Ebaruha y’erimbere ya Petro

5 Neryo, kundi naghe niri musyakulu kandi munayilangirira amaligho wa Kristo, kandi kundi ngendisyahabwa oko lukengerwa olukendisyabisulwa, ngalemba-lemba* abasyakulu abali omo kati-kati kenyu niti: 2 Mulisaye esyombuli* sy’oMungu, esyo Mungu abiribaha. Muteghayesyo, simubye nga mukakasawa. Aliwe, mukole mutya omwanza embere sy’oMungu. Kandi simukole mutya busana n’erirondya endundi y’okusyo. Aliwe, mukole mutya n’omuhwa. 3 Isimwatabala abandu abali mwandu w’oMungu. Aliwe, mubye eby’erileberyako oko syombuli. 4 Neryo omughulu omulisya mukulu akendisyakanganibwa, mukendisyabana embita y’olukengerwa eyiteyangahonga.

5 Kutya inywe balwana, mukenge abakulu okw’inywe.* Aliwe, inywe bosi mubye* mukayikehya obuli mundu oko mulikyabo, kundi oMungu akalwa n’abakayiheka, aliwe akakanganaya olukogho lwiwe abakayikehaya.

6 Neryo muyikehaye embere sy’oMungu wetu w’obutoki* atoke eribahira omo mwanya w’endata, oko mughulu owatolere. 7 Mukole mutya imunemughusira oMungu ebyosi ebikabahanga-hangaya, kundi abatsomene. 8 Mubye n’amenge kandi muyiteghaye, ye Diabolo, enzighu yenyu, akabya inianemughenda eyi n’eyi ng’esimba eyikaruruma akaronda ow’erirya. 9 Aliwe, mulwe naye imunasikire omo bwikirirya, kandi imunasi ngoko amaligho maghumerera ayo anemuhikira ekihanda kyosi ky’abaghala betu omo kihugho kyosi. 10 Nikwa mukendibya mwabyaghalwa omo katambi kake, oMungu w’olukogho losi, oyo wababirikira mutoke eribana olukengerwa lwiwe lwa kera na kera omo bughuma na Kristo, akendisyabuyirira amazoezi wenyu, akendisyabawatikya erisika, akendisyabaha akaghala, kandi akendisyabawatikya eritendisegha-seghana. 11 Ahabawe obutoki kera na kera. Amina.

12 Ye Silvano,* oyo ngalangiramo mughala wetu mutaleghula, yulyaniwatikaya eribahandikira ebinywa bike bino, nitoke eribasubya mutima, n’eribakangania ndeke-ndeke ngoko luno ni lukogho lw’ekwenene lw’oMungu. Neryo mumakirirelo. 13 Endeko eyiri e Babiloni eyirimo abasombolawa nga nywe yamabaha obuholo, na Mariko mughala waghe naye amabaha obuholo. 14 Muramukanaye omo lwanzo.*

Inywe bosi, inywe muli omo bughuma na Kristo mubye n’obuholo.