Yeremia
51 Bino byo Yehova akabugha:
“Ngendileta erihunga erikatsandaya
Oko muyi we Babiloni n’oko bikalani be Leb-kamai.*
2 Ngendituma e Babiloni y’abakaghulukaya,
Bakendimughulukya n’eribugha omo kihugho kiwe mw’ebyosi;
Bakendisyasira oko syombande syosi bakasyalwa naye omo kiro ky’obuhanya.
3 Oyukaghusa emisali isyakondomaya* obuta* bwiwe.
Kandi isihabya omundu oyukimana inianambite erikoti riwe ry’ekyuma.
Isimwakwira abalwana biwe b’obulighe.
Mubugheho abasuda biwe bosi.
4 Bakendisyawa, ibabiriholera omo kihugho ky’Abakaldayo,
Ibabiritobongolwa omo syonzira sye Babiloni.
5 Kundi Israeli na Yuda si bakwirwa, kundi oMungu wabo, Yehova w’emilondo aneho.
Aliwe ekihugho* kyabo kiswiremo amakosa omo meso w’Omubuyirire we Israeli.
6 Mutibite, mulue e Babiloni,
Mubalaye engebe* yenyu.
Isimwahola busana n’ekosa yabo.
Kundi endambi ya Yehova y’eriyituhulirya yabirihika.
Anemuliha Babiloni busana n’ebyo akola.
7 Babiloni yabya kikombe ky’ehoro omo byala bya Yehova;
Babiloni mwatamirya ekihugho kyosi.
Ebihanda mubyanywa edivai yiwe;
Ekyo kyabirileka ebihanda ibyaghunga.
8 E Babiloni muyikatera kitsumbukirania n’eritsutsangika.
Musimbe busana naye!
Muyarondaye ezeri eyikendibugha obulumi bwiwe; obundi anganalama.”
9 “Mutwapima erilamya Babiloni, aliwe mwatalama.
Mumuleke, tughende, obuli mundu asube omo kihuhgo kiwe.
Kundi ekosa yiwe yabirihika elubula;
Yiri endata ng’ebitu.
10 Yehova abiritukolera ebitunganene.
Mwase, tuyatulaghanaye e Sioni ebyo Yehova oMungu wetu alyakola.”
11 “Mutalaye* emisali; mwimaye esyongabo sy’omuviringo.*
Yehova abirihira omo bami b’Abamedi mw’amalengekania w’eriyalwa,
Kundi anzire eritsandya omuyi we Babiloni.
Kusangwa Yehova akendiyituhulirya, akendiyituhulirya busana n’ehekalu yiwe.
12 Muhande omuti owakendikangania ah’erihindana embere muyatsandaye esyombimbo sye Babiloni.
Muteghaye kutsibu, muhireyo abateya.
Muhireyo abalume abakalimbaya.
Kundi Yehova abiripanga emyatsi nga yikendibya yiti,
Syendibula eribererya ebyo alagha erikolera abikalani be Babiloni.”
13 “Iwe mukali, iwe wikere oko maghetse manene,
Iwe uwite oko bindu bingyi by’obughuli,
Omwiso waghu abirihika, n’endundi eyo ukabana yabiritwirya aho.
14 Yehova w’emilondo abirilapa omo rina riwe ati,
‘Ngendikusulyamo abalume, abanene ng’esyongyike,
Bakendibungya babikusinga.’
15 Iye yo wahangyika ekihugho omo kaghala kiwe,
Iye yo wahiraho ekitaka ekikerako akalyo omo menge wiwe
Kandi n’iye yo wasanza olubula omo menge wiwe.
16 Omughulu akowisaya omulenge wiwe,
Amaghetse w’omo lubula akaghunga,
Kandi akaleka ebitu* ibyeruka bikalua oko mipaka y’ekihugho.
Akaleka ihabya amapalyo embula ikawa.*
Kandi akalusaya erihunga ry’omo madepo wiwe.
17 Obuli mundu akakola lukiru-kiru kandi butsira bwenge.
Obuli muhesi akendihemuka busana n’esanamu eyo alyabatsa;
Kundi esanamu yiwe y’emetale eyo balyayeyukaya ni y’amabehi.
Esyosanamu esyo sisirimo kirimu.*
18 Esyosanamu esyo ni bule, ni bindu ebitolere erisekereribwa.
Sikendisyahwaho omughulu ekiro ky’eritswerasyo kikendisyahika.
19 Oyuli mwandu wa Yakobo syali ng’ebindu ebyo,
Kundi iye yo wahangyika ebindu byosi,
Na Israeli y’omutso w’omwandu wiwe.
Yehova w’emilondo ryo rina riwe.”
20 “Okw’ingye, uli ngoni y’erilwamo, ekindu ky’amalwa.
Kundi ngendikukolesya eribunanga ebihanda.
Ngendikukolesya eribughaho amami.
21 Ngendikukolesya eribunanga esabayiri* n’oyukaghenda oko sabayiri.
Ngendikukolesya eribunanga omutoka w’amalwa n’oyukaghendaya omutoka w’amalwa.
22 Ngendikukolesya eribunanga omulume n’omukali.
Ngendikukolesya eribunanga omusyakulu n’omulwana.
Ngendikukolesya eribunanga omulwana n’omumbesa.
23 Ngendikukolesya eribunanga omulisya n’ekihangulo kiwe.
Ngendikukolesya eribunanga omulimi n’esyonyama siwe esyo akalimamo.
Ngendikukolesya eribunanga abaguvernere n’abatabali bawatikya.
24 Kandi ngendisyaliha Babiloni n’abikalani bosi b’Ebukaldayo
Busana n’ebibi byosi ebyo bakolera e Sioni embere sy’ameso wenyu,” Yehova atya.
25 “Namakuhikako, iwe kitwa ekikatsandaya,” Yehova atya,
“Iwe ukatsandaya ekihugho kyosi.
Ngendikukakirya ebyala byaghe nitoke erikuha amalipizi, ngendikukumbaghalya erilua oko syonguka.*
N’erikuyira mo kitwa ekyabirihisibwa.”
26 “Abandu sibendisyakulusyako eribwe ry’oko ngonde* kutse eribwe ry’efondasyo.
Kundi ukendisyabya matongo kera na kera,” Yehova atya.
27 “Muhande omo kihugho mo muti owakendikangania ah’erihindana.
Mubuhe omo mahembe omo kati-kati k’ebihanda.
Musombole ebihanda ebikendilwa naye.*
Mubirikire amami we Ararati, we Mini, n’awe Ashkenazi asyalwe naye.
Mumuhirireho oyukahandika abakingira omo kisuda.
Mulete esyosabayiri* nene ng’esyongyike esiriko amahwa.
28 Musombole ebihanda ebikendilwa naye,*
Abami be Media, abaguvernere bayo, n’abatabali bawatikya bosi bayo
N’ebihugho byosi ebyo bakatabala.
29 Ekihugho kikendisyalabamo musiki n’eritimana.
Kundi ebyo Yehova apangira Babiloni bikendisyabererera:
Eriyira ekihugho kye Babiloni mo kindu ekikita obuba, omwanya owatemo mundu.
30 Abasuda be Babiloni babirileka erilwa.
Bikere omo myanya yamo eyo mundu ate angahikamo bweghu-bweghu.
Akaghala kabo kahwere.
Babiribya ng’abakali.
Amanyumba wamo abirihisibwa omo muliro.
Ehikale hyamo hyabiritsutsangwa.
31 Omutumwa* mughuma akatibita akayahindana n’oghundi mutumwa,
N’omutula-ngulu mughuma akatibita akayahindana n’oghundi mutula-ngulu,
Atoke eriyabwira omwami we Babiloni ngoko omuyi wiwe abirihambwa oko syombande syosi,
32 Ngoko ebisokero byabirihambwa,
Ngoko amato awakokotibwe omo risesa* abirihisibwa,
Kandi ngoko abasuda babirisagha kutsibu.”
33 Kundi Yehova w’emilondo, oMungu we Israeli, ati:
“Omumbesa we Babiloni ali ng’ekihumbiro.
Eno ni ndambi y’erimulyatangira atoke eribasa.
Hakisiya hake endambi y’erimughesa iyahika.”
34 “Omwami Nebukadneza* we Babiloni abirinitomera;
Abirileka inahandabuka.
Abirinikirya ng’ekindu ekitemo kindu.
Abirinitomera ng’enzoka nene;
Abiryusulya omo nda yiwe mw’ebindu byaghe ebyuwene.
Abirinisenderya hali.
35 ‘Obutsururu obo banikolera n’obo bakolera omubiri waghe bwase oko Babiloni!’, omwikalani we Sioni atya.
‘N’omusasi waghe abye omo mutwe w’abikalani b’Ebukaldayo!’, Yerusalema atya.”
36 Yehova ati:
“Ngendibalwirako,
Ngendibatuhulirya.
Ngendyumya engetse ye Babiloni n’eryumya amabulu wamo.
37 Babiloni akendisyabya kilundo ky’amabwe.
Obwikalo bw’emyondo.*
Ekindu ekikita obuba n’ekindu ky’erisughundira,
Simwendisyasyikala omundu.
38 Abosi kughuma bakendisyaruruma ng’esyosimba esikine silere.
Bakendisyaruruma ng’ebyana by’esyosimba.”*
39 “Omughulu esyongumbu syabo sikendisyakanya, ngendisyabakolera efete n’eribatamirya,
Batoke eriyisyandira;
Enyuma sy’aho, bakendisyayato ehighotseri ehitehwa
Sibendisyalua muhyo,” Yehova atya.
40 “Ngendisyabandaghalya ng’ebyana by’esyombuli ebikayakerawa,
Ng’esyombangale n’esyombene.”
41 “Iyooo! Sheshaki* abirihambwa,
Ekindu ekyabya kikapipwa n’abandu bosi b’oko kihugho ky’abirihambwa!
Babiloni abiribya kindu ekikita obuba omo kati-kati k’ebihanda!
42 Engetse yabirisambira endata oko Babiloni.
Abiriswikwa omo bisunda binene.
43 Emiyi yiwe yabiribya kindu ekikita obuba, ekiharo ekitemo amaghetse kandi yabiribya embwarara.
Ekihugho ekyo mundu ate angikalamo kandi ekyo mundu ate angalabamo.
44 Ngendihera Beli y’amalipizi e Babiloni,
N’ebyo abirimera, ngendisyamusalyabyo.
Ebihanda sibyendisyasyaya eyo ali,
N’oluhimbo lwe Babiloni lukendisyatera.
45 Mulue omo kati-kati kiwe, inywe bandu baghe!
Mubalaye engebe* yenyu kundi Yehova abirihitana kutsibu!
46 Engulu eyo mukendisyowa omo kihugho isiyasyababuna mutima kutse eribasaghisya.
Hakendibya habihwa omwaka mughuma, imwowa engulu,
N’oko mwaka owakwamire, hakendisyabya eyindi ngulu,
Engulu y’obutsururu omo kihugho n’engulu y’omutabali akalwa n’oghundi mutabali.
47 Busana n’ekyo, muhulikirire! Ebiro binemwasa
Omughulu ngendisyaha amalipizi w’esyosanamu esibatsire sye Babiloni.
Ekihugho kiwe kyosi kikendisyahemuka,
N’ebinda biwe byosi bikendisyawa omo muyi.
48 Olubula n’ekihugho n’ebyosi ebirimo
Bikendisyayisyandira busana ne Babiloni,
Kundi abatsandya bakendisyasyalwa naye bakasira oko luhande lw’endata,” Yehova atya.
49 “Babiloni mwaterya ebinda by’Abaisraeli
Aliwe kandi omo Babiloni mo binda byosi by’oko kihugho byaterera.
50 Inywe mulyabala oko muyali, mulole embere, isimwimana!
Mwibuke Yehova imune ehali,
Isimwibirirawa e Yerusalema.”
51 “Twabirihemulwa, kundi mutukowa akasekereryo.
Amusu wetu abirihemuka,
Kundi abandu b’omo bindi bihugho* babirisyalwa n’emyanya eyibuyirire y’omo nyumba ya Yehova.”
52 “Busana n’ekyo, muhulikirire! Ebiro binemwasa,” Yehova atya.
“Omughulu oyo, ngendisyaha esyosanamu esibatsire sy’amalipizi,
N’abandu abalyahutala bakendisyasimbira omo kihugho kiwe kyosi.”
53 “Nomo e Babiloni yangahetukira elubula,
Nomo yangawatya ehileberyo hyayo ehyo mundu ate angahikamo bweghu-bweghu,
Ngendisyatuma abakendisyatsandya omuyi oyo,” Yehova atya.
54 “Muhulikirire! Emilenge-lenge inemwasira e Babiloni,
Efuyo y’obuhanya bunene inemulua omo kihugho ky’Abakaldayo,
55 Kundi Yehova anemutoghotya Babiloni,
Akendihunia omulenge wiwe munene,
N’ebisunda byabo bikendihuha ng’amaghetse manene.
Abandu bakendyowa efuyo y’omulenge wabo.
56 Kundi omutsandya akendisyasyalwa ne Babiloni;
Abasuda biwe bakendisyahambwa.
Obuta* bwabo bukendisyatsutsangwa,
Kundi Yehova ni Mungu oyukaha obuli mundu y’amalipizi awamutolere.
Akendisyaliha obuli mundu.
57 Ngendisyatamirya abakulu bamo n’abandu bamo b’amenge,
Abaguvernere bamo, abatabali bawatikya bamo, n’abasuda bamo,
Neryo bakendisyaghotsera ehighotseri ehitehwa,
Sibendisyasyabuka,” Omwami oyo erina riwe ni Yehova w’emilondo atya.
58 Yehova w’emilondo ati:
“Oluhimbo lwe Babiloni, nomo lwangabya lunene, lukendihimbulwa olosi,
N’emilango yako, nomo yangabya miri, ikendihisibwa omo muliro.
Abandu bakendisyaluhira busa;
Ebihanda bikendisyayiluhya busana tu n’eritunda omuliro.”
59 Bino by’ebinywa ebyo omuminyereri Yeremia abwira Seraya mughala wa Neria, mughala wa Maaseya, omughulu Seraya aghenda e Babiloni haghuma n’omwami Zedekia we Yuda, omo mwaka w’akani w’obutabali bwa Zedekia; Seraya abya mwimaniri w’ebindu by’omwami. 60 Yeremia mwahandika omo kitabu mw’obuhanya bosi obwangahikire omuyi we Babiloni, mwahandika ebinywa byosi by’eritswera omuyi we Babiloni. 61 Kandi, Yeremia mwabwira Seraya ati: “Omughulu ukendisyasa e Babiloni n’erilola oko muyi we Babiloni, ukendisyasoma ebinywa ebyo omo mulenge muli. 62 Enyuma sy’aho, ukendisyabugha uti, ‘Yehova, muwabugha uti omwanya ono akendisyatoghotibwa kandi uti syendisyabyamo mwikalani wosi-wosi, omundu kutse enyama, kandi uti akendisyabya matongo kera na kera.’ 63 Ukendisyabya wabibugha erisoma ekitabu eki, iwabohera kukyo kw’eribwe, neryo iwaghusakyo omo kati-kati ke Efrati. 64 Enyuma sy’aho, ukendisyabugha uti, ‘Babiloni kw’akendisyatobera atya kandi syendisyasyahangana busana n’obuhanya obo ngendimuletera; kandi bakendisyaluha.’”
Ebinywa bya Yeremia byamahweraho.