Ebaruha y’erimbere oko Abanya Korinto

15 Baghala betu, nanzire eribibukya engulu mbuya eyo nabakangiriraya. Mumwalighayo kandi mwabirikiriryayo. 2 Munemusabulwa mwamabimakirira engulu mbuya eyo nabaletera. Mutitamakirirayo, obwikirirya bwenyu ini bule.

3 Omo myatsi y’erimbere eyo nabakangiriraya muli emyatsi eyo naghe nakangiriribawa, ngoko erikwamana n’Amasako, Kristo mwahola busana n’amalolo wetu. 4 Erikwamana n’Amasako, mwatabwa, kandi mwalubukibwa omo kiro ky’akasatu. 5 Mwahulukira Kefa,* n’enyuma syaho mwahulukira abakwenda 12. 6 N’enyuma sy’aho, mwahulukira abaghala betu banene oko 500 oko mughulu mughumerera. Abangyi ba kubo bakineho, aliwe abandi babirihola. 7 Enyuma sy’aho, mwahulukira Yakobo. N’enyuma sy’aho, mwahulukira abakwenda bosi. 8 N’enyuma w’abosi, mwanihulukira ng’omwana oyulyabutawa isyalyaghonerya ebiro.

9 Ingye mulere omo bakwenda bosi, kandi sinitolere erihulwamo mukwenda kundi munaghalya ab’omo ndeko y’oMungu. 10 Aliwe busana n’olukogho lw’oMungu, niri ngoko niri lino. N’olukogho olo anikanganaya mulutahera bule kundi munakola kutsibu kulenga abandi bosi. Obutoki bwaghe si bo bwaniwatikaya erikola nitya, aliwe olukogho lw’oMungu lo lwaniwatikaya. 11 Mwamabya imwakangiriribawa naghe kutse n’abandi, oyo w’omwatsi ogho tukatula, n’oyo w’omwatsi ogho mwabirikirirya.

12 Omwatsi ogho tukatula akabugha ati Kristo abirilubukibwa. Neryo busanaki abaghuma b’okw’inywe bakabugha bati sihali erilubuka? 13 Hamabya isihali erilubuka, ni bugha ambu Kristo naye imwatalubuka. 14 Kandi Kristo amabya imwatalubuka, omubiiri wetu w’erihubiria isyawite omughaso, n’obwikirirya bwenyu n’abo isibuwite omughaso. 15 Nikwa ekikulu okw’ebyo, ituli bimiri* b’oMungu ab’amabehi. Aho itukatulaghanaya amabehi w’oko Mungu omughulu tukabugha tuti Kristo mwalubuka. Aliwe, ekyo sikyangabya kwenene, abaholi bamabya isibendisyalubuka. 16 Abaholi bamabya isibendisyalubuka, Kristo naye imwatalubuka. 17 Kristo amabya imwatalubuka, obwikirirya bwenyu ibuli bule, kandi imukine omo malolo wenyu. 18 Na kandi abigha ba Kristo ababirihola, ibabirihola olosi. 19 Twamabya itwabirihira amaha wetu w’omo Kristo busana n’amaisa ano masa, ituli bahanya kulenga abandi bandu!

20 Aliwe, tunasi ngoko Kristo mwalubukibwa. Yo w’erimbere erilubukibwa omo bosi ababirihola. 21 Kundi oluholo lwasa erilabira omundu mughuma, n’erilubuka naryo rikasa erilabira omundu mughuma. 22 Abandu bosi bakahola busana na Adamu. Kutya, abandu bosi bakendisyabyaho erilabira Kristo. 23 Aliwe, obuli mundu akendisyalubuka oko mughulu wiwe. Kristo yo wabya w’erimbere. N’enyuma sy’aho, abamwikirirye bakendisyalubuka. Bakendisyalubuka omughulu w’eribyaho riwe. 24 N’oko nduli, Kristo akendisyasubulirya Obwami bw’oMungu wiwe na Tata wiwe. Akendisyakola atya abibughaho amatabali wosi, obukulu bosi, n’amaka wosi. 25 Akendisyatabala ng’omwami erihika omughulu oMungu akendisyalyatangira esyonzighu syosi. 26 N’enzighu eyikendisyaheribwa oko mwiso l’oluholo. 27 Amasako akabugha ati oMungu “mwamuyiramo mutabali w’ebindu byosi.” Aliwe, omughulu oMungu akabugha ati atabale ebindu byosi, ekyo si bughambu oMungu naye akenditabalwa na Kristo. Kundi oMungu y’ukayira Kristo mo mutabali w’ebindu byosi. 28 Aliwe, oMungu akendisyabya abiyira Mughala wiwe mo mutabali w’ebindu byosi, Mughala naye akendisyakangania ngoko oMungu yo mukulu wiwe, oyukamuyiramo mutabali w’ebindu byosi. Neryo oMungu musa yukendisyatabala ebindu byosi.

29 Nikwa byasyabya biti oko bakabatisibawa busana n’eribya baholi? Abaholi bamabya isibendisyalubuka, busanaki bakabatisibawa olubatiso oluli ng’olo? 30 Busanaki obuli ndambi tukayihira omo hatari? 31 Obuli kiro bakasonda eriniita. Baghala betu, niri n’obutseme bunene bw’eriyihalamba busana nenyu kundi muli bira ba Kristo Yesu Omukama wetu. 32 Munabana endundi yahi namabya imunalwa n’esyonyama sy’omoli e Efeso ngoko abandi* bakola? Abaholi bamabya isibendisyalubuka, kwesi muleke tulye n’erinywa, kundi omungya itwahola. 33 Omundu isyabateba, abira babi bakatsandaya emibere eyuwene. 34 Mulengekanaye ng’abandu abawite obwenge kandi mukole ebyuwene. Muleke amalolo, kundi omw’inywe mune abatasi oMungu yo ndeke. Ngabugha ebinywa ebyo busana n’eribahemula.

35 Aliwe, abandu balebe banganabulya bati: “Abaholi bakendisyalubuka bati? Bakasyabya n’emibiri eyiri yiti?” 36 Ayo ni malengekania w’abakiru! Omughulu ukahera embuto yikatsuka erihola, neryo imo yalasa. 37 Omughulu ukahera, sighulihera ekindu ekyabirikula. Ukahera embuto nyisa, yanganabya mbuto y’engano kutse eyindi mbuto. 38 OMungu akaha obuli kindu ekikaherawa omubiri owanzire. Akaha obuli mbuto y’omubiri wagho. 39 Kandi ebindu byosi sibiwite omunyoku owasosene. Abandu, esyonyama, ehinyunyu, n’esyosamaki, ebyosi biriko omunyoku. Aliwe, eminyoku yabyo siyisosene. 40 Kutya, hali emibiri y’elubula n’emibiri y’oko kihugho. Olukengerwa lw’emibiri y’elubula silughumerera n’olukengerwa lw’emibiri y’oko kihugho. 41 Ekyakakala ky’omwisi sikisosire eky’omughenda, kutse eky’esyongununu. Ekyakakala ky’obuli ngununu sikisosire eky’esindi ngununu.

42 N’erilubuka ry’abaholi naryo ko riri ritya. Omubiri owakatabawa akahonda, aliwe omubiri owakalubukibawa syendisyahonda. 43 Akatabawa omo sisoni, aliwe akalubukibawa omo lukengerwa. Akatabawa isyawite akaghala, aliwe akalubukibawa iniabiribya n’akaghala. 44 Akatabawa ini mubiri w’ekinya-mubiri, aliwe akalubukibawa iniabiribya mubiri w’obunya-kirimu. Hamabya omubiri w’ekinya-mubiri, ihane n’omubiri w’obunya-kirimu. 45 Amasako akabugha ati: “Omundu w’erimbere yo Adamu mwabya mundu* oyuliho.” Adamu w’omwiso mwabya ekirimu ekikaha abandu b’engebe. 46 Aliwe omubiri w’obunya-kirimu watatsuka, omubiri w’ekinya-mubiri w’owatsuka. Abere abitsuka, n’ow’obunya-kirimu amasa enyuma. 47 Omundu w’erimbere mwalua omo kitaka, kandi abumbawa omo lututu. Aliwe, omundu w’akabiri alua elubula. 48 Ababumbawa omo lututu bali ng’omundu w’erimbere oyo wabumbawa omo lututu, n’ab’elubula bali ng’ow’elubula. 49 Ngoko lino tuli ng’oyo wabumbawa omo lututu, kutya tukendisyabya ng’ow’elubula.

50 Baghala betu, ngababwira omwatsi ono: Omubiri n’omusasi sibyangingira omo Bwami bw’oMungu, n’ekikahonda sikyangabya omo mwanya w’ekitekyangahonda. 51 Muhulikirire ngababwira ekumbo* nyibuyirire: Itwe bosi sitwendisyaghotsera omo luholo, aliwe tukendisyabindulwa. 52 Kyasyabya omo katambi kanyoho-nyoho, okw’inapalya, omughulu engunga y’omwiso ikendisyalira. Engunga yikendisyalira, n’ababirihola bakendisyalubukibwa n’omubiri owatendisyasyahonda, kandi tukendisyabindulwa. 53 Omubiri owakahonda akendisyabinduka n’eribya owatehonda. N’omubiri owakahola akendisyabinduka n’eribya owatendisyasyahola. 54 Aliwe, omughulu owakahonda akendisyabindulwamo owate angahonda, n’owakahola iniabya owate angahola, aho ebinywa bino ebyo Amasako akabugha bikendisyabererera: “Oluholo lwabiriheribwa kera na kera.” 55 “Luholo erikinda ryaghu riri hayi? Luholo erihutalya ryaghu riri hayi?” 56 Oluholo lukatuhutalaya busana n’erilolo n’Emighambo yo yikaha erilolo ry’akaghala. 57 Aliwe, tukasima oMungu kundi abirituwatikya erikinda erilabira Omukama wetu Yesu Kristo.

58 Neryo baghala betu banzwa, musike, isimwasegha-seghana. Biro byosi mubye n’ebingyi by’erikola omo mubiiri w’Omukama. Muminye ngoko ebyo mukakolera Omukama si bya busa.