Ko e Heigoa e Agahala?

Tali he Tohi Tapu

Ko e agahala ko e ha mena ne taute, logonaaga, po ke manatu ne nakai fetataiaki mo e tau puhala he Atua. Putoia ai e moumou he tau matafakatufono he Atua he taute e mena kua hepe, po ke nakai tonu ke he fofoga he Atua. (1 Ioane 3:4; 5:17) Fakamaama foki he Tohi Tapu ko e tau agahala ko e kaumahala ke taute e mena kua hako.​​—Iakopo 4:17.

He vagahau fakamua he Tohi Tapu, ko e tau kupu ma e agahala kua kakano “nakai hokotia ke he fakamailoga,” po ke foliaga. Ma e fakatai, ko e matakau tau i Isaraela i tuai ne makaka he liti e maka he filo ne “hokotia tumau ke he foliaga.” Ko e talahauaga ia ka fakaliliu kua fakakakano ai ke he puhala “to nakai agahala.” (Tau Fakafili 20:16) Ke agahala kua kakano nakai hokotia ke he fakamailoga he tau tuaga mitaki katoatoa he Atua.

Ha ko e Tufuga, kua ha ha he Atua e tonuhia ke fakatū e tau fakatonuaga ma e tau tagata. (Fakakiteaga 4:11) Kua fai fakavēaga a tautolu ke he Atua ma e tau gahua ha tautolu.​​—Roma 14:12.

Maeke kia ke kalo kehe katoatoa he agahala?

Nakai. Pehē e Tohi Tapu kua “hala e tau tagata oti kana, to nakai hoko ke he fakahekeaga mai he Atua.” (Roma 3:23; 1 Tau Patuiki 8:46; Fakamatalaaga 7:20; 1 Ioane 1:8) Ko e ha ne pihia ai?

Ko e tau tagata fakamua ko Atamu mo Eva ne nakai agahala a laua he kamataaga. Ha kua tufugatia a laua ke he fakatai mitaki katoatoa he Atua. (Kenese 1:27) Ka e galo ia laua e mitaki katoatoa he nakai omaoma ke he Atua. (Kenese 3:5, 6, 17-19) He magaaho ne fanafanau a laua, ne fakaholo age e laua e agahala mo e nakai mitaki katoatoa ki a lautolu. (Roma 5:12) Tuga ne talahau he Patuiki ko Tavita i Isaraela, “ne fanau au mo e mahani hepehepe.”​​—Salamo 51:5.

Fai agahala kia ne mua atu e kelea?

Ē. Ma e fakatai, pehē e Tohi Tapu ko e tau tagata taane i Sotoma i tuai ne “mahani kelea a lautolu, mo e hala lahi ni.” (Kenese 13:13; 18:20) Manamanatu ke he tolu e puhala ke mailoga e kelea po ke mamafa he agahala.

1. Kelea. Hataki he Tohi Tapu ki a tautolu ke kalo kehe he tau agahala fakalialia tuga e mahani feuaki, tapuaki tupua, kaihā, konahia, favale, kelipopo tagata, mo e taulatua. (1 Korinito 6:9-11; Fakakiteaga 21:8) Fakatatai he Tohi Tapu e tau mena nei ke he tau agahala he fakahanoa mo e nakai taute pauaki. Ma e fakatai, ko e tau kupu po ke tau gahua ne fakamamahi aki e falu. (Tau Fakatai 12:18; Efeso 4:31, 32) Ka e fakamafana he Tohi Tapu ki a tautolu ke nakai fakateaga ke he ha agahala ha kua takitaki atu ai ke he moumouaga hagahaga kelea lahi he tau matafakatufono he Atua.​​—Mataio 5:27, 28.

2. Logonaaga. Falu agahala kua taute he nakai iloa e tau mena ne manako e Atua. (Gahua 17:30; 1 Timoteo 1:13) He nakai tokanoa e tau agahala pihia, fakakite he Tohi Tapu e kehekehe he tau agahala ne taute pauaki ke moumou e tau matafakatufono he Atua. (Numera 15:30, 31) Ko e tau agahala pauaki ne puna mai he “loto kelea.”​​—Ieremia 16:12.

3. Taute tumau. Fakakite foki he Tohi Tapu e kehe he taha e agahala mo e leva e taute e agahala. (1 Ioane 3:4-8) “Kaeke kua hala a [l]autolu mo e loto ki ai,” pete he iloa e mena hako ke taute ka moua e fakahala lahi mahaki he Atua.​​—Heperu 10:26, 27.

Ko lautolu ne agahala kua mamafa e tau loto ha ko e pehia he tau hehē ha lautolu. Tuga anei, tohi he Patuiki ko Tavita: “Kua hoko ni haku a tau hala ki luga hoku ulu; ne tuga e kavega mamafa, kua pehia ai au.” (Salamo 38:4) Ka e foaki he Tohi Tapu e amaamanakiaga: “Kia tiaki e ia ne mahani kelea hana mahani, mo e tagata mahani hepehepe kia tiaki e ia hana tau manatu; ti liu atu a ia kia Iehova, ti fakaalofa mai a ia kia ia; kia liu atu a ia ke he Atua ha tautolu, ha ko e mena to fakamagalo fakalahi mai e ia.”​​—Isaia 55:7.