Ebaruha oko Abanya Roma
5 Neryo kundi lino twabirighanzwamo batunganene busana n’obwikirirya bwetu, tubye omo buholo haghuma n’oMungu erilabira Yesu Kristo Omukama wetu. 2 Erikirirya Yesu rikaleka itwabya bira b’oMungu, kandi rikaleka oMungu iniatukangania olukogho lwiwe. Tutsemire kundi tuwite amaha ngoko oMungu akendisyatuyiramo abandu b’olukengerwa. 3 Aliwe kandi, tukatsema omughulu tukaghalawa kundi tunasi ngoko eryaghalwa rikaleta eriyiyinia. 4 Eriyiyinia rikaleka itwasimwa n’oMungu, n’erisimwa n’oMungu rikatuha amaha, 5 n’amaha wetu syangaleka itwahemuka kundi oMungu akakolesaya ekirimu kiwe kibuyirire ekyo akatuha erikangania ngoko atwanzire.
6 Omughulu twabya isituwite omundu oyo wangatuwatikya, Kristo mwahola busana n’abandu babi, oko mughulu ow’abya iniabirihirwaho. 7 Abandu bake kutsibu bo bangaligha erihola busana n’omundu oyutunganene, aliwe omundu anganaligha erihola busana n’omundu oyuwene. 8 Nomo bine bitya, oMungu abiritukangania olwanzo lwiwe kundi omughulu twabya itukine bakola-nabi, Kristo mwahola busana netu. 9 Neryo kundi lino twabirighanzwamo bandu abatunganene erilabira omusasi wa Yesu, twanganaligha butsir’itika-tika ngoko tukendisyalamibwa omughulu oMungu akendisyaha abandu b’amalipizi. 10 Nomo twabya nzighu sy’oMungu, twabiribya bira biwe kundi Omughala wiwe mwatuholera. Neryo kundi lino tuli bira b’oMungu, twikirirye ndeke-ndeke ngoko tukendisyalamibwa kundi Yesu aneho. 11 Ekyo Mungu atukolera erilabira Omukama wetu Yesu Kristo kikaleka itwatsema kundi Yesu abirituwatikya eritasyabya bira b’oMungu.
12 Erilolo muryingira omo kihugho busana n’omundu mughuma. N’erilolo muryaleta oluholo. Neryo abandu bosi bakahola kundi abosi mubakola erilolo. 13 Erilolo muryingira omo kihugho isihalihabya Emighambo. Aliwe, siwangabugha uti omundu mwakakola erilolo ahate emighambo. 14 Oluholo mulwatabala ng’omwami eritsuka oko Adamu erihika oko Musa. Nibya mulwatabala oko bandu abatakola erilolo nga Adamu. Adamu abya asosire oyo wangasire enyuma sy’aho.
15 Aliwe, ekihembo ky’oMungu sikiri ng’erilolo rya Adamu. Abandu bangyi bakahola busana n’erilolo ry’omundu mughuma. Aliwe, olukogho lw’oMungu n’ekihembo kiwe ekyo atuha busa erilabira olukogho lw’omundu mughuma, Yesu Kristo, ni binene kutsibu. Ekihembo ekyo kikaleka oMungu iniaha abandu bangyi emiyisa minene. 16 Kandi ekihembo ekyo Mungu atuha busa, n’erilolo ry’omundu mughuma bisosene omo nzira eno: Omundu akabya abikola erilolo, akabyako omusango. Aliwe, abandu babere babikola amalolo, ekihembo ekyo Mungu ahabo kyabya erighanzabo mo bandu abateko omusango. 17 Oluholo mulwatabala ng’omwami busana n’erilolo ry’omundu mughuma oyo. Ahate eritika-tika, abo oMungu akakanganaya olukogho lwiwe lunene, n’abakaha buyira ekihembo ky’erighanzwamo batunganene bakendisyabya bami erilabira omundu mughuma, Yesu Kristo.
18 Erilolo ry’omundu mughuma muryaleka abandu bosi ibabyako omusango. Kutya, ekyo omundu mughuma oyutunganene akola, mukyaleka abandu bosi ibaghanzwamo batunganene batoke erisyabana engebe. 19 Eritendyowa ry’omundu mughuma muryaleka abandu bosi ibabya bakoli b’amalolo. Kutya, eryowa ry’omundu mughuma rikendisyaleka abandu bangyi ibabya batunganene. 20 Emighambo yahirawaho erikangania ngoko abandu boswiremo amalolo mangyi. Aliwe, amalolo abere abikanyirira, olukogho lw’oMungu nalo mulwakanyirira kutsibu. 21 Neryo, ngoko erilolo muryatabala ng’omwami n’erileta oluholo, kutya olukogho lw’oMungu lunemutabala lino ng’omwami omo ritunganene. N’ekyo kikendisyaleka itwabana engebe ya kera na kera erilabira Yesu Kristo Omukama wetu.