Hosea
7 “Omughulu ngasonda erilamya Israeli,
Ekosa ya Efraimu nayo yikalw’iyalangirika,
Kutya n’obubi bwa Samaria.
Kundi babeghere emyatsi y’amabehi;
Abibi bakatula amanyumba n’ababandi ibayiba.
2 Aliwe sibangalengekania n’ahake bati ngendisyibuka obubi bwabo bosi.
Neryo lino, emikolere yabo yosi yabiribatimbako;
Emikolere yabo yilwir’iyabya embere sy’obusu bwaghe.
3 Bakatsemesaya omwami omo bubi bwabo
Bakatsemesaya n’abakulu omo myatsi yabo y’amabehi.
4 Abosi ni basingiri,
Bakahisaya ng’eriko eryo oyukahuka emikati abirihiramo muliro,
Eryo abirileka eritunda omuliro waryo abiponda-ponda efarine, akalinda yibimbe.
5 Abakulu babirilwala omo kiro ky’omwami wetu;
Babiritsuruma busana n’erinywa edivai.
Omwami abiriha abakasekereraya b’ebyala.
6 Kundi bakasa emitima yabo iyabiryaka ng’eriko.
Omo kiro kyosi, oyukahuka emikati akabya inianaghotsere;*
Omo tututu, eriko rikaka ng’omuliro owabirighulumira.
7 Abosi bahuhire ng’eriko,
Bakatomera abasondoli* babo
Abami babo bosi babiritera;
Sihali n’oyukanisaba obuwatikya.
8 Efraimu abiritswangana n’ebihanda.
Efraimu ali ng’egato y’omuviringo eyo batalyabindula.
9 Abagheni babiribugha akaghala kiwe, aliwe syetaminya.
Abiribyako esyombwi, aliwe syetaminya.
10 Emiyiheko ya Israeli yabirikangania ngoko ni w’amakosa,
Aliwe sibetasubira Yehova oMungu wabo.
Kandi n’omo bine bitya, sibetamusondya-sondya.
11 Efraimu ali ng’akalikuku kakiru, akatawite bwenge.*
Mubasaba ekihugho kye Misri bati kibawatikaye; mubasaba ekihugho kye Asiria bati kibawatikaye.
12 Nomo bangayahi, ngendisyasanza obutimba bwaghe okw’ibo.
Ngendisyabakimia ngoko mundu akakimaya esyonyunyu sy’omo kyanya.
Ngendisyabaha amalipizi ogho nababwira niti bakendisyahabwa.
13 Bulighe okw’ibo, kundi mubatibita ehali okw’ingye.
Batoghotibawe, kundi mubanikosera.
Nabya inine tayari erikombolabo, aliwe mubanibughako amabehi.
14 Mubatanisaba obuwatikya n’omutima wabo wosi,
Aliwe ibanemusimbira oko syongyingo syabo.
Kundi babya bakayisara-sara busana n’engano yabo n’edivai yabo nyihya-nyihya.
Mubanileka.
15 Munakungabo n’erikalya-kalya amaboko wabo,
Aliwe mubalwa naghe n’erinisohera emyatsi mibi.
16 Mubabindula emighendere yabo, aliwe mubatakola batya busana n’eriya eyiri ekindu ekiri endata okw’aho;*
Sibabya b’eriyiketerwa ng’obuta* obutawatire.
Abakulu babo bakendikwa omo muyali busana n’olulimi lwabo olulimo erighundu.
Ekyo kyo kikendileka ibabya ekindu ky’erisekererya omo kihugho kye Misiri.”