Yobu

 2 “Ngambe niri ngoko nabya omo misi eyabirilaba,

Omughulu oMungu abya akaniteya,

 3 Omughulu etala yiwe yabya ikakolerya endata oko mutwe waghe

Omughulu nabya ngalendera omo mwirimya busana n’ekyakakala kiwe,

 4 Omughulu nabya* inikinawite amaka w’obulwana bwaghe,

Omughulu obwira bw’oMungu bwabya bukalangirika omo hema yaghe,

 5 Omughulu Omutoki w’Ebyosi abya iniakine naghe,

Omughulu abana baghe* bosi babya banitimbireko,

 6 Omughulu ebisando* byaghe

Byabya bikanabibwa omo masabu awakamatire,

N’olukuka ilukanyutulira amaghuta ng’esyonyusi.

 7 Omughulu nabya ngaya oko lukyo lw’omuyi

N’eryikala omo kibugha ky’abandu bosi,

 8 Abalwana ibakanilangira neryo ibanisegherera,*

Nibya n’abasyakulu ibakahangana n’erisighala ibanime.

 9 Abanya-mwami isibalisyabugha;

Ibakahira ebyala byabo oko muno wabo.

10 Emilenge y’esyoseghu-seghu iyikahunibawa;

N’olulimi lwabo ilukamakirira oko kyasasa kyabo.

11 Omundu wosi-wosi oyo wabya akowa engulu yaghe

Iniakanibughako ndeke,

N’ababya bakanilangira ibakanipipa.

12 Kusangwa ingalamaya omwera oyukalaka akasaba obuwatikya,

N’omwana oyutawite ise n’owosi-wosi oyutawite oyo wangamuwatikya.

13 Oyukisiya inyahera iniakanitsumula,

Kandi ingatsemesaya emitima y’abakwa-kali.

14 Ingambala eritunganene mo lukimba;

Eritswera lyaghe eritunganene iriri ng’ekanzu* n’esapu y’ekilemba.

15 Nabya meso busana n’endimetime

N’ebisando busana n’ekirema.

16 Munabya baba w’abera;

Ingatsopolaya olubanza lw’abandu abo nitasi.

17 Ingabunzungula emikese y’omukola-nabi

N’eripura enyama eyo abirihamba erilua omo meno wiwe.

18 Inibeghere eribugha niti, ‘Ngasyaholera omwaghe,*

N’ebiro byaghe bikendisyabya bingyi ng’omuseghe.

19 Emirihi yaghe ikendisyalanda eyi n’eyi omo maghetse,

N’ekimi kikendisyabya ikine oko matahi waghe omo kiro kyosi.

20 Olukengerwa lwaghe lukabya iko lunemuyirwa mo luhya-luhya,

N’obuta obuli omo byala byaghe bukendisyabya iko bunemulasa emisale.’

21 Abandu ibakanitegha amatwi,

Bakalindirira erihano lyaghe ibane bukutu.

22 Ingabya nabibugha, isibalisyabana eky’eritomekako;

Ebinywa byaghe ibikatoghera omo matwi wabo mo lyolo-lyolo;*

23 Ibakanilindirira ng’embula;

Ibakatanda obuno bwabo nga bakatandirabo embula y’omwiso-mwiso.

24 Ingabya nabakangania obusu obutsangire,

Ikikabakalira erikirirya ngoko nabiritsemerabo;

Obusu bwaghe obukere ibukabasubaya mutima omo nda.*

25 Ingasondolabo ng’omusondoli wabo,

Kandi nabya ng’omwami oyuli omo kati-kati k’abasuda biwe,

Ng’oyukakiranaya abakalira.