Danieli

6 Dario mwalangira ngoko kyuwene erihiraho abakulu 120 b’esyongabiro* omo bwami bosi. 2 Abakulu b’esyongabiro* abo babya bimanirwe n’abakulu basatu, omughuma wa kubo abya Danieli. Abakulu b’esyongabiro ibakaha abakulu basatu abo b’eraporo, ebindu by’omwami bikasyahera. 3 Aliwe Danieli mwalangirika inialengire abandi bakulu n’abakulu b’esyongabiro,* kundi abyako ekirimu ekikaswekaya. Omwami abya anzire erimuha ekitumbi ky’endata omo bwami bwiwe bosi.

4 Oko mughulu oyo, abakulu n’abakulu b’esyongabiro* babya bakarondya ebyangaleka ibashitaka Danieli oko myatsi y’eleta,* aliwe mubatamusungako ebyangaleka ibamushitaka kutse omwatsi mubi wosi-wosi, kundi abya w’eriyiketerwa kandi isyalitsanga omo myatsi, kandi isyalimo obubi bosi-bosi. 5 Neryo abalume abo mubabugha ati: “Ye Danieli oyu, sitwendimusungako ebyangaleka itwamushitaka, ekyo twangamuhambiramo y’emighambo y’oMungu wiwe.”

6 Neryo abakulu abo n’abakulu b’esyongabiro* mubayasungana n’omwami ibane kikuto. Mubamubwira bati: “Mwami Dario, ukote. 7 Abakulu bosi b’omo butabali, abimaniri, abakulu b’esyongabiro,* abakulu kutsibu b’omo bwami, n’abaguvernere mubakakola akasyakulu batoke erihiraho omughambo n’erighania omwatsi mulebe, bati omo biro 30, omundu wosi-wosi oyukendisaba omungu wosi-wosi kutse omundu wosi-wosi ate in’iwe mwami, atolere iniaghuswa omo kyuna ky’esyosimba. 8 Neryo lino, mwami, usighike omughambo oyo n’erihira kugho kw’ekikumo, kusudi omughambo oyo isyabindulawa, ngoko omughambo w’Abamedi n’Abaperse abughire, omughambo owate angalusibwaho.”

9 Neryo omwami mwahira oko mughambo oyo n’oko mwatsi w’erighanisya oyo kw’ekikumo.

10 Danieli mwabya abiminya ngoko omughambo oyo abirihirwako ekikumo, mwalw’iniasuba ewiwe, amingira omo kyumba kiwe ky’endata ekyabyako amadirisa awakingulire kandi awalebirye ebwanga e Yerusalema. Ngendo kasatu oko kiro, abya akakukama, erisaba, n’eripipa oMungu wiwe, ngoko anabya abeghere erikola embere. 11 Neryo abalume abo mubalw’ibingira omwa Danieli, bamamweya inianemusaba n’erilemba-lemba oMungu wiwe ati amukanganaye olukogho.

12 Neryo mubayasungana n’omwami, bamamwibukya omwatsi ogho aghanaya. Mubamubwira bati: “Si muwahira ekikumo ky’oko mwatsi owakabugha ati omo biro 30 hamabya omundu wosi-wosi oyukasaba omungu wosi-wosi kutse omundu wosi-wosi ate in’iwe mwami, atolere iniaghuswa omo kyuna ky’esyosimba!” Omwami mwasubirya ati: “Omwatsi oyo kw’ali atya erikwamana n’omughambo w’Abamedi n’Abaperse, owate angalusibwaho.” 13 Mubalw’ibabwira omwami bati: “Danieli, ow’oko banyewa be Yuda, syetakusikya, mwami wetu, syetasikya n’omughambo ogho ulyahirako ekikumo, aliwe anemusaba ngendo kasatu oko kiro.” 14 Omwami mwabya abyowa ekyo, mwabya omo bulighe bunene, kandi mwalengekania ng’akendisabula Danieli y’ati; mwayikasa erimusabula erihika oho eryuba ryalengera. 15 Oko mwiso, abalume abo mubaya eyiri omwami ibane kikuto, bamamubwira bati: “Mwami wetu, uminye ngoko erikwamana n’omughambo w’Abamedi n’Abaperse, omwami amabighania omwatsi mulebe kutse erihiraho omughambo mulebe, syangabindulwa.”

16 Neryo omwami mwabugha ati balete Danieli n’erimughusa omo kyuna ky’esyosimba. Neryo omwami mwabwira Danieli ati: “OMungu waghu, oyo ukakolera butsir’ileka akendikusabula.” 17 Neryo mubaleta eribwe, bamahiraryo oko bwingiriro* bw’ekyuna; neryo omwami mwahirako akashe omo mbuka yiwe eyo akakolesaya erihira oko bindu kw’akashe kandi mwahirako akashe omo mbuka eyo esyoseghu-seghu siwe sikakolesaya erihira oko bindu kw’akashe, kusudi ebyo babiriyisogha busana na Danieli isibyabinduka.

18 Enyuma sy’aho, omwami mwaya omo nyumba yiwe. Mwakola amafungo omo kiro kyosi ky’ekiro ekyo, mwaghana n’eriyitsemesya ryosi-ryosi,* kandi mwatabana ehighotseri.* 19 Oko mwiso, bwabere bukasonda erikya, omwami mwabuka, amalw’iniaya eyiri ekyuna ky’esyosimba. 20 Abere akasonda erihika ahali ekyuna, mwabirikira Danieli omo mulenge muli kandi w’obulighe. Omwami mwabulya Danieli ati: “Danieli, omughombe w’oMungu oyuliho, oMungu waghu oyo ukakolera butsir’ileka mwakanakusabula oko syosimba?” 21 Danieli mwalw’iniasubirya omwami ati: “Mwami waghe, ukote. 22 OMungu waghe mwakatuma omumalaika wiwe, amakinga amuno w’esyosimba, neryo sisyetaniyira kindu, kundi mwakalangira ngoko siniri na kosa embere siwe; kandi sinditakukolera ekibi kyosi-kyosi, mwami.”

23 Omwami mwatsema kutsibu, neryo amabugha ati balusaye Danieli omo kyuna. Danieli mwalusibwa omo kyuna isyaliko n’aho alyahutala, kundi mwayiketera oMungu wiwe.

24 Enyuma sy’aho, omwami mwabugha ati balete abalume abashitaka* Danieli, neryo mubaghusa abalume abo haghuma n’abakali babo n’abana babo omo kyuna ky’esyosimba. Esyosimba musyalw’isyaghulukira kubo n’eribunanga amakuha wabo wosi isibebanahika oko mwiso w’ekyuna.

25 Enyuma sy’aho, omwami Dario mwahandikira abandu bosi, ebihanda byosi, n’abandu bosi abakabugha emibughe mbiriri-mbiri abali oko kihugho ati: “Mubye n’obuholo bunene!” 26 Namahiraho omughambo ono niti: Omo buli kiharo kyosi ky’omo bwami bwaghe, abandu batolere ibatitimana busana n’erisagha oMungu wa Danieli, kundi ni Mungu oyuliho kandi ni wa kera na kera. Obwami bwiwe sibwendisyatsandibwa n’ahake, n’obutabali* bwiwe ni bwa kera na kera. 27 Akasabula, akalamaya, kandi akakola ebitiko-tiko n’emyatsi y’eriswekera omo lubula n’oko kihugho, kundi mwakasabula Danieli omo syonyala sy’esyosimba.”

28 Neryo Danieli mwabya n’amaisa aghuwene omo bwami bwa Dario n’omo bwami bwa Koreshi Omuperse.