Amosi
7 Bino byo Yehova Omukama Mukulu oko Bosi anikanganaya: Mwatuma ekikuto ky’esyongyike omughulu ebyalya ebikaherawa omughulu w’embeho nene byatsuka erilasa.* By’ebyalya ebyaherawa ebiti ebyo mwami abya akaha esyonyama siwe byabitwibwa. 2 Ekikuto ky’esyongyike mukyabya kyabirya ebyalya byosi by’omo kihugho, munabugha niti: “Yehova Omukama Mukulu oko Bosi, kisi ghanyira abandu baghu! Yakobo akendibala* ati? Kundi aleghetsene!”
3 Neryo Yehova mwayisubako.* Yehova mwabugha ati: “Ebyo ulyalangira sibyendihika.”
4 Bino byo Yehova Omukama Mukulu oko Bosi anikanganaya: Yehova Omukama Mukulu oko Bosi mwabirikira omuliro atoke eriha abandu biwe b’amalipizi. Omuliro oyo mwahisya amaghetse manene kandi awalimo omutobero. Mwahisya ekiharo ky’oko kihugho. 5 Neryo munabugha niti: “Yehova Omukama Mukulu oko Bosi, kisi lekeraho. Yakobo akendibala* ati? Kundi aleghetsene!”
6 Neryo Yehova mwayisubako.* Yehova Omukama Mukulu oko Bosi mwabugha ati: “Ebyo nabyo sibyendihika.”
7 Bino byo anikanganaya: Yehova abya inianimene oko luhimbo olwahimbawa omo kamba y’eripima ekindu nga kinalungukere.* Nomo byala biwe mwabya ekamba y’eripima ekindu nga kinalungukere. 8 Neryo Yehova mwanibulya ati: “Amosi, wamalangiraki?” Neryo munamusubirya niti: “Namalangira ekamba y’eripima ekindu nga kinalungukere.”* Neryo Yehova mwanibwira ati: “Ngendihira ekamba y’eripima ekindu nga kinalungukere omo bandu baghe Abaisraeli. Sinendisyasyabaghanyira. 9 Emyanya y’endata ya Isaka ikendisyatsandibwa, n’emyanya mibuyirire y’Abaisraeli ikendisyatsandibwa; ngendisyalwa n’ekihanda kya Yeroboamu omo muyali.”
10 Amazia omuhereri we Beteli mwatumira omwami Yeroboamu we Israeli y’omulaghe ono: “Oko ndambi eno Amosi anemukuhotera omo kati-kati k’ekihanda kya Israeli. Ekihugho sikyangavumilia ebyosi ebyo akabugha. 11 Kundi bino byo Amosi abiribya akabugha: ‘Yeroboamu akendisyahola omo muyali, n’oko kwenene-kwenene Abaisraeli bakendisyalusibwa omo kihugho kyabo n’eritwalwa omo bunyewa.’”
12 Neryo Amazia mwabwira Amosi ati: “Iwe mulangiri, ughende, utibitire omo kihugho kye Yuda. Usondayeyo omubiiri owakendibya akakuwatikya eribana eky’eririrya,* kandi eyo yo uyabughire obuminyereri. 13 Aliwe uleke eribughira obuminyereri e Beteli, kundi e Beteli ni habuyirire h’omwami kandi ni nyumba y’obwami.”
14 Neryo Amosi mwasubirya Amazia ati: “Sinabya muminyereri kandi sinabya mughala w’omuminyereri, aliwe nabya mulisya w’esyombuli, kandi nabya ngasugha emiti y’esyotini.* 15 Aliwe ininemutsunga esyombuli, Yehova mwanibirikira, kandi Yehova mwanibwira ati: ‘Uyabwire abandu baghe Abaisraeli b’obuminyereri.’ 16 Neryo sasa, hulikirira ekinywa kya Yehova: ‘Unemubugha uti: “Isiwabugha oko Baisraeli k’obuminyereri obukakanganaya ngoko bakendihikirwa n’obuhanya, kandi isiwahubiraya uti obuhanya bukendihikira ekihanda kya Isaka.” 17 Neryo Yehova ati: “Omukali waghu akendibya mumbalaka w’omo muyi, n’abaghala n’abali baghu bakendisyakwa omo muyali. Ekitaka kyaghu kikendisyaghabwa omo kamba y’eripimamo, naghu ukendisyaholera omo kihugho ekiterire; na Israeli akendisyalusibwa omo kihugho kiwe n’eritwalwa omo bunyewa.”’”