Isaya
14 Kusangwa Yehova akendisyaghanyira Yakobo, kandi akendisyasyasombola Israeli. Akendisyikalyabo* omo kihugho kyabo, n’ab’ehandi bakendisyayihira kubo n’erimatana n’enyumba ya Yakobo. 2 N’ebitunga by’abandu bikendisyimyabo n’eriletabo omo mwanya wabo, n’enyumba ya Israeli ikendisyimyabo n’eriyirabo mo bakobe babo b’obulume n’ab’obukali omo kihugho kya Yehova; kandi bakendisyanyegha abayirabo mo banyewa, n’eritabala oko ababya bakakasirabo oko mubiiri.*
3 Ekiro Yehova akendisyakuluhukya oko maghali n’okw’inuba lyaghu n’oko bukobe obukalire obo wakasirawako. 4 Ukendisyasekererya* omwami we Babiloni uti:
“Oyukakasira abandi oko mubiiri* naye abirihika oko nduli yiwe.
Omunubo ahwere!
5 Yehova abiribunanga omutso w’ababi,
Omwigho w’abatabali.
6 Oyukaswiraya omo buhitane butsira eryumbya ebitunga by’abandu omo syongume,
Oyukakinda ebihanda omo buhitane omw’endererya erityumbaya.
7 Lino ekihugho kyosi kitulere, kitekene,
Abandu bakuta obwogho bw’obutseme.
8 Nibya n’emiti y’ekilaghu ikatsema busana n’ebyabirikuhikira,
N’emiti ye Lebanoni kutya.
Ikabugha yiti, ‘Eritsuka omughulu wawa,
Sihali omukondi w’emiti oyo wabiryasa erisyatukonda.’
9 Nibya n’Eyisinda,* eyikwa ikakangamuka,
Erihindana naghu ukasa.
Busana naghu, ikabukaya abateyitoka omo luholo,
Abasondoli* bosi b’ekihugho abanubya.
Ikaleka abami bosi b’ebihanda ibahangana oko bitumbi byabo by’obwami.
10 Abosi bakabugha n’erikubwira bati,
‘Naghu wabiryoloba nga twe?
Wabiribya nga twe?
11 Emiyiheko yaghu yabirindaghalira omw’Isinda,*
Emilenge y’ebyombo byaghu by’omuziki eby’esyosinga.
Emihuka yisanzire ahikwa okw’iwe eribya ngyingo yaghu,
N’eminyole kye ky’eriyiswika kyaghu.’
12 Naghu wabiritogha erilua omo kyanya,
Iwe ukakangabasanaya, omughala w’emitsange!
Naghu wabirikonderwa oko kitaka,
Iwe wakinda ebihanda!
13 Muwayibwira omo mutima uti, ‘Ngendihetukira omo kyanya.
Ngendisumbira ekitumbi kyaghe ky’obwami endata oko syongununu sy’oMungu,
Kandi ngendiikala oko kitwa ky’omuhindano,
Omo bitswe by’ehali-hali by’oluhande lw’endata.
14 Ngendihetukira endata oko bitu;
Ngendileka inasosa Ow’endata Kutsibu.’
15 Omo mwanya w’ekyo ukendindaghalira omw’Isinda,*
Omo bitswe by’ehali-hali by’ekyuna.
16 Abakakulolako bakendisyakuhandako ameso;
Bakendisyayiteghererya iwe, ibabugha bati,
‘Oyu yo n’omulume oyo wabya akasuka-sukania ekihugho,
Oyo waleka amami inyatitimana,
17 Oyo waleka ekitaka ekikerweko ikyabya ng’embwarara
N’erikinda emiyi yakyo,
Oyo waghana eribohola abandu b’omuliki erisuba eka wabo?’
18 Abandi bami bosi b’ebihanda,
Inga, abosi, baghotsere omo lukengerwa,
Obuli mughuma omo yisinda yiwe.*
19 Nikwa wabirighuswa, sighuli omw’isinda,
Ng’erisasa* erikwirwe esyonye,
Wambite abitawa abatsimitawa omo muyali,
Abakandaghalira oko mabwe w’ekyuna,
Ng’ekinda ekyabirilyatangirirwa.
20 Siwendisyabya haghuma nabo omw’isinda,
Kusangwa muwatsandya ekihugho kyaghu,
Muwita abandu baghu.
Abana b’abakola-nabi sibendisyasyahulwa oko rina.
21 Muteghekanaye ah’erikerera* abaghala biwe,
Busana n’olubanza* lw’abotata-kulu wabo,
Bakasyahangana n’erimya ekihugho
N’eryusulya omo kihugho mw’emiyi yabo.”
22 “Ngendihangana erilwa nabo,” Yehova w’emilondo atya.
“Kandi ngendibirya-birya omo Babiloni erina, n’emisighalira, n’abitsikulu, n’omulala,” Yehova atya.
23 “Kandi ngendisyayiragho mo bwikalo bw’esyondiko n’ekihugho ky’ekisesa, kandi ngendisyabiryagho omo kibiryo ky’eritoghotya,” Yehova w’emilondo atya.
24 Yehova w’emilondo abirilahirya ati:
“Ngoko nanabiriyisunza, ko binemwendisyabya bitya,
Kandi ngoko nanabiriyisogha, ekyo kyo kikendisyabererera.
25 Ngendisyahinolera Omuasiria omo kihugho kyaghe,
Kandi ngendisyamulyatangirira oko bitwa byaghe.
Omuketo wiwe akendisyalusibwa kubo,
N’omuheke wiwe akendisyalusibwa oko kitigho kyabo.”
26 Eki kyo kyabirisohwa* busana n’ekihugho kyosi,
N’ebi bye byala ebiyiteghekire* erihunza ebihanda byosi.
27 Kusangwa Yehova w’emilondo abirisoha,
Nindi yo wangalibatanganiakyo?
Abirisumba ebyala biwe,
Nindi yo wangakimyabyo?
28 Oko mwaka ogho Omwami Ahazi aholako, ebinywa bino by’eritswera mubyabuwa:
29 “Iwe Filistia, sighutseme, sihabye n’omughuma w’okw’inywe,
Uti kundi omutso w’oyo wabya akakuhunza abiritwika.
Kusangwa omo mulihi w’enzoka mukendisyalua enzoka y’esumu,
N’ekyana kyayo kikendisyabya nzoka y’omuliro eyikaghuluka.*
30 Akambere k’omundu w’ahisi ikanemulya
N’omwera inyanaghotsere mbolere,
Ngendisyita emirihi yaghu y’omo nzala,
N’ekyo wabirisighala nakyo kikendisyitwa.
31 Uyilakire, iwe lukyo! Ulire, iwe muyi!
Iwe Filistia, inywe bosi mukendiyibulamo omutima!
Kusangwa omuki anemwasira oko luhande lw’endata,
N’omo milondo yiwe y’abasuda simuli oyukasighala enyuma.”
32 Bakendisubirya bati abatumwa b’ekihanda ekyo?
Ngoko Yehova abirihimba efondasyo ye Sioni,
Kandi ngoko abandu b’ahisi omo bandu biwe bakendisaghirayo.