Olwimbo lwa Solomona
4 Mwanze waghe, uli mubuya.
Uli mubuya!
Ameso waghu akalangirika omo kitambara kyaghu ng’ameso w’ehirikuku.
Esyonzwiri syaghu siri ng’ekihangulo ky’esyombene
Esikandaghala oko bitwa bye Gileadi.
2 Ameno waghu ali ng’ekihangulo eky’esyombuli
Esyo bakalua eritwako obweya,
Esikalua okw’inabibwa.
Esyosi sibutire ebyana bibiri-bibiri,
Sihali n’enguma ya kusyo eyabiriherya ekyana kyayo.
3 Eminywa yaghu yiri ng’euzi y’engula,
Emibughire yaghu ikatsemesaya kundu,
N’amatema waghu akalangirika omo kitambara ng’ekihande ky’eritunda ry’amakomamanga.
4 Ebikya byaghu biri ng’enyumba nyiri-nyiri ya Daudi
Eyihimbire omo mabwe awatondekire ndeke,
Okuhanikire esyongabo 1 000,
Esyongabo syosi sy’omuviringo sy’abalume b’amaka.
5 Amabere waghu abiri ali ng’ebyana bibiri by’engabi,
Ehyana hibiri hy’engabi, ehihasa,
Ehinemulya ebiti omo kati-kati k’amawa w’elise.*
6 “Embere akahunga kabuhirire,
N’embere ebitsutsu bibulirane,
Ngendiya oko kitwa ky’amane-mane n’oko kitwa ky’oubani.”
7 “Mwanze waghe, uli mubuya eritsuka oko syonzwiri erihika oko syonyala.
Sighuliko bulema.
8 Muheruki waghe asa tulue e Lebanoni yo haghuma,
Unikwame, tulue e Lebanoni.
Undaghale ukalua oko singyi y’ekitwa kye Amana,*
Undaghale ukalua oko singyi y’ekitwa kye Seniri,
Undaghale ukalua oko singyi y’ekitwa kye Hermoni,
Ulue aho esyosimba sikabundama.
Ulue omo bitwa by’esyosoro.
9 Mwali wetu, muheruki waghe wabiriheka omutima waghe,
Erinanisamalira, omutima waghe mwakalw’inyaghenda.
Erinasamalira akandu akali oko busanga bwaghu, omutima waghe mwakalw’inyaghenda.
10 Mwali wetu, muheruki waghe, olwanzo lwaghu lusihire kutsibu!
Olwanzo lwaghu lusihire kwilaba edivai.
Amaghuta waghu akakumba ndeke kulenga awandi maghuta wosi-wosi.
11 Eminywa yaghu yikatoghongako obuki.
Oko lulimi lwaghu kuli obuki n’amaziwa,
Esyongyimba syaghu sikakumba ndeke ng’ekikumbo kye Lebanoni.
12 Mwali wetu, omuheruki waghe, ali ng’akalima akatimbireko oluba oluliko ekifuli,
Akalima akaliko oluba oluliko ekifuli,
Engununuko eyiriko ekifuli.
13 Uli* ng’emitahi y’emiti y’amakomamanga eyiri omo paradiso,*
Eyikahetaya amatunda aghuwene,
Eyirimo ehiti hy’ekofere n’ebiti by’enardo.
14 Eyirimo enardo, esafroni, akane* n’omudalasini,
Yirimo n’emiti yosi y’oubani, amane-mane n’eudi n’emihanda yosi y’ebiti ebikakumba ndeke
15 Uli ng’akusi akali omo kalima,
Eribulu* ery’amaghetse awasihire,
Ehyusi ehikalua e Lebanoni.
16 Ubuke iwe rihunga ry’oko luhande lw’endata;
Asa iwe rihunga ry’oko luhande lw’eyikwa.
Ubuhirire oko kalima kaghe,
Ekikumbo ekyuwene ky’akalima ako kiyitsatsange.”
“Omwanze waghe ingire omo kalima kiwe,
Alye amatunda wa muko aghuwenenga.”