Ezekieli
44 Mwanisubulya erilaba omo mulango w’ahabuyirie owatungerere oko luhande lw’eyo eryuba likasira; nagho abya akingire. 2 Neryo Yehova mwanibwira ati: “Omulango oyu akendisyasighala inyanakingire. Syatolere erikingulwa, sihali omundu oyukendisyalaba mugho; kusangwa Yehova oMungu wa Israeli abiriingirira mugho, neryo akendisyasighala inyanakingire. 3 Aliwe omukulu akendisyikala mugho akalya omukati embere sya Yehova, kusangwa ni mukulu. Akendisyalaba omo baraza y’olukyo, n’omulango oyo wo anemwendisyalabamo akahuluka.”
4 Neryo mwanilabya omo mulango w’oko luhande lw’endata, amanileta embere sy’ehekalu ya Yehova. Munabya natungerera, munalangira olukengerwa lwa Yehova ilwabiryusula omo hekalu. Neryo munatulama oko kitaka. 5 Neryo Yehova mwanibwira ati: “Mughala w’omundu uyiteghereraye ndeke,* usamalire, n’erihulikirira ndeke obuli kindu ekyo ngendikubwira ekilebirye ebihano n’emighambo y’ehekalu ya Yehova. Uyiteghereraye ndeke obwingiriro bw’ehekalu n’emyanya yosi y’erihulukiramo y’ahabuyirire. 6 Ubwire abandu b’enyumba ya Israeli abakayisamambula uti, ‘Yehova, Omukama Mukulu oko Bosi ati: “Emyatsi eyikita nye eyo mwabirikola itosire, inywe bandu b’enyumba ya Israeli. 7 Omughulu mukaleta omo habuyirire haghe mw’ab’ehandi abatabanibwe omo mitima n’oko mubiri, mukabya imukatsandaya ehekalu yaghe. Mukaherera omukati waghe, ebisabu n’omusasi, endaghane yaghe iyinemubunwa busana n’emikolere yenyu yosi eyikita nye. 8 Simwetasikya ebindu byaghe ebibuyirire. Omo mwanya w’ekyo, mukahiraho abandi bandu bakole emibiiri omo habuyirire haghe.”’
9 “‘Yehova, Omukama Mukulu oko Bosi ati: “Ow’ehandi wosi-wosi oyo wikere omo Israeli oyutabanibwe omo mutima n’oko mubiri syangingira omo habuyirire haghe.”’
10 “Nikwa Abalawi abayihighula okw’ingye omughulu Abaisraeli bayihighula okw’ingye busana n’erikwama esyosanamu syabo esikita nye,* bakendisyahikirwa n’ebitsibu ebikaluira omo rilolo lyabo. 11 Bakendisyakola emibiiri omo habuyirire haghe bakateya esyongyo sy’ehekalu n’erikola emibiiri oko hekalu. Bakendisyabya bakakerera abandu b’amahere w’eryokererya awakahererawa awosi, kutya n’esyohongo. Kandi bakendisyabya bakimana embere sy’abandu erikolerabo emibiiri. 12 Kundi babya bakakolera abandu b’emibiiri embere sy’esyosanamu syabo esikita nye neryo bamabya kindu ekikatwikalaya ekyaleka abandu b’enyumba ya Israeli ibakola erilolo, kyo kyabirileka inasumba ebyala byaghe erilwa nabo n’erilahirya,’ Yehova, Omuka Mukulu oko Bosi atya, ‘kandi bakendisyahikirwa n’ebitsibu ebikaluira omo rilolo lyabo. 13 Sibendisyayitunda hakuhi naghe erinikolera mo bahereri baghe kutse sibendisyayitunda hakuhi n’ekindu kyosi-kyosi ekibuyirire kutse ekibuyirire kutsibu, kandi bakendisyahemuka busana n’emyatsi eyikita nye eyo bakola. 14 Aliwe ngendisyabaha ekasi y’erikola emibiiri oko hekalu, erikola omubiiri wamo wosi n’emyatsi yosi eyitolere erikolwa muyo.’
15 “Yehova, Omukama Mukulu oko Bosi ati, ‘Oko bilebirye abahereri Abalawi, abaghala ba Zadoki, ababya bakakola emibiiri omo habuyirire haghe omughulu Abaisraeli bayihighula okw’ingye, bakendisyayitunda hakuhi naghe erinikolera emibiiri, kandi bakendisyimana embere syaghe busana n’eriniherera ebisabu n’omusasi. 16 Ibo bo bakendisyingira omo habuyirire haghe n’eriyitunda hakuhi n’emesa yaghe erinikolera emibiiri, nabo bakendisyaberererya emibiiri yabo eyo bakanikolera.
17 “‘Omughulu bakingira omo syongyo sy’ekibugha ky’emwisi, litolere ibambala esyongyimba sy’ekitani. Sibatolere eryambala olukimba losi-losi lw’obweya bw’embuli omughulu bakakola omubiiri oko syongyo sy’ekibugha ky’emwisi kutse emwisi wakyo. 18 Litolere ibambala esapu y’ekilemba ey’ekitani oko mitwe yabo, n’eriswika ebihinga byabo omo hipitula hy’ekitani. Siritolere bakambala ekindu kyosi-kyosi ekyangaleka ibatwa olunza. 19 Embere bahulukire omo kibugha ky’ehihya—ekibugha ky’ehihya ekyo abandu balimo—litolere ibalusya esyongyimba esyo balue bakakola nasyo omubiiri, ibahirasyo omo byumba by’eriliramo* ebibuyirire. Neryo bakendisyambala esindi ngyimba, bakasyatwalira* abandu b’obubuyirire erilabira esyongyimba syabo. 20 Sibatolere bakasisa emitwe yabo kutse erikotya esyonzwiri sy’oko mitwe yabo. Litolere ibabya bakakehya oko syonzwiri sy’oko mitwe yabo. 21 Abahereri sibatolere erinywa edivai omughulu bakingira omo kibugha ky’emwisi. 22 Sibatolere eritahya omukwa-kali kutse omukali oyo watwa endwa; aliwe banganatahya omubikira w’omo lubuto lwa Israeli kutse omukwa-kali w’omuhereri.’
23 “‘Litolere ibakangirirya abandu baghe eritendisosana eriri omo kati-kati k’ekibuyirire n’ekitabuyirire;* kandi bakendisyakangirirya abandu baghe eritendisosana eriri omo kati-kati k’ekindu ekyerire n’ekiterire. 24 Litolere ibabya batsweri omughulu w’erisoha esyombanza; litolere ibasohasyo erikwamana n’ebighenderwako byaghe. Litolere ibasikya emighambo yaghe n’ebihano byaghe ebilebirye ebiro byaghe bikulu byosi kandi litolere ibayira esyosabato syaghe mo sibuyirire. 25 Sibatolere bakaseghera hakuhi n’ekinda kyosi-kyosi eky’omundu, aho ibakendibya abaterire. Aliwe omuhereri anganayiyira mo yuterire busana na baba wiwe, mama wiwe, mughala wiwe, mwali wiwe, mughala wabo, kutse busana na mwali wabo oyutatahibwe. 26 Omuhereri akendisyabya abyeribwa, bakendisyamughanzira ebiro 7. 27 Omughulu akingira ahabuyirire, omo kibugha ky’emwisi, erisyakola omubiiri omo habuyirire, litolere inyaherera obuhere bwiwe bw’erilolo,’ Yehova, Omukama Mukulu oko Bsi atya.
28 “‘N’omwandu wabo w’ono: Ingye mwandu wabo. Isimwahabo erighabo lyosi-lyosi omo Israeli, kusangwa ingye righabo lyabo. 29 Ibo bo bakendisyabya bakalya obuhere bw’eyisyano, obuhere bw’erilolo, n’obuhere bw’olubanza.* N’obuli kindu omo Israeli ekikahererawa oko Mungu, kikendisyabya kyabo. 30 Ebyuwene kutsibu by’eby’erimbere ebyo mukeraya n’emihanda yosi y’ebihembo ebyo mukateka, bikendisyabya by’abahereri. Kandi litolere imwaha abahereri b’eyisyano yenyu y’erimbere eyikinemo amatsenge. Ekyo kikendisyaleka enyumba yenyu iyabyako emiyisa. 31 Abahereri sibatolere erirya enyunyu yosi-yosi kutse enyama yosi-yosi eyiryayiholera kutse eyiryatulangawa n’eyindi nyama.’