Ebaruha y’erimbere oko Abanya Korinto
14 Ekikulu omo byosi, mubye n’olwanzo. Muyikase eribana obutoki mbiriri-mbiriri bw’ekirimu kibuyirire, kutsibu-tsibu obutoki bw’eribugha obuminyereri. 2 Omundu oyuli n’obutoki bw’eribugha omo ghundi mubughe akabugha n’oMungu, syalibugha n’abandu. Sihali omundu oyukowa ebyo akabugha, kundi akabugha emyatsi eyitasibwe erilabira obutoki bw’ekirimu. 3 Aliwe, oyukabugha obuminyereri akahimba abandi. Akabasikaya mutima n’eribakirania omo ebyo akabugha. 4 Omundu oyukabugha omo ghundi mubughe* akayihimba iyuwene. Aliwe, oyukabugha obuminyereri akahimba endeko. 5 Nangananza inywe bosi imwabya n’obutoki bw’eribugha omo yindi mibughe. Aliwe nanzire imwabugha obuminyereri. Oyukabugha obuminyereri ni mukulu kulenga oyuwite obutoki bw’eribugha omo yindi mibughe. Nikwa, kyanganuwana oyukabugha eyindi mibughe iniabindula* ebyo akabugha busana n’erihimba endeko. 6 Baghala betu, namasyababana ininemubugha emibughe eyo mutasi, ekyo kyanganabawatikya? Aliwe, kyanganabawatikya namasa n’omwatsi ogho Mungu alyanibisulira, namasa n’obutoki bw’eriminya emyatsi minene, kutse obuminyereri, kutse eby’erikangirirya.
7 Kobine bitya n’oko bindu ebitawite engebe ebikalua m’omulenge, ng’enyabulera n’enanga. Byamaluamo omulenge mughumerera, omundu iniakendiminya ati omulenge w’enyabulera kutse omulenge w’enanga? 8 Engunga yititalira ndeke, nindi yo wangayiteghekania oko malwa? 9 Kutya, utitakolesya ebinywa ebyo omundu angowa luba, omundu iniakendiminya ati ebyo ukabugha? Iwukaheraya omuka waghu wo bule. 10 Hali emihanda mingyi y’ebinywa omo kihugho, aliwe sihali ekinywa ekitawite amaana. 11 Nititowa amaana w’ebikabughawa, ingendibya ng’omugheni oko oyukabugha, n’oyukabugha iniakendibya omugheni okw’ingye. 12 Kobiri bitya n’okw’inywe. Kundi mwanzire kutsibu eribya n’obutoki mbiriri-mbiriri bw’ekirimu kibuyirire, murondaye obutoki obukahimba endeko.
13 Neryo oyukabugha omo ghundi mubughe atolere iniasaba atoke eribindula ebyo akabugha. 14 Namabya ininemusaba omo ghundi mubughe, obutoki obo kirimu kikaniha bo bukasaba, aliwe obwenge bwaghe sibulikola kindu. 15 Neryo ritolere inakolaki? Ritolere inasaba omo butoki obo kirimu kikaniha. Aliwe kandi, ritolere inasaba nitoke eryowa ebyo ngabugha. Ngendimba olwimbo lw’eripipa erilabira obutoki bw’ekirimu. Aliwe kandi, ngendimba olwimbo lw’eripipa ininemukolesya ebinywa ebyo ngowa. 16 Bite bitya, wamapipa oMungu omo butoki bw’ekirimu, omundu oyuli haghuma naghu anganatoka eribugha ati “Amina” oko musabe waghu w’erisima? Syasi ebyo ukabugha. 17 Wanganabya ighunemusima oMungu ngoko ritolere, aliwe oghundi isyendibana endundi. 18 Ngasima oMungu kundi nine n’obutoki bw’eribugha omo mibughe mingyi kulenga inywe bosi. 19 Aliwe, omo ndeko nangananza eribugha ebinywa bitano ebyo bandu bangowa nitoke erikangirirya abandi kulenga elibugha ebinywa 10 000 omo mubughe ogho bandu batasi.
20 Baghala betu, simubye ng’abana omo bwenge bwenyu. Aliwe, mubye ng’abana balere oko myatsi y’erikola ebibi. Mukule omo bwenge bwenyu. 21 Kihandikire omo Mighambo kiti: “‘Ngendisyabugha n’abandu aba omo mibughe y’abagheni, n’omo minywa y’abagheni. Nomo bine bitya, bakendisyaghana erinihulikirira,’ Yehova* atya.” 22 Obutoki bw’eribugha omo yindi mibughe bukawatikaya abapagani erikirirya, butsira abikirirye. Aliwe, obuminyereri ni bw’abikirirye, butsira abatikirirye. 23 Endeko yosi yamahindana haghuma neryo abosi ibabugha omo mibughe mbiriri-mbiriri, neryo abandu bule-bule kutse abatikirirye ibingiramo, ibakendibugha bati muli basire. 24 Aliwe, inywe bosi mwamabibugha obuminyereri neryo oyutikirirye kutse omundu w’akawaida iningiramo, ebyo akendyowa ibikendimukunga, kandi ibikendimuwatikya erilengekania ndeke oko mibere yiwe. 25 Emyatsi eyibiseme omo mutima wiwe iyikendiminyikala, neryo iniakendyunama, iniaramya oMungu n’eribugha ati: “Oko kwenene, oMungu ali omo kati-kati kenyu.”
26 Neryo baghala betu, ritolere imwakolaki? Omughulu mukahindana haghuma, omughuma imbe olwimbo, oghundi akangiriraye, n’oghundi abughe ebyo oMungu alyamubisulira. Oghundi abughe omo ghundi mubughe, n’oghundi abindule ebikabughawa. Mukole ebyosi ebyo busana n’erihimbana. 27 Abandu balebe bamabugha omo ghundi mubughe, kumbe ibabya babiri kutse abasatu basa. Siritolere bakabughira kughuma. Ritolere oghundi mundu iniabindula ebyo bakabugha. 28 Hamabya isihali oyukabindula ebyo omundu mulebe akabugha, ritolere omundu oyo iniahuna omo ndeko, n’eribugha n’oMungu omo mutima wiwe. 29 Abaminyereri babiri kutse abasatu banganabugha, aliwe kumbe abandi ibayikasa eryowa ebyo bakabugha. 30 OMungu amabisulira oghundi mundu y’omwatsi mulebe inianikere omo muhindano, ritolere oyulyatsuka eribugha iniahuna. 31 Mwanganabugha obuminyereri mo mundu mughuma-mughuma. Ekyo ikikendiwatikya obuli mundu eriigha omwatsi mulebe n’erihimbwa. 32 Ritolere abaminyereri ibalebya ngabakakolesaya bati obutoki bwabo bw’ekirimu. 33 Kundi oMungu ni Mungu w’obuholo, butsira w’eputsu-putsu.
Ngoko kiri omo syondeko syosi sy’ababuyirire, 34 ritolere abakali ibahuna omo syondeko. Sibahamulirwe eribugha. Ritolere ibayikehya ngoko Emighambo nayo ikabugha. 35 Bamabya ibanzire eriminya omwatsi mulebe, ritolere ibabulya abalume babo eka wabo. Ni mwatsi w’esisoni oko mukali eribugha-bugha omo ndeko.
36 Ekinywa ky’oMungu kyatsuka okw’inywe? Kutse mwahabawakyo inywe basa?
37 Omundu amalengekania ati ni muminyereri kutse ati awite obutoki bw’ekirimu kibuyirire, ritolere omundu oyo iniaminya ngoko ebyo ngabahandikira bikalua oko Mukama. 38 Omundu atitaminya ekyo, naye isyendiminywa.* 39 Neryo baghala betu, mwanze kutsibu eribugha obuminyereri, aliwe isimwaghanaya omundu eribugha omo yindi mibughe. 40 Nikwa emyatsi yosi yikolawe omo butondeke, butsira kitya-kitya.