Ebaruha oko Yakobo
1 Ebaruha eno ikalua oko Yakobo, omughombe w’oMungu n’ow’Omukama Yesu Kristo. Ngatumirayo ebihanda 12 ebyabiripanzwa-panzwa.
Namabaramukya!
2 Baghala betu, mutseme kutsibu omughulu mukahikirawa n’amaligho* mbiriri-mbiriri, 3 kundi munasi ngoko omughulu obwikirirya bwenyu bukalengawako butya, ekyo kikaleka imwabya n’omubere w’eriyiyinia. 4 Aliwe, muleke eriyiyinia ribughirire omubiiri waryo, mutoke erihika-hikana n’eritendibya n’obulema omo myatsi yosi, n’eritendibula kindu.
5 Omw’inywe mwamabya omundu oyubulire amenge, abye akasaba oMungu, kundi akahagho abandu bosi n’omutima wosi, kandi syalihayira* oyukamusabagho, neryo iniakendihabwagho. 6 Aliwe, syaleke erisabagho kandi abye akasabagho iniane n’obwikirirya kandi butsir’itika-tika, kundi oyukatika-tika ali ng’ebisunda by’engetse ebyo erihunga rikasumba n’eritwalabyo eyi n’eyi. 7 Omundu oyo isyalindirira ekindu kyosi-kyosi oko Yehova.* 8 Ni mundu oyukabula ng’ali oko kyahi, akabula ng’aghendere oko byahi omo byosi ebyo akakola.
9 Aliwe, omughala wetu mwera atseme* kundi abirihirwa omo mwanya w’endata, 10 n’omuteke atseme busana n’erisubibwa ahisi, kundi akendisyahwaho ng’eriwa ry’omoli. 11 Omughulu eryuba rikahuluka n’ekihuhania ekikahisaya, ebiti bikuma n’amawa wabyo iniatogha n’eriherya obubuya bwagho. Kutya, omuteke naye akendisyahwerekerera inianemukola emibiiri yiwe.
12 Omundu oyuteleka eriyiyinia omo maligho atsemire, kundi akendibya abiyiyinia, inialiwa n’oMungu. Neryo akendisyahabwa embita y’engebe eyo Yehova* abirilagha abateleka erimwanza. 13 Omughulu omundu amahikirwa n’amaligho,* isyabugha ati: “OMungu yukanilengako.” Kundi oMungu syangalengwako n’emyatsi mibi, naye iyuwene-wene syangalenga oko mundu omo myatsi mibi. 14 Aliwe, obuli mundu akalengawako omughulu akakurawa n’eritebwa* n’engumbu yiwe. 15 Neryo engumbu yabiheka obukule, ikabuta erilolo; n’erilolo ryabikolwa, rikabuta oluholo.
16 Banzwa baghe, isimwatebawa. 17 Ekihembo kyosi-kyosi ekyuwene n’ekihembo kyosi-kyosi ekihika-hikene, bikalua endata. Bikalua oko Tata w’ebyakakala by’elubula. Iye syalibinduka, kutse erihinduka ng’ebitsutsu ebitebya haghumerera. 18 Busana n’erisonda riwe, mwatubuta erilabira ekinywa ky’ekwenene tutoke eribya abandu abatsuka erisombolwa* omo kati-kati k’ebihangyikwa biwe.
19 Baghala betu banzwa, mubye imunasi omwatsi ono: Ritolere obuli mundu iniabya mwangu erihulikirira, aliwe isyabya mwangu eribugha, kandi isyabya mwangu erihitana, 20 kundi omughulu omundu akahitana, syalikola ebitunganene embere sy’oMungu. 21 Neryo simubye mukakola ekyosi-kyosi ekiterire, kandi isimwasungikako n’obubi n’obuke.* Mubye bolo, kandi muleke oMungu ahere ekinywa kiwe omo mitima yenyu. Ekinywa kiwe kyo kyangabasabula.*
22 Aliwe, mubye mukakolesya ekinywa ky’oMungu, butsira eribya abandu abakahulikirirakyo risa, mukayiteba inywibene-bene omo malengekania w’amabehi. 23 Kundi omundu amabya akahulikirira ekinywa ky’oMungu, aliwe iniatakolesyakyo, iniali ng’omundu oyukalebaya obusu bwiwe omo kiyo. 24 Akayilebaya neryo iniaghenda, n’erilw’inibirirwa ng’ali ati. 25 Aliwe, oyukigha kutsibu* emighambo eyihika-hikene eyikaleka omundu iniabya bwiranda, n’erikwamayo, syali ng’omundu oyukahulikirira n’erilw’inibirirwa; aliwe, iye ni mundu oyukakolesaya ekinywa ky’oMungu. Neryo akenditsemera ebyo akakola.
26 Omundu amabilengekania ati akaramaya oMungu,* aliwe isyalitoka erikakirya olulimi lwiwe,* aho iniakayiteba omo mutima wiwe, n’eriramya riwe siriwite mughaso. 27 Ekisomo* ekyuwene n’eky’erire embere sy’oMungu na Tata ry’eriwatikya esyongubi n’abakwa-kali omo maligho wabo, n’eritendiyitsandya omo myatsi mibi y’ekihugho.