Ebaruha y’erimbere oko Abanya Korinto
9 Ni bugha ambu ingye sinangakola ekyo nanzire? Siniri mukwenda? Munitalangira Yesu Omukama wetu? Simwasi ngoko muli mubiiri waghe omo Mukama? 2 Abandi sibalinilangiramo mukwenda. Aliwe inywe, mukanilangiramo mukwenda. N’inywe mukakanganaya ngoko niri mukwenda w’Omukama.
3 Kino kyo ngabwira abakanibughako muhanda: 4 Mukalengekanaya muti netu situhamulirwe erirya n’erinywa ebyo bandi bakatuha? 5 Mukalengekanaya muti situhamulirwe erilunga n’erighenda haghuma n’omukali oyo wikirirye? Abandi bakwenda, n’abalere b’Omukama, na Kefa,* abosi bakakola batya. 6 Mukalengekanaya muti ye Barnaba naghe musa n’itwe tutolere erikola omubiiri owangatuwatikya eribana ebyo tulaghireko? 7 Hane omusuda oyukayilihira ebyo alaghireko? Nindi y’ukahera emizabibu neryo iniatalya oko matunda w’emizabibu? Ni mulisyandi oyutenywa oko maziwa w’esyonyama syomo kihyo kiwe?
8 Amalengekania w’abandu wateleka inabugha nitya. N’Emighambo ko yikanabugha yitya. 9 Omo Mighambo ya Musa muhandikire muti: “Isiwaboha obuno bw’enume y’ende omughulu ikahumba engano.” Mukalengekanaya muti esyonume sy’esyonde syo Mungu atsomene sisa? 10 Kutse simwasi ngoko oMungu mwabugha atya busana netu? Ekyo kyahandikawa busana n’endundi yetu. Oyukalima eririma n’oyukahumba engano, abosi batolere ibabana endundi omughulu w’erighesa.
11 Twamabya imotwahera ekinywa ky’oMungu omo kati-kati kenyu, nina kibi mwamatuha oko bindu byenyu? 12 Abandi bamabya ibatolere erihabwa oko bindu byenyu, simulangire ngoko itwe tutolere kutsibu okw’aho erihabwa oko bindu byenyu? Aliwe, itwe sitwetwatabasaba kindu. Omo mwanya w’erikola tutya, mutwayiyinia omo maligho mbiriri-mbiriri tukasyaleka omundu wosi-wosi iniatikirirya engulu mbuya ya Kristo. 13 Munasi ndeke-ndeke ngoko abakakolera oko hekalu bakalya ebindu ebyo bandu bakaleta oko hekalu. N’abakakolera oko kiherero bakalya oko bindu ebikahererawa oko kiherero. 14 Kutya, Omukama mwabugha ati abakahubiraya engulu mbuya bakendisyabya bakabana ebyo balaghireko erilabira engulu mbuya.
15 Aliwe, sinirinatabasaba kindu. Kandi siniribahandikira emyatsi eyo kundi nanzire imwamba kindu kilebe. Kyanganuwana inahola omo mwanya w’erileka omundu inianisaghula ekikaleka inayipipa. 16 Namatula engulu mbuya, oyo si mwatsi owangaleka inayipipa. Nisabirwe erikola nitya. Niri muhanya namatenditula engulu mbuya! 17 Namabikola nitya n’omutima wosi, ingendisyahembwa. Aliwe, nomo nangakola nitya butsira eryanza, nisabirwe erikola omubiiri oyo. 18 Neryo ekihembo kyaghe niki? Ry’eritula engulu mbuya n’omutima wosi, kandi bule. Omo nzira eyo, isinendikolesya muhanda olusunzo lwaghe lw’eribya mutuliri w’engulu mbuya.
19 Nomo siniri mukobe w’omundu, nabiriyiyiramo mukobe w’abandu bosi. Ngakola nitya nitoke eriwatikya abandu bangyi kyamatokekana. 20 Oko Bayahudi, ngabya Muyahudi, nitoke eriwatikya Abayahudi. Oko bakakwama emighambo, ngabya ng’oyukakwama emighambo, nitoke eribawatikya. Nomo nitasabirwe erikwama emighambo, ngakola nitya nitoke eriwatikya abakakwama emighambo. 21 Oko batekwama emighambo, ngabya ng’oyutekwama emighambo nitoke eribawatikya. Ngakola nitya nomo nganakwama emighambo y’oMungu, kandi nomo nganasondolawa n’emighambo ya Kristo. 22 Oko batawite akaghala, ngabya ng’abatawite akaghala, nitoke eribawatikya. Ngabya ng’abandu bosi nitoke eriwatikya abaghuma ba kubo kyamatokekana. 23 Ngakola ebyosi ebyo busana n’engulu mbuya, nitoke eribwirayo abandi.
24 Munasi ngoko abakakola amasindano w’eritibita bakabya bangyi. Aliwe, omughuma musa yukabana ekihembo. Neryo mutibite mukalandamirira eribana ekihembo. 25 Obuli mundu oyukakola oko masindano akayikakiraya kutsibu. Akakola atya busana n’eribana embita eyikatsanda. Aliwe itwe, tukakola tutya busana n’eribana embita eyiteyangatsanda. 26 Siniritibita kitya-kitya. Sinirighusa engume ng’oyukaghusayo omo kyanya. 27 Ngaghalaya omubiri waghe n’erikolesyagho ng’omukobe. Ngakola nitya ngasyaghanwa nabihubirya abandi.