Emibiiri y’Abakwenda
17 Neryo mubalaba e Amfipoli ne Apolonia, bamahika e Tesalonika, eyabya esinagogi* y’Abayahudi. 2 Ngoko Paulo abya iniabeghere erikola, mwingira omo sinagogi.* Neryo omo mayenga asatu, omo buli kiro ky’esabato, abya akalengakania nabo oko myatsi eyiri omo Masako. 3 Abya akakolesya Amasako erikangirirya n’erikangania ndeke-ndeke ngoko kyabya kitolere Kristo iniaghalwa n’erilubuka. Kandi mwabugha ati: “Yesu, oyo ngabahubiraya, yo Kristo.” 4 Neryo omw’ibo mumwabya abandu abikiriraya, bamabya oko Paulo na Sila. Abagiriki bangyi ababya bakaramya oMungu n’abakali bangyi ababya basikibwe mubabya oko Paulo na Sila.
5 Busana n’eritsuro, abandi Bayahudi mubayakuma-kuma abalume batsibu ababya bakaghalaghanda omo soko. Neryo mubayiyiramo kikuto kighuma, n’eritsuka eridunga omuyi. Mubatimba oko nyumba ya Yasoni, bakarondya Paulo na Sila batoke eribatwala embere sy’ekikuto ekitsurumire. 6 Babere babibulabo, mubatwala Yasoni n’abaghala betu balebe embere sy’abakulu b’omuyi, ibanemubugha omo mulenge muli bati: “Abalume aba, ababiridunga ekihugho kyosi babirihika n’eno. 7 Yasoni mwakakokayabo ewiwe. Abalume bosi aba sibalikwama ebyalaghiro bya Kaisari. Bakabugha bati hali oghundi mwami, bati ni Yesu.” 8 Mubabya babyowa emyatsi eyi, abandu n’abakulu b’omuyi mubahangya-hangya. 9 Yasoni n’abandi baghala babere babibaha esyofranga esitosire, bamalekabo baghende.
10 Omo kiro, abaghala betu mubalw’ibatuma Paulo na Sila e Beroya. Babere babihikayo, mubikala omo sinagogi* y’Abayahudi. 11 Abayahudi be Beroya babya ibanzire erigha bingyi kulenga Abayahudi be Tesalonika, kundi mubahulikirira ekinywa ky’oMungu n’omutima wosi. Babya bakigha Amasako ndeke-ndeke obuli kiro batoke eriminya emyatsi eyo balyakangiriribawa nga nina y’ekwenene. 12 Neryo abangyi ba kubo mubikirirya. N’omo Bagiriki mumwalwa abakali balebe abasikibwe n’abalume balebe abikiriraya. 13 Aliwe, omughulu Abayahudi ababya e Tesalonika baminya ngoko Paulo anemuhubirya ekinywa ky’oMungu omo muyi we Beroya, mubasa e Beroya, batoke eritsotsya abandu n’eridungabo. 14 Neryo abaghala betu mubalw’ibatuma Paulo oko ngetse. Aliwe, Sila na Timoteo mubasighala e Beroya. 15 Nikwa, abakwamanisaya Paulo mubamukolya e Atene. Neryo bakasubula, Paulo mwalaghirabo, amabwirabo ati Sila na Timoteo baye eyali yo luba.
16 Paulo abere inianemulindabo e Atene, mwahitana kutsibu omo mutima wiwe, akalangira ngoko omuyi we Atene aswiremo esyosanamu. 17 Omo sinagogi,* mwatsuka erilengekania n’Abayahudi n’abandi bandu ababya bakaramya oMungu oko myatsi eyiri omo Masako. Kandi obuli kiro, mwabya akalengekania n’abandu ababya omo soko oko myatsi eyiri omo Masako. 18 Aliwe, abaghuma b’oko bafilozofe Abaepikurea n’Abastoiko mubatsuka erikuba obuhaka na Paulo. Babya bakabugha bati: “Omulume w’omupepe oyu akasonda eribugha atiki?” N’abandi babya bakabugha bati: “Akabya ng’akakangiriraya emyatsi eyilebirye emiungu y’ehandi.” Babya bakabugha batya kundi Paulo abya akakangirirya engulu mbuya ya Yesu n’erilubuka. 19 Neryo, mubahamba Paulo n’erimutwala oko Areopago, ibanemubugha bati: “Wanganatubwira oko makangirirya mahya agho unemukangirirya? 20 Kundi unemukania oko myatsi eyo tutetwatowa n’ekiro n’ekighuma kandi tukasonda eriminya emyatsi eyo nga yikamaanisayaki.” 21 Abanya Atene bosi n’abagheni abalyalendererayo ibakalabaya endambi yabo eyo batekolamo omubiiri bakakania n’erihulikirira oko myatsi mihya. 22 Neryo Paulo mwahangana omo kati-kati ke Areopago n’eribugha ati:
“Balume be Atene, namalangira ngoko omo myatsi yosi, muli nga mukasagha emiungu* kulenga abandi. 23 Eky’erileberyako, omughulu nilwe ngalaba omo muyi ininemusamalira ebindu ebyo mukaramaya, nibya mungasunga n’ekiherero ekihandikireko kiti ‘Ky’oMungu oyutasibwe.’ Ekindu ekyo mukaramaya ekyo mutasi ekyo, kyo ngabahubiraya. 24 OMungu oyo wahangyika ekihugho n’ebyosi ebiri mukyo, iye Omukama w’olubula n’ekihugho, syalikala omo syohekalu esikahimbawa omo byala by’abandu. 25 Ebyala by’abandu byo bitemuha ebyo alaghireko, neryo iniabya nga alaghire oko buwatikya bwabo, kundi iye yukaha abandu b’engebe, omuka, n’emyatsi yosi. 26 Kandi mwalusya abandu b’ebihanda byosi omo mundu mughuma batoke erikala oko kihugho kyosi kandi mwahiraho emighulu n’emipaka eyo abandu bangikalamo. 27 Mwakola atya batoke erisonda-sonda oMungu, n’omo bangamumata-mata, neryo ibamusunga, kundi oko kwenene syali hali oko buli mughuma w’okw’itwe. 28 Kundi iye yukatuha engebe, yukaleka itwaghenda, n’eribyaho. Nibya n’abahandiki balebe b’ewenyu bakabugha bati, ‘Kundi netu tuli bana* biwe.’
29 “Neryo, kundi tuli bana* b’oMungu, siritolere tukalengekania tuti oMungu ali ng’ehoro, ng’efeza,* kutse eribwe, kutse ng’ekindu ekiryakokotibawa n’omufundi kutse ekiryalengekanibawa n’abandu. 30 Oko kwenene, kera, oMungu mwatatsomana obutaminya obo. Aliwe lino, anemubwira abandu bosi, ehosi-hosi, ngoko ritolere ibabindula omutima. 31 Kundi abirihiraho ekiro ekyo akendisyatsweramo abandu abali oko kihugho. Akendisyatswerabo omo ritunganene erilabira omundu oyo abirisombola, kandi abirikangania abandu bosi ngoko omwatsi oyo ni w’ekwenene omw’ilubukya omundu oyo.”
32 Omughulu bowa akakania okw’ilubuka ry’abaholi, abaghuma mubatsuka erimusekererya, n’abandi mubabugha bati: “Ukendisyatukanirya oko mwatsi oyo ko kindi kiro.” 33 Neryo Paulo mwabasighaho. 34 Aliwe, abandu balebe mubabya okw’iye, n’erikirirya. Omw’ibo mwabya Dionisio, abya mutsweri oko tribinali ye Areopago, habya n’omukali oyukahulawamo Damarisi, n’abandi.