Abalawi
21 Kandi Yehova mwabwira Musa ati: “Ubwire abahereri, abaghala ba Haruni uti, ‘Sihabye n’omughuma w’okw’inywe oyukayitsandaya busana n’omundu* oyulyahola omo kati-kati k’abandu biwe. 2 Aliwe anganakola atya busana n’omutunga wiwe wa hakuhi; mama wiwe, baba wiwe, omughala wiwe, omwali wiwe, n’omughala wabo; 3 kandi anganayitsandya busana na mwali wabo oyuli hakuhi naye amabya iniakine mubikira, kandi oyutewatahibwa. 4 Syangayitsandya n’eriyiyira mo yuterire busana n’omukali oyutahibwe n’omulume w’omo kati-kati k’abandu biwe. 5 Isibahala emitwe yabo kutse erisisa emisike-misike y’esyonderu syabo kutse eriyihirako esisako oko mibiri yabo. 6 Litolere ibabya babuyirire oko Mungu wabo kandi isibasyatsandaya erina ry’oMungu wabo, kusangwa bakaherera amahere wa Yehova awakahisibawa omo muliro, omukati* w’oMungu wabo; neryo litolere ibabya babuyirire. 7 Isibasyatahaya omumbalaka, omukali oyo wabiritsandibwa, omukali oyo wabiritwa endwa n’iba wiwe, kusangwa omuhereri abuyirire oko Mungu wiwe. 8 Litolere iwamuhighula kusangwa yukaherera omukati w’oMugu waghu. Litolere iniabya oyubuyirire okw’iwe, kusangwa ingye Yehova, oyukakuhighula,* nibuyirire.
9 “‘Omwali w’omuhereri amabiyitsandya omw’ikola obumbalaka, aho akabya iniamahemula baba wiwe; litolere iniatimibwa omo muliro.
10 “‘Omuhereri mukulu omo kati-kati k’abaghala babo, oyo amaghuta abuyirire* abiritulirwa oko mutwe wiwe kandi oyo wabirisingibwa,* n’eryambala esyongyimba esibuyirire, isyabya butsira erisugha omutwe wiwe kandi isyatulanga esyongyimba siwe. 11 Isyaseghera hakuhi n’ekinda* kyosi-kyosi. Syangayitsandya nibya busana na baba wiwe kutse mama wiwe. 12 Isyasyalua ahabuyirire kandi isyatsandaya ahabuyirire h’oMungu wiwe, kusangwa ekiminyikalo ky’erihighulwa, amaghuta awabuyirire* aw’oMungu wiwe ali okw’iye. Ingye indi Yehova.
13 “‘Litolere iniatahya omukali oyukine mubikira. 14 Isyatahaya omukwakali, omukali oyo wabiritwa endwa n’iba wiwe, omukali oyo wabiritsandibwa kutse omumbalaka. Nikwa litolere iniatahya omukali oyukine mubikira omo kati-kati k’abandu biwe. 15 Isyatsandaya abana* biwe omo kati-kati k’abandu biwe, kusangwa ingye indi Yehova oyukamuyira mo oyubuyirire.’”
16 Yehova mwalola embere eribugha na Musa ati: 17 “Ubwire Haruni uti, ‘Omulume wosi-wosi omo kati-kati k’abana baghu oyuliko obulema omo bizazi* byabo byosi, isyasyaseghera hakuhi ati akaherera omukati w’oMungu wiwe. 18 Omulume oyuliko obulema isyasyaseghera hakuhi; endimetime, kutse omulema, kutse ow’obusu obuliko obulema,* kutse oyuliko ekitsuko kiri oko kindi, 19 oyuliko ekisando ekibunikire kutse ow’ebyala ebibunikire, 20 oyuliko erikuku omo mughongo, kutse erikusi,* kutse ow’erisongo, kutse oyukwire olukerere,* amatungulu, kutse oyuwite ebiheghe ebitsandire. 21 Sihali omulume wosi-wosi oyuliko obulema omo kati-kati k’abana* ba Haruni omuhereri, oyo wangaseghera hakuhi ati akaherera Yehova y’amahere awakahisibwa omo muliro; kusangwa aliko obulema, syangaseghera hakuhi ati akaherera omukati w’oMungu wiwe. 22 Anganalya oko mukati w’oMungu wiwe erilua omo bindu ebibuyirire kutsibu, n’omo bindu ebibuyirire. 23 Nikwa syangaseghera hakuhi n’erido, kandi syangaseghera hakuhi n’ekiherero, kusangwa aliko obulema; siritolere akatsandya ahabuyirire haghe, kusangwa ingye indi Yehova oyukahighulabo.’”*
24 Neryo Musa mwakania na Haruni n’abaghala biwe n’Abaisraeli bosi.