Isaya
57 Omutunganene abirikwa,*
Aliwe sihali oyutsomene.
Abataleghula baghu babiritwalwa,
Aliwe sihali oyukaminya ngoko omutunganene abiritwalwa
Busana n’obuhanya.*
2 Akingira omo buholo.
Bakaluhukira oko syongyingo syabo,* abosi abakalendera omw’itunganana.
3 “Nikwa inywe, museghere hakuhi,
Inywe bana b’omukumu-kali,
Inywe bana b’omusingiri n’omumbalaka:
4 Mukasekandi?
Nindi yo mukatandira obuno bwenyu, n’erihulukirya olulimi lwenyu?
Inywe si muli bana b’erilolo
N’abana b’amatebo,
5 Abakakamo esyongumbu omo kati-kati k’emiti minene-minene,
Omo ndina y’obuli muti owaliko ebiti binene,*
Abakakerera abana b’omo misya,*
Omo mighenyo y’olukuka?
6 Erighabo lyaghu liri omo kati-kati k’amabwe w’omo musya* awatendere.
Inga, aya wo righabo lyaghu.
Nibya ukutulira kugho kw’obuhere bw’obwabu n’erihagho ebihembo.
Linatolere inatsemera emyatsi eyi?*
7 Muwahira engyingo yaghu oko kitwa kiri-kiri ekiyisumbire,
Kandi muwahetukirayo eriyaherera obuhere.
8 Muwahanda ekibukyo kyaghu enyuma sy’oluyi n’enyuma sy’enzeghuliro.
Muwanisighania n’eriyiswikula;
Muwahetuka n’eriyira engyingo yaghu mo nene.
Kandi muwayira endaghane haghuma nabo.
Muwanza erighotsera nabo oko ngyingo yabo,
Kandi muwatungerera ekitsuko ky’obulume.*
9 Muwandaghalira eyiri Meleki* n’amaghuta
N’amanukato mangyi.
Muwatuma abakwenda baghu bo hali,
Kyamaleka ibandaghalira omw’Isinda.*
10 Wabirinuba ukakwama esyonzira syaghu nyingyi,
Nikwa mughutabugha uti, ‘Sihakiri maha!’
Muwabana amaka mahya-mahya.
Neryo sighulilwika.*
11 Wasagha ndi n’erikwa obuba
Kyamaleka iwatsuka eribugha amabehi?
Mughutanibuka.
Mughutatsomana ekyosi-kyosi.
Sinitabya bukutu n’eribisa-bisa emyatsi kwehi?*
Neryo mughutanyubaha.
12 Ngendiminyinyikalya emibiiri yaghu n’eritunganene lyaghu,
Nabyo sibyendikuletera ndundi.
13 Ukendisyabya ukalaka ukasonda obuwatikya,
Esyosanamu syaghu esyo warihindania sisyendiyakusabula.
Erihunga likendisyatwalasyo hali,
Omuka buyira akendisyatwalasyo hali,
Nikwa oyukaniyira mo busayiro akendisyasighalya ekihugho mo mwandu
Kandi akendisyasighalya ekitwa kyaghe ekibuyirire.
14 Akendisyowa ekinywa kiti, ‘Muhimbe, muhimbe embalo! Muteghekanaye enzira!
Mulusaye omo nzira y’abandu baghe mw’ekindu kyosi-kyosi ekikatwikalaya.’”
15 Kusangwa Oyuli endata n’Oyuyisumbire kutsibu,
Oyuliho kera na kera n’oyo erina liwe ni ribuyirire ati:
“Nyikere ah’endata n’ahabuyirire,
Aliwe kandi nyikere haghuma n’ab’ekirimu kyolo-kyolo kandi ekipondekene,
Erisubya ekirimu ky’omundu w’ahisi
N’erisubya omutima w’abakahinolerawa.
16 Kusangwa sinendisyalwa nabo kera na kera
Kutse eribya ininahitene kubo;
Kusangwa ekirimu ky’omundu kyanganalembera busana naghe,
Kutya n’ebihangyikwa ebikahumula ebyo nahangyika.
17 Munahitana busana n’erilolo riwe ery’erikwamirira endundi eyite y’ekwenene,
Neryo munamuhunza, munabisa obusu bwaghe, kandi munahitana.
Nikwa mwalola embere omw’iyisamambula liwe, amakwama enzira eyo omutima wiwe anzire.
18 Nabirilangira esyonzira siwe,
Aliwe ngendimulamya n’erimusondola
N’erimusubulirya* erikirania iye n’abandu biwe abakalira.”
19 “Ngahira eripipa* oko minywa.
Obuholo obutehwa bukendisyahabwa oyuli hali-hali n’oyuli hakuhi,” Yehova atya,
“Kandi ngendisyamulamya.”
20 “Nikwa ababi bali ng’engetse eyighungire eyitetekana,
N’amaghetse wayo akabera erighusa ebiti n’olondo.”
21 OMungu waghe ati, “Sihali obuholo busana n’ababi.”