Ebaruha y’erimbere oko Abanya Korinto

4 Ritolere abandu ibatuminyamo baghombe ba Kristo ababirihabwa esyokumbo* nyibuyirire sy’oMungu. 2 Neryo kundi tuli baghombe abo oMungu ayiketere, ritolere itwabya bataleghula. 3 Si ky’omughaso okw’ingye inywe erinitswera kutse etribinali yosi-yosi y’abandu. Nibya ingye ingyuwene-wene siniriyitswera. 4 Kundi sinasi nga hane ekosa eyo nabirikola. Aliwe, ekyo sikyangaleka inabugha niti niri mutunganene. Yehova* y’uniasi ndeke. 5 Neryo isimwatswera omwatsi wosi-wosi embere omughulu w’eritsweragho ahike. Omukama akendisyabya asa, akendisyakangania emyatsi y’obubiso-biso eyo bandu bakakola omo mwirima. Kandi akendisyakangania ebiri omo mutima w’obuli mundu. Neryo oMungu akendisyapipa obuli mundu ngoko atolere.

6 Baghala betu, mungakolesaya eky’erileberyako kyaghe n’ekya Apolo mutoke eryowa ebyo ngakanayako. Neryo erilabira eky’erileberyako kyetu, ritolere imwaminya akanuni kano: “Mukwame ebihandikire.”* Mwamabikwama akanuni ako, isimwendibya n’emiyiheko, n’erilangira omundu mulebe ng’uwene kulenga oghundi. 7 Kusangwa nindi yukaleka ighutasosa oghundi? Uwite okuki ekyo watahabawa? OMungu amabya imwakuhakyo, busanaki ukayiheka nga siwahabawakyo?

8 Mukalengekanaya muti mwabiribya n’ebindu byosi ebyo mulaghireko? Mukalengekanaya muti mwabiribya bateke? Mukalengekanaya muti mwabiritsuka eritabala butsir’itwe? Nangananza imwatsuka eritabala neryo netu tutoke eritabala haghuma nenyu. 9 Alinga twabiribya ng’ekindu ky’erisamalirwa n’ekihugho, n’abandu, n’abamalaika. OMungu abirileka ingye n’abandi bakwenda itwabya ekindu eky’erisamalirwa oko mwiso ng’abandu ababiritswerwa oluholo. 10 Tukalangirawamo bakiru busana na Kristo. Aliwe inywe, mukalengekanaya muti muli n’amenge busana na Kristo. Tukalangirika nga situwite akaghala. Aliwe inywe, mukalangirika nga muwite akaghala. Mukakengawa, aliwe itwe bakatughonera. 11 Erihika n’oko ndambi eno, tukwire enzala, enyota, kandi tukabula n’eby’eryambala. Tukahunzawa, kandi situwite ah’erighotsera. 12 Tukakola kutsibu omo byala byetu. Bakabya babitutsamba, tukatsumulabo. Omughulu bakatwaghalaya, tukayiyinaya kutsibu. 13 Omughulu bakatulegha, tukasubiraya omo bolo. Erihika na lino, abandu bakinatulangira ng’ekyabu, ng’omutsafu.

14 Siniribahandikira emyatsi eyi busana n’eribahemula. Aliwe, nanzire eribakangirirya omo nzira eyitolere kundi muli bana baghe banzwa. 15 Nomo mwangabya imuwite abateya* 10 000 omo Kristo, oko kwenene, simuwite abo baba bangyi. Kundi erilabira Kristo Yesu, nabiribya baba wenyu busana n’eribaletera engulu mbuya. 16 Neryo ngabasaba niti mukwame eky’erileberyako kyaghe. 17 Busana n’ekyo, ngabatumira ye Timoteo kundi ni mwana waghe mwanzwa, kandi omutaleghula omo mubiiri w’Omukama. Akendibibukya esyonzira syaghe esyo ngakolesaya eritoka erikola ebyo Kristo Yesu anzire. Akendibibukya emyatsi eyo ngakangiriraya ehosi-hosi omo buli ndeko.

18 Abaghuma babiriyiheka busana n’erilengekania nga sinendisyasyasa ewenyu. 19 Aliwe, Yehova* amanza, nikisiya inasa. Ngendibya nahika, ngendiminya abakayiheka-heka abo nga banawite akaghala. 20 Kundi Obwami bw’oMungu sibulilangirika omo binywa, aliwe omo kaghala. 21 Niki kyo mwanzire? Mwanzire inasa n’efimbo, kutse inasa n’olwanzo n’omutima molo?