Esyonyimbo

37 Isiwahitana* busana n’abandu babi

Kutse eritsura abakola-nabi.

 2 Bakendisyalw’ibuma ng’ebiti

N’erikangalaghatana ng’ebiti bibisi.

 3 Uyiketere Yehova, ukole ekibuya;

Wikale oko kihugho,* kandi ubye mutaleghula omo myatsi yosi.

 4 Ubane obutseme* bunene omo Yehova,

Naye akendisyakuha ebyo omutima waghu akayisunza.

 5 Uleke Yehova asondole enzira yaghu;*

Uyikete iye naye akendisyakuwatikya.

 6 Akendisyaleka eritunganene lyaghu iryakolerya ng’ekyakakala ky’emitsange,

N’eriluyirirana lyaghu ng’eryuba ly’eritungyi.

 7 Uyibombeke embere sya Yehova

Kandi umulindirire butsira eriluha.

 8 Uleke obuhitane, usighanaye erighalirwa;

Isiwahitana; ekyo ikikendileka iwakola ebibi.*

 9 Kusangwa abakola-nabi bakendisyalusibwaho,

Nikwa abakayiketera Yehova bakendisyasighalya ekihugho.

10 Hakisiya akatambi kake, ababi sibendisyasyabyaho,

Ukendisyalebya aho babya,

Nabo sibendisyasyabyaho.

11 Aliwe abolo bakendisyikala omo kihugho,

Kandi bakendisyayisyandira omo buholo bunene.

12 Omundu mubi akaya embita busana n’omundu oyutunganene;

Akamukeregheretera ameno.

13 Nikwa Yehova akendimuseka,

Kundi anasi ngoko ekiro kiwe kikendihika.

14 Ababi bakimaya emiyali yabo n’erikakya* amata wabo

Batoke erikimya oyukanubibawa n’omwera,

Erikera ab’enzira eyitunganene.

15 Nikwa omuyali wabo akendisyatsimita emitima yabo;

N’amata wabo akendisyatsutsangika.

16 Ebike ebyo omutunganene awite

Bilengire obuteke bungyi bw’ababi.

17 Kusangwa amaboko w’abakola-nabi akendisyabunwa,

Aliwe Yehova akendisyawatikya abatunganene.

18 Yehova anasi ebyo abateko olubanza bakalabamo,*

N’omwandu wabo akendisyabyaho kera na kera.

19 Sibendisyahemuka omughulu w’amalighe;

Omughulu w’enzala bakendisyabya ibane n’akalyo kanene.

20 Nikwa ababi bakendisyahera;

Esyonzighu sya Yehova sikendisyabulirana ng’olulisiryo oluwene;

Bakendisyabulirirana ng’omuki.

21 Omundu mubi akayibweka nikwa syalituha,

Aliwe omutunganene ni mwenge* kandi akahitaya.

22 Abo oMungu abiritsumula bakendisyasighalya ekihugho,

Nikwa abo oMungu abiritakira bakendisyahiwa mukyo.

23 Yehova akasondola* ebisando by’omundu

Amabitsemera esyonzira siwe.

24 Nomo angatwikala, syangawa ahisi,

Kusangwa Yehova akamuhambirira oko byala.*

25 Nabya mulere, na lino niri mundu mukulu,

Aliwe sindinatalangira omutunganene akalekeranibwa,

Kutse abana biwe bakasabirirya akalyo.*

26 Ebiro byosi akabweka butsira ndundi

N’abana biwe bakendisyatsumulwa.

27 Ubinduke n’erileka* ekibi, ukole ekibuya

Ukendisyabyaho kera na kera.

28 Kusangwa Yehova anzire eritswera eritunganene,

Kandi syendisyasighania abataleghula biwe.

Bakendisyabya omo buteya mughulu wosi;

Nikwa abana b’ababi bakendisyaheribwa.

29 Abatunganene bakendisyasighalya ekihugho,

Kandi bakendisyikala kukyo kera na kera.

30 Obuno bw’omutunganene bukakangiriraya abandi b’amenge,*

N’olulimi lwiwe lukakanaya okw’itswera eritunganene.

31 Emighambo y’oMungu wiwe yiri omo mutima wiwe;

Ebisando biwe sibyendisyakita.

32 Omubi akatungerera omutunganene,

Akasonda-sonda erimwita.

33 Aliwe Yehova syendisyaleka omutunganene omo byala by’omundu oyo

Kutse erimwahula mo oyuliko olubanza* omughulu akatswerawa.

34 Uhire amaha oko Yehova kandi ukwame esyonzira siwe,

Akendisyakuhamya iwasighalya ekihugho.

35 Nabirilangira omundu mubi oyuwite omutima owakalire

Akayisanza ng’omuti owaliko amatahi mangyi owali oko kitaka kyagho.

36 Nikwa mwahwaho kitsumbukirania, amabulirana;

Munabya ngamusondya-sondya aliwe mundamubana.

37 Uyiteghereraye omundu oyuteko olubanza,*

Uhande oko mundu oyuluyirirene kw’eriso,

Kusangwa ebiro ebikasa by’omundu oyo bikendisyabyamo obuholo.

38 Aliwe abakola-nabi bosi bakendisyatoghotibwa;

Ababi sibawite amaha wosi-wosi omo biro ebikasa.

39 Omulamo w’abatunganene akalua oko Yehova;

Iye ni hakongotere habo omo mughulu w’amalighe.

Akendisyalusyabo omo byala by’ababi n’erilamyabo,

Kusangwa bakabana obusaghiro okw’iye.