Eribisulirwa eryo Yohana ahabawa
18 Enyuma sy’aho, munalangira oghundi mumalaika akalua elubula. Abya n’obutoki bunene, n’olukengerwa lwiwe mulwakolerya ekihugho. 2 Kandi mwabugha omo mulenge muli ati: “Abiritera! Babiloni Mukulu abiritera, kandi abiribya obwikalo bw’esyombinga n’obwikalo bw’ekirimu* kyosi-kyosi ekituwene, n’enyunyu yosi-yosi eyituwene n’eyiponirwe.” 3 Kundi busana n’edivai yiwe eyikaleka omundu iniabya n’engumbu nene y’oburaghane,* ebihanda byosi byabirikola oburaghane. N’abami b’ekihugho babirikola oburaghane naye. N’abakomersa* b’ekihugho babiribya bateke busana n’ebindu binene by’obughuli ebyo mukali oyo abiritunda, kandi syalikwa esisoni sy’eriyira oko bindu binene ng’ebyo.”
4 Kandi munowa oghundi mulenge akalua elubula. Mwabugha ati: “Mulweyo, bandu baghe, mwamabya isimwanzire erikola oko malolo wiwe, kandi mwamabya isimwanzire eribana oko malipizi agho akendihabwa. 5 Kundi amalolo wiwe abirikanyirira erihika elubula, kandi oMungu abiryibuka emikolere yiwe eyitatunganene.* 6 Mumukolere ngoko abya akakolera abandi. Mumulihe ngendo kabiri ebyo abya akakola. Ekikombe* ekyabya akatswangalikaniamo obwabu, mumuhekyo kabiri. 7 Abiriyipipa kutsibu, kandi abiritunda ebindu binene, kandi syalikwa esisoni busana n’ebindu ebyo. Neryo mumughalaye erihika omo lulengo olo, kundi akabya inianemubugha omo mutima wiwe ati: “Nikere ng’omughole, sindi mukwirwa. Kandi sinendisyabya omo kiriro.” 8 Busana n’ekyo, amalipizi wiwe akendisyasa omo kiro kighuma: Oluholo, ekiriro, n’enzala. Kandi akendisyahisibwa n’erihwererera, kundi Yehova* Mungu oyukamutswera awite akaghala.
9 “Abami b’ekihugho abakola oburaghane* naye kandi ababya bakalya oko bindu binene ebyatunda butsir’ikw’isoni, omughulu bakendisyalangira omuki owakalua omo muliro owakamuhisaya, bakendisyalira n’eriyibandanga oko kikuba bakamukwira obulighe. 10 Bakendisyimana hali busana n’erisagha bakatalangira ngoko akataghalibawa, n’eribugha bati: ‘Kingaha sikibya, kingaha sikibya. Ka ulue muyi munene. Babiloni, omuyi owasikire, wamalw’iwatsandibwa omo saha nguma!’
11 “N’abakomersa b’ekihugho bakendisyalira n’erisusumana busana naye, kundi sihali oyukendisyaghula ebindu byabo: 12 Ehoro, efeza,* amabwe w’obughuli bunene, esyolulu,* ekitani ekyuwene, esyongyimba sy’erangyi y’olubono-bono,* esyongyimba sy’esilke, esyongyimba sy’erangyi y’omusasi eyihenirye,* n’ebindu byosi ebikokotibwe omo muti owakakumba ndeke, n’ebindu byosi ebikokotibwe omo mahembe w’esyotembo, omo muti w’obughuli bunene, omo kwivre,* omo kyuma, n’omo mabwe w’amarbre,* 13 n’omudalasini, akati akakakumba ndeke ke India, obukwa, amaghuta awakakumba ndeke, oubani, edivai, amaghuta w’emizeituni, efarine eyuwene, engano, esyonde, esyombuli, esyosabayiri,* emitoka, abakobe, n’engebe y’abandu.* 14 Ebindu ebyuwene* ebyo mutima waghu abya anzire byabirikuluako. Ebyalya byosi ebisihire, n’ebindu byosi ebyuwene nga, byabirikuluako. Siwendisyasyasungabyo.
15 “Abakomersa ababya bakaghulya ebindu ebyo, ababya bateke busana naye, bakendisyimana hali busana n’erisagha bakalangira ngoko akaghalibawa. Bakendisyalira n’erisusumana, 16 n’eribugha bati: ‘Kingaha sikibya, kingaha sikibya. Ka ulue muyi munene. Ighukambala esyongyimba sy’ekitani ekyuwene, sy’erangyi y’olubono-bono,* n’esy’erangyi y’omusasi eyihenirye.* Kandi ighukapambawa omo bindu by’ehoro, omo mabwe w’obughuli bunene, n’esyolulu.* 17 Aliwe, obuteke bunene ng’obo bwamabiheribwa omo saha nguma nyisa!’
“N’obuli mundu oyukaghendaya obwato, oyukaghenda omo bwato, n’abakakola emibiiri y’omo bwato, n’abosi abakabana ebyo balaghireko busana n’engetse bakendisyimana hali. 18 N’omughulu bakendisyabya bakalebya omuki owakalua omo muliro owakamuhisaya, bakendisyalira n’eribugha bati: ‘Hane hatabya omuyi munene ng’oyu?’ 19 Bakendisyaghusa olututu oko mitwe yabo. Bakendisyalira, erisusumana, n’eribugha bati: ‘Kingaha sikibya, kingaha sikibya. Ka ulue muyi munene. Abosi ababya n’amato mubabya bateke busana n’obuteke bwaghu. Aliwe, omo saha nguma nyisa, wamabiheribwa!’
20 “Iwe lubula, ababuyirire, abakwenda, n’abaminyereri mutseme, busana n’ebiryamuhikira, kusangwa oMungu abirimutswera busana nenyu!”
21 Kandi omumalaika w’obutoki mwasumba eribwe eriri ng’oluso lunene. Neryo mwaghusaryo omo ngetse n’eribugha ati: “Babiloni omuyi mukulu kwasyaghuswa atya, kandi syendisyasyasungika n’ahake.” 22 Emilenge y’abimbi abakimba bakawata esyonanga, y’abakawata emizike, y’abakabuha esyonyabulere, n’abakabuha omo syongunga siyendisyasyowika omw’iwe, n’omufundi wosi-wosi syendisyasyasungika omw’iwe, n’omulenge w’oluso syendisyasyowika omw’iwe. 23 Ekyakakala ky’etala sikyendisyasyakolerya omw’iwe. N’omulenge w’abalunga syendisyasyowika omw’iwe, kundi abakomersa baghu babya bakulu omo kihugho, kandi muwaherya ebihanda byosi omo busaki bwaghu. 24 Kandi omusasi w’abaminyereri, w’ababuyirire, n’ow’abosi abitibawa oko kihugho mwasungika omw’iwe.”