Ezekieli
4 “Naghu, mughala w’omundu wimaye embiriki. Uhireyo embere syaghu. Utsore* kuyo kw’omuyi, omuyi we Yerusalema. 2 Ubambire omuyi oyo, uhimbe kugho kw’oluhimbo lw’eribambiragho, utimbaye kugho kw’oluba lw’eribambiragho, utimbaye kugho kw’esyokambi, kandi utimbaye kugho kw’emipundo.* 3 Wimaye oluyo* lw’ekyuma, uhirelo eribya luhimbo lw’ekyuma omo kati-kati kaghu n’omuyi. Neryo utungerere omuyi oyo iwabirisunza, nagho akendibambirwa; ukendibambiragho. Eki ni kiminyikalo busana n’ekihanda kya Israeli.
4 “Neryo ukendighotserera oko luhande lwaghu lw’amalembe n’eriyihirako* ekibi ky’enyumba ya Israeli. Ukendisyaheka ekibi kyabo omo mighanzo y’ebiro ebyo ukendisyaghotserera oko luhande lwaghu. 5 Naghe ngendikusaba ubughe ebiro 390, ebilingene n’emyaka y’ekibi kyabo, naghu ukendisyaheka ekibi ky’enyumba ya Israeli. 6 Kandi litolere iwaghoneryabyo.
“Neryo engendo y’akabiri ukendisyaghotserera oko luhande lwaghu lw’amali, kandi ukendisyaheka ekibi ky’enyumba ya Yuda omo biro 40. Ekiro busana n’omwaka, ekiro busana n’omwaka. Ko namakulayira nitya. 7 Naghu ukendisyabindukirya obusu bwaghu erilolera okw’ibambwira lye Yerusalema, okuboko kwaghu ikunaswikulire, naghu ukendisyabugha omo buminyereri ebikendisyahikirayo.
8 “Hulikirira! Ngendikuboha omo bikoba neryo iwabya isiwangatoka eriyibindula erilua oko luhande lughuma n’eribindukira oko lundi erihika aho ukendisyabughira ebiro by’eribambira lyaghu.
9 “Kandi litolere iwimya engano, ekisusu, obuhoti,* ebitsali, obulo, n’engano y’ekusemeti. Ukendihirabyo omo kindu kighuma, iwayihukira mubyo m’omukati. Ukendisyalyagho omo biro 390, ebiro byaghu by’erighotserera oko luhande lughuma. 10 Obuli kiro ukendisyabya ukalenga n’erirya esyoshekeli 20* sy’akalyo. Ukendisyabya ukalyako oko ndambi nyilebe eyabirihirwaho.
11 “Kandi ukendisyabya ukalenga amaghetse w’erinywa, akalengyi kaghuma k’ehini eyabirighabwa ngendo 6. Ukendisyabya ukanywagho oko ndambi nyilebe eyabirihirwaho.
12 “Ukendisyalyagho ngoko wanganalya omukati w’omuviringo ow’ekisusu; ukendisyahukagho ibanalangire, amabi w’omundu aghumire w’akendisyabya ngwi sy’erihuka w’oko.” 13 Neryo Yehova mwabugha ati: “Abaisraeli ko bakendisyalya batya akalyo* kabo akaterire omo kati-kati k’ebihanda ebyo ngendisyapanza-panzira b’omo.”
14 Neryo munabugha niti: “Butsira ekyo, Mukama Mukulu oko Bosi, Yehova! Erilua omo bulwana bwaghe erihika lino, sindinatayitsandya omw’irya eyiswi y’enyama eyiryayiholera kutse eyiryatulangawa n’eyindi nyama, kandi enyama eyiterire siyiriyatingira omo buno bwaghe.”
15 Neryo mwanibwira ati: “Sawa, ngendikulighira ukolesaye ebise by’ende omo mwanya w’amabi w’abandu, ebise ebyo byo ukendisyabya ukahukako omukati waghu.” 16 Neryo mwambwira ati: “Mughala w’omundu, hano ngalusaya omo Yerusalema mw’ahakalua akalyo,* neryo bakendisyabya bakalenga akalyo kabo k’oko kilo. Bakendisyabya bakalyako ibane omw’ihangya-hangya linene; kandi bakendisyabya bakalenga amaghetse wabo w’erinywa, bakendisyabya bakanywagho ibanubahire kutsibu. 17 Ekyo kikendisyabya batoke eribula akalyo* n’amaghetse, neryo bakendisyatungererana omw’ikukubala n’erihwerekerera busana n’ekibi kyabo.