Yona
3 Yehova mwakania na Yona engendo y’akabiri, amamubwira ati: 2 “Hangana, uye e Ninawi, omuyi mukulu, uyabwire abandu be Ninawi ebyo ngakubwira.”
3 Yona mwasikya ebyo Yehova amubwira, neryo mwahangana, amaya e Ninawi. Ninawi abya ini muyi munene kutsibu,* omundu iniakabugha ebiro bisatu iniamabilaba omo wosi. 4 Neryo Yona mwingira omo muyi, amabugha ekiro kighuma akaghenda inianemubwira bandu ati: “Hakisiya ebiro 40, Ninawi iyatoghotibwa.”
5 Abandu be Ninawi mubikirirya oMungu. Mubabwira abandu ambu bakole amafungo n’eryambala esyongyimba sy’esaki,* eritsuka oko mukulu erihika oko mulere wa mubo. 6 Omwami we Ninawi mwabya abyowa oko mwatsi oyo, mwalua omo kitumbi kiwe ky’obwami, amalusya olukimba lwiwe lw’obwami, amambala olukimba lw’esaki,* neryo amikala omo ribu. 7 Kandi omwami mwabugha ati babwire abandu bosi be Ninawi bati:
“Omwami n’abakulu b’omo butabali bwiwe bamahiraho omughambo ono: Isihabya omundu kutse enyama, ende kutse embuli, eyikalya ekindu kyosi-kyosi. Isibyalya akalyo kutse erinywa amaghetse. 8 Aliwe biyiswike esyongyimba sy’esaki, ebyosi, omundu n’enyama. Kandi balakire oMungu yo kutsibu n’erileka emibere yabo mibi n’obutsururu. 9 Nindi yo wasi oMungu w’ekwenene nga syangayisubako* n’erileka erituhitanako kutsibu, neryo isitwenditoghotibwa?”
10 OMungu w’ekwenene mwabya abilangira ebyo balyakola, ngoko mubakaleka erikola ebibi, mwayisubako,* neryo mwatabaletera obuhanya obo abya iniabiribugha ati akendibaletera.