo ni ki a tautolu?
2 Fakaaoga e Tohi Tapu Tuga e Fakaata: Ko e tau tala he Tohi Tapu ke he tau fekafekau tua fakamooli ha Iehova kua fakaako ki a tautolu e tau aga kua fulufuluola ki a Ia. Ma e fakatai, ne fakatātā e Tavita e fakamakutu ma e higoa he Atua. (1 Samu. 17:45, 46) Ne foaki noa loto malolō a Isaia ke fakamatala he matakavi uka. (Isaia 6:8, 9) Ko e fakaalofa hokulo ha Iesu ma e Matua haana he lagi ne omoomoi a ia ke onoono ke he fekafekauaga haana ko e punaaga he fakahauhau mo e fiafia lahi ka e nakai ko e peehiaga matematekelea. (Ioane 4:34) Ne fakamatala e tau Kerisiano he senetenari fakamua mo e fakamakutu, falanaki ki a Iehova, mo e eketaha ke nakai fakalolelole. (Gahua 5:41, 42; 2 Kori. 4:1; 2 Timo. 4:17) He manamanatu fakahokulo ke he tau fakafifitakiaga pihia ka lagomatai a tautolu ke onoono hifo ki a tautolu ni mo e foliaga ke fakaholo ki mua e kakano uho he fekafekauaga tapu ha tautolu.
3. Ko e ha kua nakai lata ia tautolu ke fakateaga ke taute fakamafiti e tau hikihikiaga kua lata?
3 Kia Fakahakohako e Tau Lekua: Mooli ai, kua nakai aoga ma tautolu ke onoono ke he fakaata ti nakai fakakia e lekua. Maeke ia tautolu ke ole ki a Iehova ke lagomatai a tautolu ke kitia mooli e tautolu a tautolu ti lagomatai ke taute e tau hikihikiaga kua lata. (Sala. 139:23, 24; Luka 11:13) Ha kua tote fakahaga e magaaho ti putoia e tau momoui, kua nakai lata ia tautolu ke fakateaga ke taute fakamafiti e tau hikihikiaga kua lata.—1 Kori. 7:29; 1 Timo. 4:16.
4. Ko e heigoa ne tupu ke he tagata ne kikite ke he Kupu he Atua ti taute e hikiaga ke he tau mena ne mailoga e ia?
4 Ko e tagata he loto—ko e mena ne onoono a Iehova ki ai—kua mua atu e aoga ke he foliga haana i fafo. (1 Pete. 3:3, 4) Ko e heigoa ne tupu ke he tagata ne kikite ke he Kupu he Atua ti taute e hikiaga ke he tau mena ne mailoga e ia? “Kua nakai fanogonogo fakanimonimo e tagata ia, ka kua eke e ia e gahua, to monuina e ia ke he hana omaoma.” (Iako. 1:25) Ē, to fiafia po ke monuina a tautolu ti eke mo tau fekafekau lauia mitaki ‘kua fakaata ke he lilifu he Iki,’ ko Iehova.—2 Kori. 3:18.