Yona
4 Aliwe ekyo mukyaleka Yona iniapona kutsibu, kandi mwahitana kutsibu. 2 Neryo mwasaba Yehova ati: “Yehova, ekyo kyo nabya ngabugha inikine omo kighugho kyaghe. Kyo kyaleka inasonda eritibitira e Tarsisi engendo y’erimbere; kundi nabya ininasi ngoko uli Mungu oyukakwa obulighe* kandi oyukaghanyira, s’ulihitana luba-luba kandi uli n’olwanzo lunene oluteleghula, kandi s’ulitsemera obuhanya. 3 Neryo lino, Yehova, kisi uniite,* kundi okw’ingye, kyuwene erihola kulenga kw’eribyaho.”
4 Yehova mwabulya Yona ati: “Unasingene erihitana?”
5 Neryo Yona mwalua omo muyi, amayikala ahisi oko luhande lw’eyo ryuba rikasira lw’omuyi. Mwayihimbira eyo ah’eribisama n’erikala omo kitsutsu kyaho atoke erilangira ebikendihikira omuyi. 6 Neryo Yehova oMungu mwalasya ekiti ekikasako ebitehi,* kibye endata oko mutwe wa Yona, kibye kitsutsu oko mutwe wa Yona, n’erimutulerya. Yona mwatsemera kutsibu ekiti ekyo ekikasako ebitehi.
7 Aliwe ekiro ekikwamire, bukasonda erikya, oMungu w’ekwenene mwatuma omunyole ayalye ekiti ekyo ekikasako ebitehi, neryo kyamuma. 8 Omwisi mwabya abikola, oMungu mwatuma n’erihunga erikumaya ry’oko luhande lw’eyo ryuba rikasira; omwisi mwapika omutwe wa Yona erihika oko kika amaleghetsana. Mwabya akabugha ati ngambe alyahola,* mwabya akabugha ati: “Okw’ingye, kyuwene erihola kulenga kw’eribyaho.”
9 OMungu mwabulya Yona ati: “Unasingene erihitana utya busana n’ekiti ekyo ekisako ebitehi?”
Neryo Yona mwabugha ati: “Ninasingene erihitana, erihitana kutsibu erihika oko kika ky’eryanza erihola.” 10 Aliwe Yehova mwamubwira ati: “Mughukakwira ekiti ekyo ky’obulighe, ekyo utalyanubira kutse erilasya; mukikalasa omo kiro ky’ekiro kighuma n’eryuma omo kiro ky’ekiro kighuma. 11 Naghe sinangakwa obulighe busana ne Ninawi, omuyi mukulu, owalimo abandu banene oko 120 000 abatasi nibya ekibuya n’ekibi, n’erikwira esyonyama syabo nyingyi sy’obulighe?”