Danieli

7 Omo mwaka w’ekwanza w’omwami Belshaza we Babiloni, Danieli mwalota n’erilangira esyonzoli inianaghotsere oko ngyingo yiwe. Enyuma sy’aho, mwahandika ebyo alota; mwahandika ebyosi. 2 Danieli mwabugha ati:

“Omo syonzoli esyo niryalangira omo kiro, mungalangira amahunga ani w’elubula inianemughungya engetse nene. 3 N’esyonyama ini nene-nene musikaluira omo ngetse eyo, sihalue enyama eyisosire eyindi.

4 “Enyama y’erimbere yabya ng’esimba, kandi yabya n’ebipupa ebiri ng’eby’erisamba. Ininemutungererayo, muyalusibwako ebipupa byayo; yamalusibwa omo kihugho n’erisumbirwa endata n’erimanibwa oko maghulu abiri ng’omundu, kandi muyahabwa omutima w’omundu.

5 “Kandi mungalangira eyindi nyama, ey’akabiri, yilue ng’edubu. Yilue iyimanire oko luhande lughuma, kandi yilue n’esyonganga isatu omo buno bwayo, omo kati-kati k’ameno wayo. Kandi mubakabwirayo ambu, ‘Hangana, ulye enyama nene.’

6 “Enyuma sy’aho, mungaendelea erisamalira. Neryo mungalangira eyindi nyama, eyiri ng’esoro, aliwe oko mughongo wayo kulue ebipupa bini ebiri ng’eby’akanyunyu. Enyama eyo yilueko emitwe ini, kandi muyikahabawa obutoki bw’eritabala.

7 “Enyuma sy’aho, ininemulangira esyonzoli sy’omo kiro, mungalangira enyama y’akani, yilue enyama eyikasaghisaya kandi eyikatitimanaya kandi eyiwite akaghala kanene kutsibu, kandi yilue n’ameno manene-manene w’ekyuma. Yilue ikatomera n’eriponda-ponda ebindu, n’ekilue kikasighala, yilue ikalyatangirakyo omo bisando byayo. Siyilue isosire esindi nyama syosi esyo niryatsuka erilangira, kandi yilueko amahembe 10. 8 Ininemutengerera amahembe ayo, mungalangira erindi rihembe, rike, rikalasa omo kati-kati kagho, n’amahembe asatu w’oko mahembe ogho niryatsuka erilangira mwakalusibawaho embere sy’erihembe rike eryo. Kandi mungalangira oko rihembe rike eryo ikune ameso awali ng’aw’omundu n’obuno obukabugha n’emiyiheko.*

9 “Inikinasamalira, mungalangira ebitumbi by’obwami bikahirwaho, n’Omusyakulu w’Ebiro mwakikala. Esyongyimba siwe silue sy’omusohe* ng’enzururu, n’esyonzwiri sy’oko mutwe wiwe silue ng’obweya bw’embuli obwerire. Ekitumbi kiwe ky’obwami kilue birimi by’omuliro; ebiringo byako bilue omuliro owakire. 10 Olusi lw’omuliro lulue ilunemusenda kandi lulue lukalua embere siwe. Amaelfu n’amaelfu alue inianemumukolera, ne elfu ikumi ngendo elfu ikumi balue ibanimene embere siwe. Etribinali muyikatsuka n’ebitabu byamakingulwa.

11 “Mungaendelea erisamalira busana n’ebinywa by’emiyiheko* ebyo erihembe rike eryo rilue rikabugha; inikinasamalira, enyama eyo muyikitibawa n’omubiri wayo amatoghotibwa n’erighuswa omo muliro atoke erihisibwa. 12 Aliwe mubakasaghula esindi nyama sy’amatabali wasyo, n’engebe yasyo yamayirwa mo nyiri oko mughulu mughuma n’oko kirimo kighuma.

13 “Omo syonzoli esyo niryalangira omo kiro, mungalangira omundu oyusosire omughala w’omundu inianemwasa n’ebitu by’elubula; mubakamulighira eriseghera ahali Omusyakulu w’Ebiro, neryo bamamutwala embere siwe. 14 Neryo mwakahabawa obutabali, olukengerwa, n’obwami, kusudi abandu bosi, ebihanda byosi, n’abandu bosi abakabugha emibughe mbiriri-mbiriri batoke erimukolera. Obutabali bwiwe ni butabali bwa kera na kera, sibwendisyahwa, kandi obwami bwiwe sibwendisyatoghotibwa.

15 “Ingye Danieli, mungahanga-hangaya kundi esyonzoli esyo niryalangira musikanisaghisaya. 16 Mungaya hakuhi n’omughuma w’oko abalue bimene aho ngayamubulya oko kwenene-kwenene emyatsi eyo nga ikasonda eribugha yitiki. Neryo mwakanisubiraya, amanibwira amaana w’emyatsi eyo.

17 “‘Esyonyama nene-nene esyo, esini, sikasosekanaya abami bani abakendisyahuluka omo kihugho. 18 Aliwe ababuyirire b’Omukulu Kutsibu bakendisyahabwa obwami, kandi obwami obo bukendisyabya bwabo kera na kera, inga kera na kera.’

19 “Neryo mungasonda eriminya bingyi oko nyama y’akani, eyilue isiyisosire esindi syosi. Yilue ikasaghisya kutsibu, yilue n’ameno w’ekyuma n’esyonyala sy’ekwivre,* kandi yilue ikatomera n’eriponda-ponda, n’erilyatangira omo bisando byayo ebiryasighala. 20 Mungasonda eriminya bingyi n’oko mahembe 10 awalue oko mutwe wayo, n’oko rindi rihembe eriryalasa, neryo awandi mahembe asatu amatoghera embere syaryo. Erihembe eryo rilueko ameso n’obuno obukabugha n’emiyiheko,* kandi rilue rikalangirika mo rinene kulenga awandi.

21 “Inikinasamalira, mungalangira erihembe eryo rikalwa n’ababuyirire. Neryo murikabasinga, 22 erihika omughulu Omusyakulu w’Ebiro alyahika, neryo ababuyirire b’Omukulu Kutsibu bamatswerwa n’erisingana, n’omughulu owahirawaho w’ababuyirire erimya obwami mwakahika.

23 “Mwakabugha ati: ‘Enyama y’akani ikasosekanaya obwami bw’akani obukendisyabya oko kihugho. Sibwendisyabya ng’awandi mami wosi; bukendisyatomera ekihugho kyosi, bukendisyalyatangirakyo, n’eriponda-pondakyo. 24 Amahembe 10 akasosekanaya abami 10 abakendisyaluira omo bwami obo. Hakendisyahuluka oghundi mwami enyuma syabo; syendisyabya ng’ab’erimbere, kandi akendisyahemula abami basatu. 25 Akendisyabugha ebinywa ebituwene oko Ow’endata Kutsibu, kandi akendisyabera eribya akakara* ababuyirire b’Omukulu Kutsibu. Akendisyasonda eribindula emighulu n’emighambo, n’ababuyirire bakendisyahirwa omo byala biwe oko mughulu mughuma, oko mighulu, n’oko nusu y’omughulu.* 26 Etribinali muyikatsuka, neryo mubakalusayaho obwami bw’omwami oyo, kusudi atoghotibawe n’eritsandibwa olosi.

27 “‘N’obwami, obutabali, n’obukulu bw’amami awali eyikwa w’elubula mubyahabwa ababuyirire b’Omukulu Kutsibu. Obwami bwabo ni bwami bwa kera na kera, n’amami wosi akendisyabakolera n’eribowa.’

28 “Omwatsi oyo amahwera aho. Ikwa ingye Danieli, ebyabya bikalaba omo mutwe waghe mubyanisaghisya kutsibu, erihika oko kika namatumba,* aliwe munabikabyo omo mutima.”