Ebaruha y’akabiri oko Abanya Korinto

9 Namalangira isi ky’omughaso eribahandikira busana n’omwatsi owalebirye omubiiri ow’eriwatikya ababuyirire, 2 kundi ninasi ngoko muli n’omutima w’eriwatikya, n’ekyo kikaleka inayihalamba busana nenyu oko Abanya Makedonia. Ngabya ininemubabwira niti hamabilaba omwaka mughuma abanya Akaya ibane tayari. Kandi omuhwa wenyu abirileka abangyi ba kubo n’abo ibabya n’omutima w’eriwatikya. 3 Aliwe, ngatuma abaghala betu, kusudi ebyo twabya tukabugha tukayihalamba busana nenyu isibyabya mabehi, kandi imwatoka eribya tayari ngoko nabya inabirikangania. 4 Aliwe, tubughe tuti Abanya Makedonia ibasa haghuma naye, neryo ibeya isimuli tayari. Itwe nenyu itukendihemuka, kundi mutwayiketera inywe. 5 Neryo munalangira ini ky’omughaso eribwira abaghala betu niti batsuke erihika ewenyu embere tuhikeyo, n’eritsuka erikuma-kuma ebihembo ebyo mwalagha eriteka, kusudi bibye tayari kandi bilangirikemo bihembo ebiryatekawa n’omutima wosi, butsira nga biryapurawa.

6 Eky’eriminya kya kino: Oyukahera bike, akendisyasoloma bike. N’oyukahera binene, akendisyasoloma binene. 7 Obuli mundu akole ngoko abiriyisogha omo mutima wiwe. Syakole ng’oyutanzire kutse ng’oyukakasawa, kundi oMungu anzire oyukahitaya n’obutseme.

8 Kandi oMungu ali n’obutoki bw’eribahirako olukogho lwiwe losi kusudi ebiro byosi mutoke eribya n’ebindu byosi ebyo mulaghireko, kandi mutoke eribya n’ebindu binene ebikendibawatikya erikola obuli mubiiri mubuya. 9 (Ngoko Amasako akabugha ati: “Abirighabira abandu ebindu binene kutsibu. Abiriha abera. Eritunganene riwe siryendisyahwa.” 10 Oyukaha embuto nene y’omundu oyukahera, n’eriha abandu b’omukati w’erirya, akendisyabaha embuto y’erihera n’erikanyayo. Kandi akendisyabawatikya eribana ebindu bingyi busana n’eritunganene ryenyu.) 11 Munemutsumulwa omo buli mwatsi mutoke eribya mukahitya kutsibu. Neryo ebyo tukakola bikaleka abandu ibasima oMungu. 12 Kundi omubiiri ogho mukakola ow’eriwatikya abandu akawatikaya ababuyirire eribana ebyo balaghireko, kandi akaleka abandu bangyi ibasima oMungu. 13 Omubiiri oyu ow’eriwatikya abandu akaleka ibapipa oMungu, kundi munemuyighendya erikwamana n’engulu mbuya eyo mukatulaghanaya eyilebirye Kristo, kandi kundi mukabya imunemubaha oko bindu byenyu, n’eriha abandu bosi. 14 Kandi bakalemba-lemba oMungu busana nenyu. Omughulu bakakola batya, bakakanganaya ngoko babanzire busana n’olukogho lunene olo Mungu abiribakangania inywe.

15 OMungu apipawe busana n’ekihembo kiwe ekyo atuha buyira, ekyo tutetwangatoka erikania.