Isaya
40 “Mukiranaye, mukiranaye abandu baghe,” oMungu waghu atya.
2 “Mutule oko mutima* we Yerusalema,
N’eritulirayo mwatsi ngoko omubiiri wayo w’erikasirwako abirihika oko nduli yagho,
Ngoko erilolo lyayo ryabirilihwa.
Yabiribana erilua omo byala bya Yehova ebyosi ebyo yabya yitolere* busana n’erilolo lyayo.
3 Omundu anemubirikira omo mbwarara ati:
“Muwanaye* enzira ya Yehova!
Mukokoteraye oMungu wetu y’enzira eyilungukere omo mbwarara.
4 Obuli musya asumbawe,
N’obuli kitwa n’akatwa bikendibonderibwa.
Ekitaka ky’ebikunguli-kunguli kibetekereribawe,
N’ekihugho ky’ebibwe-bibwe* kibye kiharo ky’omusya.
5 Olukengerwa lwa Yehova lukendisyabisulwa,
N’abandu bosi* bakendisyalangiralo haghuma,
Kusangwa obuno bwa Yehova bwabiribugha.”
6 Hulikirira! Omundu anemubugha ati: “Birikira!”
N’oghundi iniabulya ati: “Nibirikire nitiki?”
“Abandu bosi* ni biti bibisi.
Olwanzo lwabo lwosi oluteleghula luli ng’omusanga w’omoli.
Oko kwenene abandu ni biti buyira.
8 Ebiti bibisi bikuma,
N’omusanga akuma,
Alwe ekinywa ky’oMungu wetu kikabyaho kera na kera.”
9 Uhetukire oko kitwa kiri,
Iwe mukali oyukaletera Sioni y’engulu mbuya.
Usumbe omulenge waghu wo kutsibu,
Iwe mukali oyukaletera e Yerusalema y’engulu mbuya.
Usumbegho, sighubahe.
Ubwire emiyi ye Yuda uti: “OMungu wenyu y’oyu.”
10 Mulebaye! Yehova, Omukama Mukulu oko Bosi akendyasa n’amaka,
N’okuboko kwiwe kukendisyamutabalira.
Mulebaye! Oluhembo lwiwe lune haghuma naye,
N’obuhingyi obo akaliha bune embere siwe.
11 Akendisyalisya* ekihangulo kiwe ng’omulisya.
Omo kuboko kwiwe, akendisyahindania haghuma ebyana by’esyombuli,
Kandi akendisyahekabyo oko kikuba kiwe.
Akendisyasondola lyolo-lyolo esikongaya* ebyana byasyo.
12 Nindi yo wabirilenga amaghetse omo kighanza ky’ebyala biwe
N’eripima ekyanya omo pa y’ebyala biwe?
Nindi yo wabirihindania olututu lw’ekihugho omo kindu ky’eripimamo
Kutse erilenga ebitwa oko bilo
N’erilenga ehitwa oko kilo?
13 Nindi yo wabirilenga* ekirimu kya Yehova,
Kandi nindi yo wangamuhana n’erimukangirirya?
14 Mwabulyandi y’erihano angabana obuyiteghererya,
Kutse nindi yukamukangiriraya enzira y’obulingirirania,
Kutse erimukangirirya amenge,
Kutse nindi yukamukanganaya enzira y’obuyiteghererya bw’ekwenene?
15 Lebaya! Ebihanda biri ng’eritondi omo mbegeti,
Kandi bikaghanzawa ng’olututu olwabirighulukira oko bilo.
Hulikirira! Akasumba ebitsira ng’olututu luke kutsibu.
16 Nibya ne Lebanoni siyitosire erileka omuliro eribya inianemwaka,*
N’esyonyama syayo sy’omoli sisyangatosa busana n’obuhere bw’eryokererya.
17 Embere siwe, ebihanda byosi biri nga sibiriho;
Akalangirabyo ng’ekindu buyira, ng’ekiteho.
18 Mwangalinganisya oMungu nandi?
Mwangamusosekania naki?
20 Akasombola omuti mo kihembo kiwe,*
Omuti owate angahonda.
Akasondaya omufundi oyukalire
Amubatsire esanamu eyibatsire, eyiteyangatengana.
21 Simwasi?
Simwemwowa?
Simwetabwirwakyo eritsuka oko nzuko?
Simutayiteghereryakyo eritsuka oko syofondasyo sy’ekihugho?
22 Hali oyo wikere endata oko kiringo* ky’ekihugho,
N’abikere kukyo bali ng’emisyenene.
Akakakaya ekyanya ng’akakimba ak’eraba-raba,
Kandi akasanzakyo ng’ehema y’eriikalamo.
23 Akabuliranaya abatabali
Kandi akayira abatsweri* b’ekihugho mo kindu buyira.
24 Isibalibaherwa,
Isibali babibwa,
Endina yabo isiyeyahanda omo kitaka mw’emirihi,
Neryo bakabuhirirawa n’eryuma,
N’erihunga likahekabo ng’esyombuba.
25 Omubuyirire ati: “Wanganisosekania nandi uti nilingirirene naye?”
26 “Musumbe ameso wenyu, mutungerere elubula.
Nindi yo wahangyika ebyosi ebi?
Yo yukahulukaya emilondo yasyo omo mighanzo;
Akabirikara esyosi omo mena wasyo.
Busana n’akaghala kiwe kanene kutsibu, n’obutoki bwiwe obukaswekaya,
Sihali n’enguma ya kusyo eyikabula.
27 Iwe Yakobo, busanaki ukabugha, naghu iwe Israeli busanaki ukatulagho uti,
‘Enzira yaghe yibisamire oko Yehova?
Kandi sindibana eritswera eritunganene erilua ew’oMungu’?
28 Siwasi? Sighuli wanowa?
Yehova, oyo wahangyika esyonduli sy’ekihugho, ni Mungu wa kera na kera.
Syaliluha n’ahake kutse erilembera.
Amenge wiwe syangayiteghereribwa.*
29 Akaha oyuluhire y’akaghala
N’eriha oyutawite akaghala* y’amaka manene.
30 Abalwana bakendisyaluha n’erilembera
N’abalume abakine balere bakendisyatwikala n’eriwa,
31 Nikwa abakahira amaha w’oko Yehova, bakendisyabana amaka mahya-mahya.
Bakendisyaghuluka* endata omo bipupa ng’amasamba.
Bakendisyatibita butsira erilembera;
Bakendisyaghenda butsira eriluha.