Ezekieli
3 Neryo mwambwira ati: “Mughala w’omundu, ulye ekiri embere syaghu.* Ulye ekitabu ky’erilinga eki, neryo ughende, ubughe n’ekihanda kya Israeli.”
2 Neryo munatanda obuno bwaghe, naye mwanilisya ekitabu ky’erilinga ekyo. 3 Neryo mwasyanibwira ati: “Mughala w’omundu, ulye ekitabu ky’erilinga eki ekyo ngakuha, wusulayekyo omo nda yaghu.” Neryo munatsuka eriryakyo, nakyo mukyasihirira omo buno bwaghe ng’obuki.
4 Mwanibwira ati: “Mughala w’omundu, ughende eyiri abandu b’enyumba ya Israeli ubwirebo ebinywa byaghe. 5 Kusangwa sighulitumawa oko bandu abakabugha omubughe owakalire kutse omubughe owatasibwe, nikwa ukatumawa oko kihanda kya Israeli. 6 Sighulitumawa oko bihanda bingyi ebikabugha omubughe owakalire kutse omubughe owatasibwe, owalimo ebinywa ebyo ute wangowa. Namabikutuma oko bihanda ebyo, ibikendikuhulikirira. 7 Aliwe ekihanda kya Israeli kikendighana erikuhulikirira kusangwa sibalyanza erinihulikirira. Abosi ab’enyumba ya Israeli ni b’emitwe eyikalire n’ab’emitima eyikalire. 8 Lebaya! Nabirileka obusu bwaghu bukale ng’amusu wabo n’erikalya embumo yaghu ng’esyombumo syabo. 9 Nabiriyira embumo yaghu ng’ediama, erikala kutsibu kwilaba eribwe ry’omutwero. Isighubahabo kutse omutima waghu isyahahuka busana n’amusu wabo, kusangwa ni kihanda ky’abandu abakayisamambula.*
10 Kandi mwasyambwira ati: “Mughala w’omundu uhulikirire ndeke kandi uhambe ndeke ebinywa byosi ebyo ngakubwira. 11 Ughende eyiri abanyeghawa b’abandu* baghu ubughe nabo. Ubwirebo uti, ‘Yehova Omukama Mukulu oko Bosi ati,’ bowe kutse baghane eryowa.”
12 Neryo ekirimu mukyaniheka, n’enyuma syaghe munowa omulenge w’erihuha ati: “Olukengerwa lwa Yehova lupipawe aho ali.” 13 Munowa omulenge w’ebipupa by’ebihangyikwa ebiriho bikatulanako, n’omulenge w’ebiringo abya aho lutambi kubyo, n’omulenge w’erihuha linene. 14 Neryo ekirimu mukyaniheka kyamanitwala. Munaghenda omo buhitane n’erikapikira omo kirimu, n’ebyala bya Yehova mubyanibyako n’amaka. 15 Neryo munaghenda eyiri abanyeghawa e Tel-abibu, aho babya bikere oko lusi lwe Kebari; munabya aho babya bikere omo biro 7 ininakukubere.
16 Ebiro 7 byabere byahwa, ekinywa kya Yehova mukyambikako kiti:
17 “Mughala w’omundu, nabirikusombola eribya muteya w’ekihanda kya Israeli. Neryo omughulu ukowa ekinywa ekikalua omo buno bwaghe, litolere iwanibwirirabo uti ohwee.* 18 Omughulu ngabwira omundu mubi niti, ‘Ahate eritika-tika ukendihola,’ aliwe ighutamukunga, kandi iwataluka eribugha, erikunga omundu mubi uti abinduke erilua oko syonzira siwe nyibi atoke eribyaho, omundu mubi oyo inyakendihola busana n’ebibi biwe, nikwa ingendisyakubulya omusasi wiwe.* 19 Aliwe wamabikunga omundu mubi, naye inyaghana erileka ebibi biwe n’enzira yiwe nyibi; omubi oyo inyakendihola busana n’ekibi kiwe, nikwa iwe oko kwenene, ukendisyalamya engebe yaghu.* 20 Nikwa omughulu omutunganene akasighanaya eritunganene liwe neryo inyakola ekibi, ngendisyahira ekindu ekikatwikalaya embere siwe naye akendisyahola; wamabya imughutamubwira* uti ohwee! akendisyahola busana n’erilolo liwe, n’eritunganene liwe siryendisyibukwa; nikwa ngendisyakubulya omusasi wiwe.* 21 Aliwe wamabya imuwakunga omutunganene uti isyakola erilolo, naye inyatakola erilolo, oko kwenene akendisyabyaho kusangwa mwakungwa; naghu ukendisyabya iwamabilamya engebe yaghu.”*
22 Inine aho, ebyala bya Yehova mubyambikako, naye mwambwira ati: “Hangana, uye omo ribanda,* n’eyo, ngendikania naghu.” 23 Neryo munahangana namaya omo ribanda.* Neryo lebaya! Olukengerwa lwa Yehova lwabyayo ng’olukengerwa olo nalangira oko lusi lwe Kebari, neryo munatulama oko kitaka. 24 Neryo ekirimu mukyaningiramo kyamanihangania, naye mwabugha naghe ati:
“Ughende, uyikingire omo nyumba yaghu. 25 Nikwa iwe mughala w’omundu, bakendikuhirako ebikoba n’erikuboha mubyo sighutoke erihuluka n’eriya omo kati-kati kabo. 26 Kandi ngendisyaleka olulimi lwaghu ilwamatira oko kyasasa ky’endata ky’obuno bwaghu, naghu ukendisyabya mumu isiwangatoka erihabulabo, kusangwa ni kihanda ekikayisamambula.* 27 Aliwe omughulu ngabugha naghu ngendisyabya ngakumbula obuno bwaghu, naghu litolere iwabya ukabwirabo uti, ‘Yehova, Omukama Mukulu oko Bosi ati.’ Oyukowa inyowa, n’oyukaghana eryowa inyaleka; kusangwa ni kihanda ekikayisamambula.*