Malaki
3 “Ngatuma omutumwa waghe, akenditula* enzira embere syaghe. N’Omukama w’ekwenene, oyo mukasondaya, akendisyasa omo hekalu yiwe mo kitsumbukirania; n’omutumwa w’endaghane, oyo mukatsemera, akendisyasa. Oko kwenene, akendisyasa,” Yehova w’emilondo atya.
2 “Aliwe nindi yukendisyatoka erihanda omutima ekiro akendisyasa, kandi nindi yukendisyatoka eribya inianimene omughulu akendisyahuluka? Kundi akendisyabya ng’omuliro w’oyukeraya ebindu by’obughuli, kandi akendisyabya ng’esabuni y’omundu oyukafula. 3 Kandi akendisyikala ng’omundu oyukeraya ebindu by’obughuli n’oyukeraya efeza,* kandi akendisyerya abaghala ba Lawi; kandi akendisyeryabo ng’ehoro n’efefza, neryo oko kwenene bakendisyabya bandu ba Yehova abakamuherera obuhere omo ritunganene. 4 N’oko kwenene, ekihembo kye Yuda n’ekye Yerusalema kikendisyatsemesya Yehova, ngoko kyabya kikamutsemesya kera, omo mughulu wa kera.
5 “Ngendisyaseghera hakuhi nenyu nitoke eribatswera, kandi ngendisyalw’inakangania amakosa w’abaloyi, w’abasingiri, w’abakalapa eby’amabehi, w’abakiba oyukakola omubiiri, omukwa-kali, n’omwana oyutawite baba,* n’aw’abakaghana eriwatikya omundu* w’ehandi. Abandu abo mubatanisagha,” Yehova w’emilondo atya.
6 “Kundi niri Yehova; sindibinduka.* Nenyu muli bana ba Yakobo; simwemwahwaho. 7 Eritsuka oko omughulu w’abotata-kulu wenyu, mukabya imunemuleka erikwama emighambo yaghe n’eritendisikyayo. Munisubire, naghe ngendibasubira,” Yehova w’emilondo atya.
Aliwe mukabugha muti: “Tukusubire tuti?”
8 “Omundu bule anganiba oMungu? Aliwe munemuniba.”
Ibwa mukabugha muti: “Tukakwiba tuti?”
“Mukaniba omo bighuma by’omw’ikumi n’omo bihembo. 9 Oko kwenene, mwabiritakirwa,* kundi mukaniba, inga, abandu bosi bakaniba. 10 Mulete ekighuma kyosi ky’omw’ikumi omo depo, kusudi enyumba yaghe ibye iyinemo akalyo. Kisi, munilengeko omo mwatsi oyo,” Yehova w’emilondo atya, “nga simwendilangira ngoko ngabakingulira emilango y’elubula eyikasiramo amaghetse kandi nga sinendibakungumulirako emiyisa erihika oko kika imwatabula kindu.”
11 “Ngendisyahayira busana nenyu oyukatomera,* neryo syendisyasyatsandya amatunda w’omo kihugho kyenyu, n’emiti yenyu y’emizabibu ikendisyahetya,” Yehova w’emilondo atya.
12 “Ebihanda byosi bikendisyabugha biti mutsemire, kundi mukendisyabya ekihugho ky’obutseme,” Yehova w’emilondo atya.
13 “Mumwanibughako ebinywa ebikalire,” Yehova atya.
Kandi mukabugha muti: “Mutukanakubughako ebinywa ebituwene?”
14 “Mukabugha muti: ‘Sikiri na mughaso erikolera oMungu. Twabiribanaki omw’isikya ebyo akatusaba ati tukole n’omw’ilendera lulighe-lighe embere sya Yehova w’emilondo? 15 Lino, tukalangira ngoko abandu abakayilabiriraya bo batsemire. Kandi, ababeghere erikola obubi bo myatsi ikaghendera ndeke. Bakayitswa erilenga oko Mungu, aliwe ibatahikirwa n’ekibi.’”
16 Oko mughulu oyo, abakasagha Yehova mubakania, obuli mughuma abya akakania na mulikyabo, na Yehova abya inianemukwama n’erihulikirira. N’ekitabu ekikibukaya mukyahandikwa embere siwe, mukyahandikwamo amena w’abakasagha Yehova n’abakalengekanaya kutsibu oko rina riwe.*
17 “Ekiro ngendisyabayira mo kindu kyaghe ky’obughuli,” Yehova w’emilondo atya, “bakendisyabya bandu baghe. Ngendisyabakwira obulighe, ngoko omundu akakwira obulighe b’omughala wiwe oyukamukolera. 18 Kandi mukendisyalangira eritendisosana eriri omo kati-kati k’oyutunganene n’omubi, n’omo kati-kati k’oyukakolera oMungu n’oyutemukolera.”